ព័ត៌មានសិល្បៈ និងកម្សាន្ត

ថៃ នរៈពិទូរ ម្ដាយធ្វើខួបអោយក្នុងគុក

យោងតាមហ្វេសប៊ុករបស់អ្នកស្រីងិន ម៉ារីយ៉ា ជាម្ដាយរបស់អតីតហ្វ្រេស៊ីប៊យ និងជាអតីតតារាសម្ដែង លោកថៃ នរ:ពិទូរ គឺអតីតតារាសម្ដែងរូបនេះបានធ្វើខួបកំណើតក្នុងពន្ធនាគារកាលពីថ្ងៃទី២៦ មេសា ម្សិលមិញ ដោយម្ដាយរបស់លោកបានទិញនំខួបទៅឲ្យលោកផ្លុំដល់ក្នុងគុកតែម្ដងនៅខេត្តបាត់ដំបង។ យ៉ាងណាក៏ដោយ ទិដ្ឋភាពពាក់ព័ន្ធនឹងលោកធ្វើខួបក្នុងពន្ធនាគារមិនត្រូវបានអ្នកស្រីបង្ហោះនោះទេ ដែលអាចថាខាងមន្ត្រីគុកមិនអនុញ្ញាតិឲ្យថតបង្ហោះ។

អ្នកស្រីងិន ម៉ារីយ៉ា ភរិយារបស់លោកថៃ នរសត្យា រដ្ឋលេខាធិការក្រសួងវប្បធម៌ បានបង្ហោះនៅលើហ្វេសប៊ុកថាអ្នកស្រីសុខចិត្តជិះពីភ្នំពេញរហូតដល់រាប់រយគីឡូដើម្បីទៅធ្វើខួបកំណើតឲ្យកូនប្រុសគឺ លោកថៃ នរ:ពិទូរ ដែលបានជាប់ពន្ធនាគារនៅខេត្តបាត់ដំបង។ អ្នកស្រីថាខ្លួនមិនដែលបំភ្លេចកូនប្រុសម្នាក់នេះឡើយ បើទោះជាលោកថៃ នរ:ពិទូរ បានសាងកំហុសធ្វើឲ្យគ្រួសារបាក់មុខបាក់មាត់ម្ដងជាពីរដងព្រោះតែពាក់ព័ន្ធនឹងរឿងជួញដូរគ្រឿងញៀន។ អ្នកស្រីនិយាយថានៅលើលោកនេះគ្មានអ្នកនាងមិនធ្លាប់ខុសនោះទេ សំខាន់គឺមនុស្សខុសហើយចេះកែ អ៊ីចឹងហើយទើបអ្នកស្រីបានចំណាយពេលទៅកាន់ខេត្តបាត់ដំបងចំថ្ងៃកំណើតរបស់លោកថៃ នរ:ពិទូរ ដើម្បីធ្វើខួបឲ្យលោក។ អ្នកស្រីបានបង្ហោះនៅលើហ្វេសប៊ុកកាលពីល្ងាចថ្ងៃទី២៦ មេសាថា «យប់មិញ(២៥ មេសា)ម៉ាក់មិនបានគេងទេ ហើយបើកឡានរាប់រយគីឡូមករកកូនព្រោះថ្ងៃនេះ ជាថ្ងៃដែលម៉ាក់បានបង្កើតកូនប្រុសឲ្យមកស្គាល់ពិភពលោកនេះ….ពិទូរពួកយើងស្រឡាញ់កូនណាស់…កូនប្រុស!ទោះបីជាឆ្នាំនេះពួកយើងកម្សត់ជាងរាល់ឆ្នាំ តែម៉ាក់សប្បាយចិត្ត ព្រោះថាចាប់ពីពេលវេលានេះទៅ កូននិងយល់ដឹង នឹងស្គាល់ពីន័យពិតរបស់ជីវិត….កូនតស៊ូឡើង ដើម្បីអនាគត ….កើតជាមនុស្សគ្មាននរណាមិនចេះខុសទេ សំខាន់ ខុសហើយកូនត្រូវកែខ្លួនបែរមករកផ្លូវត្រូវវិញ…អត់ធ្មត់ណាកូន ក្រុមគ្រួសារយើង ព្រមទាំងមនុស្សជាច្រើននៅស្រឡាញ់កូន នឹងរង់ចាំផ្លូវកូនត្រឡប់មកវិញ ពេញដោយ លក្ខណសម្បត្តិជាកូនប្រុស ដ៏ថ្លៃថ្នូរ ជាសរសរទ្រូងគ្រួសារ ជាកូនល្អ ជាបងល្អ ជាប្ដីល្អ នឹងជា ឪពុកល្អ ណា៎កូនណា៎!!!»។

គួរបញ្ជាក់ផងដែរ លោកថៃ នរ:ពិទូរ ត្រូវបានប៉ូលិសខេត្តបាត់ដំបងចាប់ខ្លួនពីបទផលិត និងចែកចាយគ្រឿងញៀនជាមួយបក្សពួក និងភរិយា ដោយត្រូវតុលាការខេត្តបាត់ដំបងកាត់ទោសឲ្យជាប់ពន្ធនាគារជាមួយបក្សពួកច្រើននាក់។ ក្រោយអតីតហ្វ្រេស៊ី និងជាតារាសម្ដែងរូបនេះត្រូវប្រកាសឲ្យជាប់ពន្ធនាគារ មានមនុស្សជាច្រើនបានបង្ហាញអារម្មណ៍អាណិតចំពោះអ្នកស្រីងិន ម៉ារីយ៉ា ម្ដាយរបស់លោក បន្ទាប់ពីឃើញអ្នកស្រីបង្ហោះសារកើតទុក្ខរាល់ថ្ងៃ ដោយធ្លាប់បានបង្ហោះថាចង់ស្លាប់នោះផង ព្រោះតែខ្មាស់ចំពោះអ្វីដែលលោកពិទូរជាកូនបានធ្វើ។ យ៉ាងណាមិញ អ្នកស្រីនៅតែអត់ទោស និងផ្ដល់កម្លាំងចិត្តឲ្យកូនប្រុស តាមរយ:ស្កាត់ទៅធ្វើខួបឲ្យកូនដល់ក្នុងគុកដើម្បីបង្ហាញពីក្ដីស្រឡាញ់៕

មតិយោបល់