(ភ្នំពេញ)៖ មន្ត្រីគយប្រចាំច្រកទ្វា អន្តរជាតិភ្នំពេញ និងអ្នករត់ឯកសារ បានទម្លាយប្រាប់ Post News ថា មន្ត្រីអ្នកកាន់ការ នៅការិយាល័យឃ្លាំងទំនិញរបស់គយ នៅច្រកអន្តរជាតិភ្នំពេញ និងលោកប្រធានគយច្រកខាងលើនេះ បានឃុបខិតគ្នាជាចង្កោម ប្រព្រឹត្តអំពើពុករលួយយ៉ាងខ្លាំង និងមានសកម្មភាពនេះ ជាយូមកហើយ មិនដែលឃើញមន្ត្រីនៃអង្គភាពប្រឆាំអំពើពុករលួយ ចុះអង្កេតនោះទេ ហើយលោកប្រធានទីចាត់ការគយ និងរដ្ឋាករ លោក គុណ ញឹម បានជ្រាបដែរ ឫអត់ទេ ហើយវារឹតតែធ្វើឱ្យមន្ត្រីគយនៅទីនោះ នៅតែប្រកាន់ទម្លាប់ ដែលកំពុងជះឥទ្ធិពលដ៏អាក្រក់ ទៅលើអ្នកវិនិយោគទុន។
ប្រភពបានបញ្ជាក់ថា មន្ត្រីគយកាន់ការនៅការិយាល័យឃ្លាំងទំនិញរបស់គយ ច្រកខាងលើនេះ បានពុករលួយខ្លាំង ទៅលើទំនិញចេញចូល ជាពិសេសខាងក្រុមហ៊ុនដឹកជញ្ជូន រោងចក្រវាយនភ័ណ្ឌនោះ ជាដើម។ ប្រភពខាងលើបានប្រាប់ Post News ទៀតថា ក្រុមមន្ត្រីខាងលើនោះ ពូកែស៊ីគ្រប់ជុំពូកតែម្តង ដោយពួកមន្ត្រីទាំងនោះ តម្រូវឲ្យមានការបង់ប្រាក់ក្រោមតុ ផ្ទុយពីអ្វីដែលក្រសួងសេដ្ឋកិច្ច និងហិរញ្ញវត្ថុ ក៏ដូចជាអគ្គនាយកដ្ឋានគយ និងរដ្ឋាករកម្ពុជា បានកំណែទម្រង់ លុបបំបាត់អំពើពុករលួយ ជាពិសេស អនុវត្តគោលនយោបាយរបស់រដ្ឋាភិបាល ដែលតែងតែបានផ្តល់កម្លាំងចិត្ត ដល់អ្នកវិនិយោគទុន ដើម្បីជាអត្ថប្រយោជន៍ សម្រាប់សេដ្ឋកិច្ចជាតិ និងជាទុនដ៏មានសារសំខាន់ ស្រូបកម្លាំងពលកម្មក្នុងស្រុក ឲ្យពលរដ្ឋមានការងារធ្វើ ទទួលបានប្រាក់កម្រៃ សម្រាប់លើកស្ទួយ ដោះស្រាយជីវភាពរស់នៅប្រចាំថ្ងៃ។
ក្រុមអ្នករត់ការទំនិញវិនិយោគ បានលើកឡើងថា ការិយាល័យគយ និងរដ្ឋាករអាកាសយានដ្ឋាន អន្តរជាតិភ្នំពេញ ប្រកបដោយអំពើពុករលួយ ជាលក្ខណ:ប្រព័ន្ធ តាមគ្រប់រូបភាព តម្រូវឲ្យមានការបង់ប្រាក់ សម្រាប់ឯកសារ ប្រតិវេទន៍គយ ក្នុងមួយឯកសារៗ ចាប់ពី ៣៥ដុល្លារ ទៅ ៧៥ដុល្លារ នេះគិតសម្រាប់តែឯកសារ ដែលគ្មានកំហុស ចុះឯកសារមានកំហុសតិចតួច មន្ត្រីគយនៅទីនោះ ស៊ីខ្លាំងប៉ុណ្ណា។
