កាលពីម្សិលមិញនេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានជួបពិភាក្សាការងារជាមួយ លោកស្រី Manika Jain ឯកអគ្គរដ្ឋទូតថ្មី នៃសាធារណរដ្ឋឥណ្ឌាប្រចាំកម្ពុជា និងលើកទឹកចិត្តឲ្យ លោកស្រី Manika Jain ពិនិត្យមើលលទ្ធភាពអំពីការវិនិយោគផ្នែកទេសចរណ៍ និងវិស័យផ្សេងៗទៀត ដែលអាចជំរុញ និងពង្រីកទំនាក់ទំនងរវាងប្រទេសទាំងពីរ ជាពិសេសលើ វិស័យទេសចរណ៍តែម្តង។

សម្តេចតេជោ បានបន្តថា បើមានជើងហោះហើរត្រង់ពីញ៉ូវដេលី មកកាន់ទីក្រុងភ្នំពេញ ឬមកកាន់ទីក្រុងសៀមរាបបាននោះ ទេសចរណ៍ឥណ្ឌា នឹងមានការកើនឡើងជាមិនខាន។

ជាការឆ្លើយតប លោកស្រីអគ្គរដ្ឋទូត បានមានប្រសាសន៍ផងដែរថា ក្នុងបេសកកម្មការទូតរបស់លោកស្រីនៅពេលនេះ លោកស្រី នឹងប្រឹងប្រែងឱ្យអស់ពីសមត្ថភាព និងលទ្ធភាពធ្វើយ៉ាងណា គឺពង្រីកទំនាក់ទំនងទាំងពាណិជ្ជកម្ម វិនិយោគ រួមទាំងវិស័យទេសចរណ៍ វប្បធម៌ និងវិស័យផ្សេងៗទៀត ដែលជាការរួមចំណែកក្នុងការពង្រីក និងពង្រឹងទំនាក់ទំនងរវាងប្រទេសទាំងពីរឲ្យកាន់តែល្អខ្លាំងឡើង។

កាលពីពេលថ្មីៗនេះ ក្នុងជំនួបពិភាក្សារវាងលោក ថោង ខុន រដ្ឋមន្ត្រីក្រសួងទេសចរណ៍ និងលោកស្រី ប្រាមីឡា រ៉ានីប្រាម៉ា រដ្ឋមន្ត្រីបរិស្ថាន និងព្រៃឈើរដ្ឋអាសាន់ នៃសាធារណរដ្ឋឥណ្ឌា បានឲ្យដឹងថា លោក ថោង ខុន នឹងទៅចូលរួមក្នុងព្រឹត្តិការណ៍អន្តរជាតិ កិច្ចប្រជុំកំពូលវិនិយោគិនសកល ដើម្បីរឹតចំណងមិត្តភាពរវាងកម្ពុជា-ឥណ្ឌា ទាក់ទាញកំណើនទេសចរ អ្នកវិនិយោគឥណ្ឌា និងប្រទេសទី៣ មកទស្សនា និងវិនិយោគនៅកម្ពុជាបន្ថែមទៀត។

ជាមួយគ្នានោះ ភាគីទាំងពីរ បានជម្រុញឲ្យមានការហោះហើរត្រង់ពីកម្ពុជា ឆ្ពោះទៅកាន់រដ្ឋអាសាន់ ពីព្រោះរដ្ឋភាគឦសានឥណ្ឌាមួយនេះ ប្រៀបដូចជាច្រកតភ្ជាប់អាស៊ាន និងកម្ពុជាយ៉ាងអញ្ចឹង ដែលសុទ្ធតែជាការជម្រុញវិស័យវិនិយោគថ្មីបន្ថែមទៀត។

គួរជម្រាបថា កម្ពុជា និងឥណ្ឌា បានចុះហត្ថលេខារួចរាល់ហើយ លើគម្រោងហោះហើរត្រង់រវាងគ្នានេះ និងជម្រុញឲ្យចាប់ផ្តើមប្រតិបត្តិការជើងហោះហើរត្រង់ នៅឆ្នាំ ២០១៨នេះ ខណ:បច្ចុប្បន្នពុំទាន់មានក្រុមហ៊ុនណា ចាប់ផ្តើមប្រតិបត្តិការនៅឡើយទេ រង់ចាំការសិក្សាលើបច្ចេកទេសបន្ថែម។

លោក ស៊ីន ចាន់សិរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរស៊ីវិល បានឲ្យដឹងថា អនុស្សរណ:យោគយល់គ្នារវាងកម្ពុជា នឹងឥណ្ឌា សម្រាប់ជើងហោះហើរត្រង់ មានតាំងពីឆ្នាំ ២០០២ មកម្ល៉េះ ដែលផ្តល់ភាពងាយស្រួលក្រុមហ៊ុន ក្នុងការដាក់ពាក្យស្នើសុំប្រតិបត្តិការ ជើងហោះហើរនេះ។

លោក Naveen Srivastrava ក៏បានបន្ថែមថា ជើងហោះហើរត្រង់នេះ នឹងជម្រុញកំណើនទេសចរណ៍ និងពាណិជ្ជកម្មរវាងប្រទេសទាំងពីរ ហើយតួលេខនៃភ្ញៀវទេសចរណ៍ធ្វើដំណើរទៅមករវាងប្រទេសទាំងពីរ កំពុងកើនឡើងផងដែរ។

ជើងហោះហើរនេះ នឹងប្រតិបត្តិការរវាង ក្រុងភ្នំពេញ/សៀមរាប នឹង NewDelhi/ទីក្រុងមួយចំនួនទៀតនៃប្រទេសឥណ្ឌា ដែលអាកាសយានដ្ឋានអន្តរជាតិសៀមរាប អាចជាគោលដៅចម្បងមុនគេ ក្នុងការចាប់ផ្តើមប្រតិបត្តិការជើងហោះហើរនេះ ដោយសារភ្ញៀវទេសចរណ៍ឥណ្ឌាភាគច្រើន ចាប់អារម្មណ៍លើ ទេសចរណ៍អាពាហ៍ពិពាហ៍ សម្បត្តិវប្បធម៌របស់ប្រទេសកម្ពុជា។

តំបន់សៀមរាបអង្គរ ជាគោលដៅចម្បងសម្រាប់ទេសចរណ៍អាពាហ៍ពិពាហ៍​ ហើយភ្ញៀវទេសចរអាច តភ្ជាប់ទៅកាន់ខេត្តព្រះសីហនុ សម្រាប់រាត្រីក្រេបច័ន្ទទឹកឃ្មុំ។

ប្រទេសឥណ្ឌា ជាប្រទេសដ៏ធំមួយ មានប្រជាជនប្រមាណ ១៣០០លាននាក់ ដែលជាសក្តានុពលទេសចរណ៍ដ៏ធំមួយ ត្រូវបានព្យាករណ៍ថា នៅឆ្នាំ​ ២០២០ នឹងមានភ្ញៀវទេសចរឥណ្ឌាចេញក្រៅប្រមាណ ៥០លាននាក់៕