ហ្វីលីពីន: ប្រធានាធិបតីលោក Rodrigo Duterte នៅថ្ងៃសៅរ៍ បានជំរុញឲ្យអាមេរិក បង្ហាញភាពអត់ធ្មត់ បន្ទាប់ពីការធ្វើតេស្តមីស៊ីលចុងក្រោយរបស់កូរ៉េខាងជើង ដើម្បីជៀសវាងការប្រលូកចូលក្នុងជម្លោះ ជាមួយមេដឹកនាំលោក គីម ជុងអ៊ុន ដែលជាអ្នកចង់បញ្ចប់អវសានពិភពលោកនោះ។ នេះបើយោងតាមរយ: សារព័ត៌មាន Channel News Asia ចេញផ្សាយនៅថ្ងៃទី៣០ ខែមេសា ឆ្នាំ២០១៧។

ជាក់ស្ដែងលោក Duterte បានឲ្យដឹងថា «តំបន់អាស៊ីអាគ្នេយ៍ ពិតជាមានការព្រួយបារម្ភយ៉ាងខ្លាំង អំពីភាពតានតឹងរវាងអាមេរិក និងកូរ៉េខាងជើង ហើយបាននិយាយថា ការ​ប្រឈមមុខដាក់គ្នានេះ នឹងជាមហន្តរាយដ៏ធំមួយ ដោយអាស៊ីនឹងក្លាយជាជនរងគ្រោះដំបូងគេបង្អស់នៃសង្គ្រាមនុយក្លេអ៊ែរ។

លោកបានបន្ថែមថា អាមេរិក ជប៉ុន កូរ៉េខាងត្បូង និងចិន គឺកំពុងតែប្រលែងលេងជាមួយបុរសម្នាក់ ដែលភ្លើតភ្លើនសប្បាយជាមួយនឹងការបាញ់មីស៊ីល។

ក្នុងនាមជាប្រធាននៃសមាគមប្រជាជាតិអាស៊ីអាគ្នេយ៍ (ASEAN) នាពេលបច្ចុប្បន្ន លោក Duterte បាននិយាយតាមទូរស័ព្ទ ជាមួយប្រធានាធិបតីអាមេរិកលោក ដូណាល់ ត្រាំ កាលពីថ្ងៃសៅរ៍ ដោយបានជំរុញឲ្យលោក ត្រាំ កុំប្រលូកចូលក្នុងជម្លោះជាមួយលោក គីម។

លើពីនេះទៅទៀត បន្ទាប់ពីជំនួបកំពូលអាស៊ាន នៅទីក្រុងម៉ានីល លោក Duterte បានប្រាប់នៅសន្និសីទកាសែតមួយថា «ខ្ញុំមិនចង់ឲ្យអាមេរិក ប្រឈមមុខដាក់គ្នាជាមួយក្រុងព្យុងយ៉ាងនោះទេ ដោយសារតែខ្ញុំពិតជាមិនដឹងថា មានអ្វីកើតទ្បើងចំពោះវានោះទេ ប៉ុន្តែមេដឹកនាំកូរ៉េខាងជើង អាចនឹងធ្វើឲ្យភពផែនដីធ្លាក់ក្នុងគ្រោះមហន្តរាយបាន»៕