ប្រធានធនាគារអភិវឌ្ឍន៍អាស៊ី (ADB) លោក Takehiko Nakao បានសម្ដែងនូវការអបអរសាទរចំពោះប្រទេសជាសមាជិកទាំងប្រាំមួយ ក្នុងកិច្ចប្រជុំកំពូលនៃមហាអនុតំបន់ទន្លេមេគង្គ ក្នុងឱកាសខួប ២៥ ឆ្នាំនៃកិច្ចសហប្រតិបត្តិការថ្នាក់តំបន់ប្រកបដោយជោគជ័យ។
លោកបានគូសបញ្ជាក់សាជាថ្មីពីការបន្តផ្ដល់ការគាំទ្ររបស់ ADB ដល់កម្មវិធីនេះ ក្នុងថវិកា ៧ពាន់លានដុល្លារ ក្នុងរយ:ពេល ៥ឆ្នាំទៀត ដើម្បីជួយឱ្យអនុតំបន់នេះសម្រេចនូវកំណើនបរិយាបន្ន និងការអភិវឌ្ឍប្រកបដោយចីរភាព។
កិច្ចប្រជុំនេះ មានការចូលរួមពីលោក Nguyen Xuan Phuc នាយករដ្ឋមន្រ្តីវៀតណាម សម្តេចតេជោ ហ៊ុន សែន នាយករដ្ឋមន្រ្តីកម្ពុជា លោក Wang Yi សមាជិកក្រុមប្រឹក្សារដ្ឋនៃសាធារណរដ្ឋប្រជាមានិតចិន លោក Thongloun Sisoulith នាយករដ្ឋមន្ត្រីសាធារណរដ្ឋប្រជាមានិតប្រជាធិបតេយ្យឡាវ លោក U Henry Van Thio អនុប្រធានាធិបតីមីយ៉ាន់ម៉ា និងលោក Prayut Chan-o-cha នាយករដ្ឋមន្ត្រីថៃ។
ក្នុងសុន្ទរកថាទៅកាន់កិច្ចប្រជុំកំពូលនៃមហាអនុតំបន់ទន្លេមេគង្គ និងកិច្ចប្រជុំកំពូលធុរកិច្ចនៅមហាអនុតំបន់ទន្លេមេគង្គ លោក Nakao បានមានប្រសាសន៍ថា «បច្ចុប្បន្ននេះ ប្រទេសក្នុងមហាអនុតំបន់ទន្លេមេគង្គ គឺជាប្រទេសដែលមានសេដ្ឋកិច្ចរីកចម្រើនឆាប់រហ័សជាងគេនៅអាស៊ី និងក្នុងពិភពលោក»។
ADB នឹងបន្តសម្របសម្រួលកម្មវិធី GMS នេះ ឈរលើមូលដ្ឋាននៃការជឿទុកចិត្តគ្នាទៅវិញទៅមក និង អក្សរ C បី ដែលតំណាងឱ្យការតភ្ជាប់ទំនាក់ទំនង (connectivity) ភាពប្រកួតប្រជែង (competitiveness) និងសហគមន៍ (community)។
កម្មវិធី GMS បានគាំទ្រដល់គម្រោងជាច្រើន ដែលមានតម្លៃស្មើនឹង ២១ពាន់លានដុល្លារ ចាប់តាំងពីកម្មវិធីនេះ ត្រូវបានបង្កើតឡើងក្នុងឆ្នាំ ១៩៩២ មក ក្នុងវិស័យផ្សេងៗ ដូចជា គមនាគមន៍ ទេសចរណ៍ សុខាភិបាល ការអភិវឌ្ឍទីក្រុង បរិស្ថាន ការអភិវឌ្ឍធនធានមនុស្ស កសិកម្ម និងថាមពល។
ផ្អែកទៅតាមផែនការសកម្មភាពទីក្រុងហាណូយ និងក្របខ័ណ្ឌវិនិយោគថ្នាក់តំបន់ ដែលត្រូវបានអនុម័តក្នុងកិច្ចប្រជុំកំពូល GMS នៅថ្ងៃនេះ កម្មវិធីនេះ នឹងផ្ដល់ការគាំទ្រដល់គម្រោងចំនួន ២២៧ ដែលមានតម្លៃ ៦៦ ពាន់លានដុល្លារ ចាប់ពីឆ្នាំ ២០១៨ ដល់ឆ្នាំ ២០២២ ដែលក្នុងនោះ ADB នឹងផ្ដល់ហិរញ្ញប្បទានប្រមាណ ៧ ពាន់លានដុល្លារ។
ផែនការនេះ អំពាវនាវឱ្យមានការពង្រីកច្រករបៀងសេដ្ឋកិច្ច ដើម្បីជំរុញការតភ្ជាប់ទំនាក់ទំនងរវាងប្រទេសនានា ព្រមទាំងទំនាក់ទំនងរវាងតំបន់ជនបទ និងតំបន់ប្រជុំជន ដើម្បីធានាឱ្យមានការបែងចែកអត្ថប្រយោជន៍ ដែលបានកំណើនសេដ្ឋកិច្ច ឱ្យកាន់តែមានសមធម៌បន្ថែមទៀត៕
មតិយោបល់