អាមេរិក: មន្ទីរបញ្ចកោណ បានព្រួយបារម្ភយ៉ាងខ្លាំង ខណ:ដែលចិន និងរុស្ស៊ី កំពុងផលិតមីស៊ីល បំពាក់ឧបករណ៍ប្រឆាំងនឹងផ្កាយរណប (ASAT) ដោយវាមានសមត្ថភាព អាចបាញ់ផ្កាយរណបអាមេរិក ចេញពីគន្លងផ្កាយនៅលើភពផែនដី ក្នុងរយ:ពេលពីរឆ្នាំខាងមុខទៀត។ នេះបើយោងតាមសារព័ត៌មាន Sputnik ចេញផ្សាយនៅថ្ងៃទី១ ខែកុម្ភ: ឆ្នាំ២០១៨។
នាយកភ្នាក់ងារចារកម្មនៃអគ្គសេនាធិការចម្រុះ បានប្រាប់សារព័ត៌មាន Washington Free Beacon ថា មីស៊ីលទាំងនេះ កំពុងស្ថិតនៅក្នុងការអភិវឌ្ឍ ហើយវានឹងមានសមត្ថភាពប្រយុទ្ធ នៅដើមឆ្នាំ ២០២០ ។
កាលពីខែឧសភា លោក Dan Coats នាយកផ្នែកស៊ើបការណ៍សម្ងាត់ជាតិអាមេរិក ធ្លាប់បាននិយាយថា ក្រុងម៉ូស្គូ និងប៉េកាំង កំពុងពិចារណាការវាយប្រហារប្រឆាំងនឹងប្រព័ន្ធផ្កាយរណបរបស់អាមេរិក ដែលជាផ្នែកមួយនៃសង្គ្រាមនាពេលអនាគតរបស់ពួកគេ។
ដោយលោក Coats បានប្រាប់សភាថា «ប្រទេសទាំងពីរ នឹងបន្តស្វែងរកអាវុធ ASAT ដ៏ពេញលេញ ដើម្បីជាមធ្យោបាយកាត់បន្ថយ ប្រសិទ្ធភាពយោធារបស់អាមេរិក»៕
មតិយោបល់