អាមេរិក: ទោះបីជាមានការហាម និងជំទាស់ពីភាគីចិនយ៉ាងណាក៏ដោយ ទៅនឹងទំនាក់ទំនងគ្រប់យ៉ាងរវាងមេដឹកនាំកោះតៃវ៉ាន់ និងក្រុមមន្ត្រីអាមេរិកក៏ពិតមែន ប៉ុន្តែនៅថ្ងៃច័ន្ទនេះ លោកស្រីប្រធានាធិបតីកោះតៃវ៉ាន់ Tsai Ing-wen បានជួបជាមួយសមាជិកព្រឹទ្ធសភាអាមេរិក លោក Ted Cruz និងលោក Greg Abbott អភិបាលរដ្ឋ Texas ហើយ។ នេះបើយោងតាមរយ: សារព័ត៌មាន CNN ចេញផ្សាយនៅថ្ងៃទី១០ ខែមករា ឆ្នាំ២០១៧។
អ្នកនាំពាក្យក្រសួងការបរទេសចិន លោក Lu Kang បានប្រាប់ពួកអ្នកកាសែតថា «ប្រទេសចិនប្រឆាំងដាច់ខាតនៅរាល់សកម្មភាពទាំងឡាយណា ដែលធ្វើឲ្យប៉ះពាល់ និងខូចខាតដល់ទំនាក់ទំនងរវាងចិន និងអាមេរិក»។
ជំនួបនេះ បានកើតមានឡើងនៅទីក្រុង Houston បន្ទាប់ពីលោកស្រី Tsai បានឈប់សំចតនៅទីនោះ នៅមុនពេលលោកស្រីធ្វើដំណើរទៅកាន់ទ្វីបអាមេរិកកណ្តាល។
មុនពេលមានជំនួបកិច្ចចរចានេះដែរ គណ:ប្រតិភូសភា Houston បានទទួលសំបុត្រមួយពីស្ថានកុងស៊ុលចិន ដោយក្នុងនោះបានសេរសេរថា សុំកុំឱ្យពួកគេជួបជំនុំជាមួយប្រធានាធិបតីកោះតៃវ៉ាន់ នេះយោងតាមលោក Cruz បានលើកទ្បើង។
ភ្លាមៗនោះដែរ លោក Cruz ក៏បានឆ្លើយតបទៅចិនវិញថា «នៅក្នុងប្រទេសអាមេរិក ចិនគ្មានអំណាចវ៉េតូជំទាស់នោះទេ យើងមានសិទ្ធិធ្វើសេចក្តីសម្រេចដោយខ្លួនយើង ក្នុងការជួបជាមួយពួកភ្ញៀវ ហើយយើងនឹងបន្តជួបជាមួយភ្ញៀវទាំងឡាយណា ដែលយើងយល់ថាស័ក្តិសមជួបជាមួយ»៕
មតិយោបល់