ភ្នំពេញ: បុរសម្នាក់បើករថយន្តហាយប្រ៊ីតមួយគ្រឿង ក្នុងល្បឿនយ៉ាងលឿន ហើយព្យាយាមបើកវ៉ាជែងមិនប្រយ័ត្នក៏ជ្រុលទៅបុករថយន្តមួយគ្រឿងទៀតចំពីមុខពេញទំហឹងបណ្តាលឲ្យរថយន្តទាំងពីរដាច់ក្រឡេកង់ខាងមុខ។ ហេតុការណ៍នេះ កើតឡើងកាលពីវេលាម៉ោង៩និង២០នាទីយប់ ថ្ងៃទី២៤ ខែកញ្ញា ឆ្នាំ២០១៨ត្រង់ចំណុចខាងលិចប៉ុស្តិ៍នគរបាលរដ្ឋបាលទឹកល្អក់ទី៣ប្រមាណ៣០ម៉ែត្រ តាមបណ្ដោយផ្លូវ១៨២ ស្ថិតក្នុងសង្កាត់ទឹកល្អក់ទី៣ខណ្ឌទួលគោក។
តាមប្រភពព័ត៌មានពីកន្លែងកើតហេតុ បានឲ្យដឹងថា នៅមុនពេលកើតហេតុខណ:ដែលមេឃ កំពុងធ្លាក់ភ្លៀងជោកជាំគេឃើញបុរសម្នាក់បើកបររថយន្តមួយគ្រឿងម៉ាក តូយូតាហាងប្រ៊ិត ពណ៌ស ពាក់ស្លាកលេខ ភ្នំពេញ2Z-0841ដោយធ្វើដំណើរតាមបណ្តោយផ្លូវ១៨២ ក្នុងទិសដៅពីលិចទៅកើត និងក្នុងល្បឿនយ៉ាងលឿន។ លុះមកដល់ចំណុចកើតហេតុ រថយន្តខាងលើបានព្យាយាមបើកវ៉ាជែងខាងឆ្វេងរថយន្តមិនចាំម៉ាកមួយគ្រឿងទៀត បណ្តាលឲ្យឆ្លងចូលទៅកន្លងម្ខាងទៀតនៃផ្លូវ ហើយក៏ជ្រុលទៅបុករថយន្តមួយគ្រឿងទៀម៉ាក ហ្វត់រ៉េនជ័រ ពណ៌សបិទតែមពណ៌ខៀវ ពាក់ស្លាកលេខ ខេមរភូមិន្ទ09 2-6960។ ដែលបើកបរដោយបុរសម្នាក់ និងបុរសម្នាក់ទៀត រួមដំណើរជាមួយ ក្នុងទិសដៅបញ្រ្ចាសទិសគ្នា ចំពីមុខចំហៀងខាងឆ្វេងពេញទំហឹង បង្កឲ្យរថយន្តទាំងពីរគ្រឿងរងការខូចខាតដាច់ក្រឡេកង់ខាងមុខចំហៀងខាងឆ្វេងទាំងសងខាង តែសំណាងល្អដែលមិនបង្កឲ្យនរណាម្នាក់រងរបួសនោះទេ។
ក្រោយពេលកើតហេតុសមត្ថកិច្ចមូលដ្ឋាន បានចុះមកដល់ចំណុចកើតហេតុ ហើយភាគីទាំងពីរបានធ្វើការចរចាសម្របសម្រួល ដោយភាគីទាំងពីរមិនចង់មានរឿងវែងឆ្ងាយក៏ព្រមបញ្ចប់រឿងនៅនឹងកន្លែងកើត ដោយភាគីខាងរថយន្តបង្កព្រមយករថយន្តរងគ្រោះទៅជួសជុលធ្វើឲ្យដូចដើមវិញ៕
មតិយោបល់