ក្រុមអ្នកស្រាវជ្រាវនៅអឺរ៉ុបបានរកឃើញថា ការសេពស្រា និងស្រាបៀរលើសកម្រិតអាចប្រឈមនឹងជំងឺមហារីកថ្លើម ខ្ពស់ជាងអ្នកដែលទម្លាប់ទទួលទានទឹកតែមួយថ្ងៃ១ពែង រហូតដល់ទៅ៥ដង។

ទោះបីជាជាតិអាល់កុលជាមូលហេតុចម្បងដែលបណ្តោលឲ្យកើតជំងឺមហារីកថ្លើម ក៏ដោយ ប៉ុន្តែមិនមានន័យថាជំងឺនេះកើតឡើងដោយសារតែជាតិអាល់កុលមួយមុខនោះទេ។ ក្រៅពីជាតិអាល់កុល នៅមានមូលហេតុមួយចំនួនទៀតក៏អាចបណ្តោលឲ្យកើតជំងឺមហារីកថ្លើមដូចគ្នា។

១.ជក់បារីច្រើនពេក
ជាតិនីកូទីន ដែលមាននៅក្នុងផ្សែងបារី គឺជាសត្រូវដ៏ធំបំផុតរបស់ថ្លើម ប្រសិនបើអ្នកជក់បារីកាន់តែច្រើន ថ្លើមច្បាស់ជាប្រឈមនឹងជំងឺមហារីកកាន់តែខ្លាំង។

២.ទទួលទានអាហារកែច្នៃ
អាហារកែច្នៃមានផ្ទុកកាឡូរីខ្ពស់ ខ្លាញ់ខ្ពស់ និងសារធាតុចិញ្ចឹមទាប នៅពេលដែលអ្នកទទួលទានច្រើនពេក វានឹងបណ្តោលឲ្យលើសទម្ងន់ ហើយអាចកើតជំងឺផ្សេងៗមើលមិនឃើញឡើយ។ លើសពីនេះទៅទៀត សារធាតុគីមីដែលផ្សំនៅក្នុងអាហារកែច្នៃអាចបង្កឲ្យមានគ្រោះថ្នាក់ដល់រាងកាយខ្លាំងបំផុត។

៣.ទទួលទានអាហារមានជាតិខ្លាញ់ច្រើនពេក
ប្រេង ឬខ្លាញ់ គឺជាធាតុផ្សំដ៏សំខាន់បំផុតនៅក្នុងការចម្អិនអាហារប្រចាំថ្ងៃ ហើយប្រសិនបើរាងកាយស្រូបយកសារធាតុទាំងនេះកម្រិតមធ្យមវានឹងជួយផ្តល់ថាមពលដល់រាងកាយ និងរក្សាមុខងារសរីរាង្គខាងក្នុងឲ្យមានដំណើរការបានល្អ។

ក៏ប៉ុន្តែអ្នកមិនត្រូវទទួលទានញឹកញាប់ពេកនោះទេ ព្រោះវាអាចនាំឲ្យមានគ្រោះថ្នាក់ដល់សុខភាព ជាពិសេសថ្លើម។

៤.គេងមិនបានគ្រប់គ្រាន់
ការគេងមិនបានគ្រប់គ្រាន់ មិនត្រឹមតែធ្វើឲ្យប៉ះពាល់ដល់ដំណើរការបស់រាងកាយប៉ុណ្ណោះទេ សូម្បីតែថ្លើម ក៏ត្រូវទទួលរងនូវការខូចខាតកោសិកាដែរ។
ចំពោះអ្នកដែលមានជំងឺថ្លើមស្រាប់ ការគេងមិនបានគ្រប់គ្រាន់នឹងធ្វើឲ្យកោសិកាថ្លើមខូចខាតកាន់តែធ្ងន់ធ្ងរ មិនអាចស្តារត្រឡប់មកវិញបានទេ គឺកាន់តែមានសភាពធ្ងន់ធ្ងរទៅៗ។

៥.គិតតែរឿងអវិជ្ជមាន
បើយោងតាមអ្នកជំនាញផ្នែកឱសថចិន យល់ឃើញថា ការគិតរឿងអវិជ្ជមានដូចជាភាពក្រៀមក្រំ ធ្លាក់ទឹកចិត្ត ឆាប់ខឹង ថប់អារម្មណ៍… និងបណ្តោលឲ្យជាតិពុលកកុញនៅក្នុងថ្លើម ហើយបង្កើតទៅជាជំងឺជាច្រើន។

ប្រសិនបើអារម្មណ៍អវិជ្ជមានទាំងនេះនៅតែមានរយ:ពេលយូរ ក្រពេញថ្លើម នឹងត្រូវបានរំខាន ហើយគ្រោះថ្នាក់ទាំងរូបរាងកាយ និងបញ្ញាស្មារតី៕

ប្រភព៖ soha