គ្មានអ្នកណាមិនដឹងថានោះទេ ថាអ្នកនាងស្វែង សុជាតា បានប្រកាសថាខ្លួនបានកើតជំងឺដុះសាច់ក្នុងខួរក្បាលដល់ដំណាក់កាលចុងក្រោយ ហើយបានជាសះស្បើយដោយសារតែថ្នាំខ្មែរបុរាណរបស់គ្រូផ្សំថ្នាំលើភ្នំគូលែន ដែលក្នុងពេលនេះបានក្លាយជាស្វាមីរបស់ខ្លួន។ យ៉ាងណាក៏ដោយប្រភពពីពេទ្យជំនាញម្នាក់បានអះអាងថាអ្នកនាងស្វែង សុជាតា មិនមានជំងឺនោះទេ គឺអ្នកនាងនិយាយកុហក ក្នុងពេលធ្លាក់ខ្លួន ដើម្បីកន្ត្រាក់យកការចាប់អារម្មណ៍ប៉ុណ្ណោះ។

វេជ្ជបណ្ឌិត្យម្នាក់ ដែលអះអាងថាបានព្យាបាលជំងឺរបស់ ស្វែង សុជាតា នៅមន្ទីរពេទ្យរុស្ស៉ី ក្នុងពេលអ្នកនាងមានជំងឺចូលមន្ទីរពេទ្យ បានអះអាងថាអ្នកនាងអត់មានជំងឺដុំសាច់ក្នុងខួរក្បាល ដូចអ្វីដែលបានអះអាងនោះទេ ដោយលោកបញ្ជាក់ថាអ្នកនាងគ្រាន់តែមានជំងឺបាក់ទឹកចិត្តនៅក្នុងពេលនោះប៉ុណ្ណោះ។ លោកថាក្នុងពេលសម្រាកព្យាបាលអត់មានរោគសញ្ញាណាមួយបញ្ជាក់ថាអ្នកនាងមានជំងឺដុះសាច់ក្នុងខួរក្បាលក្នុងដំណាក់កាលចុងក្រោយនោះទេ ហើយប្រសិនបើអ្នកនាងកើតជំងឺនោះមែន គឺមិនមែនគ្រាន់តែផឹកថ្នាំខ្មែរហើយក៏ជាដូចសព្វថ្ងៃនោះទេ។ លោកបានសន្និដ្ឋានថាអ្នកនាងកុហកក្នុងបំណងឲ្យមានការចាប់អារម្មណ៍ ជាពិសេសក្នុងពេលអ្នកនាងធ្លាក់ខូចចិត្តហើយបាក់ទឹកចិត្ត ព្រោះតែស្វាមីដាច់ចិត្តលែងលះ។ ការលើកឡើងនេះ គឺបន្ទាប់ពីអ្នកនាងបានប្រកាសលក់ថ្នាំផ្ដាច់គ្រឿងញៀនបន្ថែមពីលើថ្នាំខ្មែររំលាយដុំសាច់មហារីក ដែលត្រូវបានក្រសួងសុខាភិបាលចោទថាជាមុខរបរបោកប្រាស់។ លោកវេជ្ជបណ្ឌិត្យដដែលបន្តថា បើស្វែង សុជាតា មានជំងឺដុំសាច់ក្នុងខួរក្បាលក្នុងដំណាក់កាលចុងក្រោយ ហើយជាដោយសារតែថ្នាំខ្មែរនោះមែន ប្រហែលជាលើលោកនេះនឹងលែងភ័យបារម្ភចំពោះជំងឺមហារីកទៀតហើយ។ លោកបានសម្ដែងការរិះគន់ដែលស្វែង សុជាតា បានប្រកាសនៅលើហ្វេសប៊ុកជាហូរហែរថាថ្នាំខ្មែរដែលស្វាមីខ្លួនផ្សំឡើងអាចព្យាបាលជំងឺដុំសាច់មហារីក ដែលលោកវេជ្ជបណ្ឌិត្យដដែលនេះបញ្ជាក់ថាជាការផ្សព្វផ្សាយមិនពិត។

យ៉ាងណាមិញ ឆ្លើយតបនឹងការការសង្ស័យនេះ អ្នកនាង ស្វែង សុជាតា ធ្លាប់បានប្រកាសថាថ្នាំខ្មែរដែលផ្សំដោយស្វាមីរបស់ខ្លួន ពិតជាមានប្រសិទ្ធិភាពព្យាបាលជំងឺមហារីក ជំងឺដុំសាច់ និងជំងឺទឹកនោមផ្អែម លើសឈាមប្រាកដមែន។ ប៉ុន្តែអ្នកនាងអ្នកមកជាវថ្នាំនាងមិនសុទ្ធតែមានប្រសិទ្ធិភាពទាំងអស់នោះទេ គឺសម្រាប់តែអ្នកដែលមាននិស្ស័យប៉ុណ្ណោះ។ អ្នកនាងនៅតែអះអាងថាខ្លួនធ្លាប់មានជំងឺដុះសាច់ក្នុងខួរក្បាលធ្ងន់ធ្ងរក្នុងពេលអ្នកនាងកោរត្រងោល តែអ្នកនាងមិនមានឯកសារណាមួយបញ្ជាក់ថាខ្លួនពិតជាមានជំងឺនេះ ក្រៅពីការអះអាងថាមានអ្នកជិតស្និទ្ធិធានានោះទេ ទើបធ្វើឲ្យការលើកឡើងថាអ្នកនាងកុហករឿងកើតជំងឺនេះ ហាក់មានទម្ងន់៕