(ភ្នំពេញ)៖ បន្ទាប់ពីសិល្បករ សិល្បការិនី មួយរយ:នេះ បានលែងខ្លួនស្ទើតែអស់ល្វែងលើ ល្វែងក្រោម នូវភាពសិចស៊ីហួសព្រំដែន ចម្លងតាមវប្បធម៌បរទេសនិងធ្វើឲ្យប៉ះពាល់ដល់វប្បធម៌ ទំនៀមទម្លាប់និងប្រពៃណីដ៏ល្អថ្លៃថ្លារបស់ខ្មែរនោះ ក្រសួងវប្បធម៌និងវិចិត្រសិល្ប: នាថ្ងៃទី២៥ ខែមីនា ឆ្នាំ២០១៦ បានចេញសេចក្ដីណែនាំមួយជាបន្ទាន់ដល់សិល្បករ សិល្បការិនី ដែលលែងខ្លួនដើម្បីប្រយោជន៍បុគ្គល និងមិនគិតពីសេចក្ដីថ្លៃថ្នូរបស់ជាតិ។

 នៅក្នុងសេចក្ដីណែនាំបានលើកឡើងថា ក្រសួងសង្កេតឃើញនៅលើបណ្ដាញប្រព័ន្ធផ្សព្វផ្សាយ និងលើទំព័រនៃបណ្ដាញព័ត៌មានសង្គម (ហ្វេសប៊ុក) តែងមានសិល្បករ សិល្បការិនីមួយចំនួន កំពុងចាប់យកវប្បធម៌បរទេសមកធ្វើជាវប្បធម៌របស់ខ្លួន តាមរយ:ការប្រើប្រាស់សំលៀកបំពាក់និងឥរិយាបថ ស្រើបស្រាលនានាដែលមានលក្ខណ:ប្រាសចាកពីវប្បធម៌ សីលធម៌ និងទំនៀមទម្លាប់ ប្រពៃណីរបស់ជាតិ ក្នុងគោលដៅអូសទាញនូវសមានចិត្តគាំទ្រពីទស្សនិកជនដើម្បីភាពល្បីល្បាញរបស់ខ្លួន។

 ក្នុងបរិបទនេះ ដើម្បីរួមចំណែកដល់ការលើកស្ទួយវប្បធម៌ ទំនៀមទម្លាប់ និងប្រពៃណីដ៏ល្អថ្លៃថ្លា ដែលជាមរតកដូនតានៃយើង ក្រសួងវប្បធម៌និងវិចិត្រសិល្ប: សូមធ្វើការណែនាំដូចខាងក្រោម៖ -សិល្បករ សិល្បការិនីទាំងអស់ សូមប្រើប្រាស់សម្លៀកបំពាក់ ឲ្យបានសមស្របតាមទំនៀមទំលាប់ប្រពៃណីរបស់ជាតិមានឥរិយាបថ ប្រកបដោយសីលធម៌ គុណធម៌ សុជីវធម៌ ដែលជាមរតកដ៏ល្អផូរផង់នៃដូនតាយើង។

 -គ្រប់បណ្ដាញផ្សព្វផ្សាយទាំងអស់ សូមចូលរួមទប់ស្កាត់ និងបញ្ឈប់នូវរាល់ការចាក់ផ្សាយទាំងឡាយណាដែលមានសកម្មភាព ឥរិយាបថ និងការស្លៀកពាក់បម្រើដល់ការសម្ដែង ដែលមានផលប៉ះពាល់ដល់វប្បធម៌ ទំនៀមទម្លាប់ និងប្រពៃណីដ៏ល្អផូរផង់របស់ជាតិ៕