កូរ៉េ: សមាជិកសភាគណបក្សប្រជាធិបតេយ្យ ដែលកំពុងកាន់អំណាចរបស់កូរ៉េខាងត្បូង នៅថ្ងៃព្រហស្បតិ៍នេះ បានលើកទ្បើងពីសារ:សំខាន់នៃកិច្ចចរចា ជាមួយកូរ៉េខាងជើង ដើម្បីដោះស្រាយបញ្ហានុយក្លេអ៊ែរនៅលើឧបទ្វីបកូរ៉េ។ នេះបើយោងតាមសារព័ត៌មានចិនស៊ិនហួ ចេញផ្សាយនៅថ្ងៃទី១២ ខែកញ្ញា ឆ្នាំ២០១៧។

លោក Shim Jae-kwon ជាមាជិកគណបក្សប្រជាធិបតេយ្យ បាននិយាយនៅក្នុងសេចក្តីថ្លែងការណ៍មួយថា ការដាក់ទណ្ឌកម្ម និងសម្ពាធជាយុទ្ធសាស្ត្រដ៏ចាំបាច់ ក្នុងការដោះស្រាយបញ្ហាអាវុធនុយក្លេអ៊ែរ និងមីស៊ីលជាមួយកូរ៉េខាងជើង ប៉ុន្តែដោយផ្អែកលើស្ថានការណ៍នាពេលបច្ចុប្បន្ន ក្រុងសេអ៊ូល គួរតែធ្វើកិច្ចចរចាជាមួយក្រុងព្យុងយ៉ាង ដើម្បីស្ដារស្ថានការណ៍ប្រទេសទាំងពីរឲ្យប្រសើរទ្បើងវិញ។

ក្នុងនោះលោក បានសង្កត់ធ្ងន់ថា គណបក្សរដ្ឋាភិបាល គួរតែចាប់ផ្ដើមធ្វើកិច្ចចរចា នៅមុនពេលរបបកុម្មុនិស្តមួយនេះ បញ្ចប់ការអភិវឌ្ឍកម្មវិធីអាវុធនុយក្លេអ៊ែររបស់ខ្លួន ដែលមានសមត្ថភាពអាចវាយប្រហារដល់ទឹកដីអាមេរិក៕