ក្រុមអ្នករត់ការ បានលើកឡើងពីការិយាល័យគយ និងរដ្ឋាករអាកាសយានដ្ឋាន អន្តរជាតិភ្នំពេញ ដែលមានលោក ហ៊ីវ សុធារិទ្ធ ជាប្រធាន និងជាទម្លាប់ ដែលគាត់ឆ្លងកាត់នូវអំពើពុករលួយ យ៉ាងឆ្អឹនឆ្អៅ នៅកំពង់ផៃស្វយ័តភ្នំពេញ ក៏បន្តប្រព្រឹត្តកំហុសបែបនេះ ដដែលៗ។ ប្រភព បានបញ្ជាក់ថា យ៉ាងតិចក្នុង ១ឯកសារ សម្រាប់ទំនិញវិនិយោគនាំចូល ត្រូវបង់ប្រាក់ចំនួន ៧៥ដុល្លារ ក្នុងនោះ អ្នករត់ការ ត្រូវបង្ខំចិត្តបង់ប្រាក់ទៅឲ្យកូនចៅលោក ហ៊ីវ សុធារិទ្ធ ជាមន្ត្រីគយទទួលផ្នែកនីមួយៗ ដូចខាងក្រោម៖ ទី១ ត្រូវបង់ចំនួន ៥ដុល្លារ សម្រាប់មន្ត្រីគយទទួលផែនផ្នែកចុះលេខ (ឈ្មោះធឿន) ទី២ បង់ប្រាក់ចំនួន ២០ដុល្លារ សម្រាប់គណនេយ្យ (ឈ្នោះ សារាន់) ទី៣ បង់ប្រាក់ចំនួន ១០ដុល្លារ សម្រាប់ប្រធានផ្នែកត្រួតពិនិត្យ និងចំនួន ១០ដុល្លារទៀត ផ្នែកកូនចៅមន្ត្រីគយខាងពិនិត្យ ទី៤ បង់ប្រាក់ចំនួន ២០ដុល្លារ សម្រាប់មន្ត្រីគយផ្នែកកាត់ស្តុក បញ្ចុះឯកសារ និងទី៥ ត្រូវបង់ឲ្យអនុប្រធានការិយាល័យ ជាកិច្ចបង្ហើយឯកសារ ចំនួន ៥ដុល្លារ ។ ដោយឡែក ចំពោះទំនិញវិនិយោគនាំចេញ ក្នុងមួយឯកសារចំនួន ៣៥ដុល្លារ។
អំពើពុករលួយនេះ គាបសង្កត់ទាំងឯកសារស្របច្បាប់របស់ផ្នែកទំនិញវិនិយោគ ឧស្សាហកម្មវេយនភ័ណ្ឌ រោងច្រកកាត់ដេរ ដោយករណីខ្លះ លោក ហ៊ីវ សុធារិទ្ធ បានតម្រូវឲ្យមន្ត្រីរបស់ខ្លួន កេងប្រវ័ញ្ចក្នុងប្រយោជន៍ ទៅលើឯកសារខុសបច្ចេកទេសតិចតួច ឬកិច្ចការងារប្រញាប់ ត្រូវទាញយកប្រយោជន៍លក្ខណ:ក្រោមតុ កាន់តែច្រើន និងចង់ទៅស៊ីញ៉េកន្លែងណា ក៏បាន។ ទង្វើទាំងអស់នេះ កំពុងតែជះឥទ្ធិពលអាក្រក់ ប៉ះពាល់ដល់ថ្នាក់លើ ក៏ដូចជាសង្គមជាតិ ជាពិសេសប៉ះពាល់ទៅនឹងអារម្មណ៍យ៉ាងធ្ងន់ ចំពោះអ្នកវិនិយោគទុន។
ពាក់ព័ន្ធករណីគយច្រកទ្វារ អន្តរជាតិ ប្រព្រឹត្តអំពើពុករលួយនេះ Post News មិនអាចទាក់ទងបានទេពីលោក ហ៊ីវ សុធារិទ្ធ ប្រធានការិយាល័យគយ និងរដ្ឋាករអាកាសយានដ្ឋាន អន្តរជាតិភ្នំពេញ៕
មតិយោបល់