ជប៉ុន: អ្នកនាំពាក្យជាន់ខ្ពស់រដ្ឋាភិបាល លោក Yoshihide Suga បាននិយាយថា ជំនន់ទឹកភ្លៀង ដែលបានវាយប្រហារតំបន់មួយចំនួន នៃប្រទេសជប៉ុន រហូតដល់ថ្ងៃព្រហស្បតិ៍នេះ បានបណ្ដាឲ្យមនុស្សស្លាប់កើនទ្បើងដល់ ១៩៩ នាក់ហើយ ខណ:រាប់សិបនាក់ទៀត នៅតែបន្តបាត់ខ្លួននៅទ្បើយ។ នេះបើយោងតាមសារព័ត៌មាន Channel News Asia ចេញផ្សាយនៅថ្ងៃទី១២ ខែកក្កដា ឆ្នាំ២០១៨។

លោក Yoshihide Suga បានបន្ថែមថា ប្រតិបត្តិការជួយសង្គ្រោះ ដើម្បីស្វែងរកជនរងគ្រោះ កំពុងតែបន្តធ្វើទ្បើងយ៉ាងសស្រាក់សស្រាំ បន្ទាប់ពីគ្រោះមហន្តរាយដ៏អាក្រក់នេះ បានបំផ្លិចបំផ្លាញនៅក្នុងប្រទេសជប៉ុន មិនធ្លាប់មានក្នុងរយ:ពេលជាង ៣ ទសវត្សរ៍កន្លងមក។

ក្នុងនោះលោក បានបញ្ជាក់ថា នាយករដ្ឋមន្ត្រីលោក ស៊ីនហ្សូ អាបេ ដែលបានធ្វើដំណើរទៅកាន់តំបន់ រងផលប៉ះពាល់មួយកន្លែង កាលពីថ្ងៃពុធ គ្រោងនឹងធ្វើដំណើរទៅតំបន់រងគ្រោះដទៃទៀត នាថ្ងៃសុក្រខាងមុខ។

ដោយដំណើរទៅមើលទីតាំងរងគ្រោះរបស់លោក អាបេ បានធ្វើទ្បើងបន្ទាប់ពីលោក បានលុបចោលដំណើរទស្សនកិច្ច នៅបរទេសចំនួន ៤ប្រទេស ដោយសារតែតួលេខអ្នកស្លាប់ នៅក្នុងគ្រោះមហន្តរាយបានបន្តកើនឡើងយ៉ាងគំហុក៕