ក្នុងចំណោមភាពយន្តខ្នាតធំ គេកត់សម្គាល់ថាភាពយន្តរឿង«ផ្អើលភូមិ» គឺមិនមានបញ្ចេញព័ត៌មានណាមួយទាល់តែសោះ ទាំងពេលក្រុងពាលី និងពេលចេញថត។ អ៊ីចឹងហើយទើបរឿងមួយនេះ ត្រូវបានគេចាប់អារម្មណ៍តែម្ដង ក្នុងពេលស្ងាត់ៗក៏ចេញ Trailer បង្អើលមហាជន និងត្រូវបានប្រកាសថា នឹងដាក់បញ្ចាំងលក់សំបុត្រផ្លូវការនៅចុងខែតុលានេះ។

យោងតាមការប្រកាសរបស់ក្រុមហ៊ុន ពូព្រហ្ម ដែលជាក្រុមហ៊ុនចែកចាយភាពយន្តនៅតាមរោងកុននៅស្រុកខ្មែរ បានអះអាងថា ក្រុមហ៊ុនមួយនេះ នឹងនាំភាពយន្តមួយថ្មី ដែលជាចំណីអារម្មណ៍កម្សាន្តក្អាកក្អាយ ក្រោមចំណងជើងថា«ផ្អើលភូមិ» យកមកបញ្ចាំងនៅតាមកុនទំនើបនៅថ្ងៃទី២៧ តុលាខាងមុខ។ នេះជារឿងបែប កំប្លែង ភ័យរន្ធត់ ដែលជាការផលិតរបស់ផលិតកម្ម«រស្មីតាន់តាន់» បន្ទាប់ពីផលិតកម្មមួយនេះ ទទួលបានជោគជ័យក្នុងការផលិតរឿង «អង្គរក្សស្រី»នាពេលកន្លងមក។ លោក ស៊ុ ស៊ីថែន អ្នកចាត់ការទូទៅ របស់ក្រុមហ៊ុន«ពូព្រហ្ម» បានអះអាងថា ភាពយន្តខ្នាតធំរឿង«ផ្អើលភូមិ» គឺជារឿងដែលមានលក្ខណ:ទាក់ទាញ ដោយលោករំពឹងថា នឹងក្លាយជាភាពយន្តបង្អើលអារម្មណ៍ទស្សនិកជនដ៏ល្អមួយ ដែលមានរសជាតិរន្ធត់ សប្បាយ និងមានឈុតឆាកហួសចិត្តជាច្រើននៅក្នុងផ្ទៃរឿង។

លោកថា «ពូព្រហ្ម» មើលឃើញពីចំណុចទាក់ទាញរបស់ភាពយន្តមួយនេះ ទើបក្រុមហ៊ុនសម្រេចចិត្តទទួលសិទ្ធិចែកចាយ បន្ទាប់ពីពូព្រហ្ម បានពង្រីកការចាយភាពយន្តជាច្រើន ដោយក្រៅពីបានវាយលុកនៅតាមរោងភាពយន្តទំនើបៗនៅរាជធានីភ្នំពេញ និងសៀមរាប ក៏បានបន្តចែកចាយទៅរោងភាពយន្តនៅខេត្តបន្ទាយមានជ័យ និងប៉ោយប៉ែត។ ដោយឡែកសម្រាប់ភាពយន្តរឿង«ផ្អើលភូមិ»ក៏នឹងត្រូវរៀបចំដាក់បញ្ចាំង នៅខេត្តបាត់ដំបង ក្រុងព្រះសីហនុ និងកោះកុង ក្នុងពេលស្របគ្នាផងដែរ។

ភាពយន្តនេះសម្ដែងដោយតារាល្បីៗដូចជា លោកខាត់ វ៉ៃហាំង កញ្ញា ស៊ិន សក្កដា លោក ភីម៉ៃ នាយសាយចៃ កញ្ញា ឆុំ វីកាន់ណាដា លោក ប៉េង វុទ្ធី និងកីឡាប្រដាល់ លោក អេ ភូថង។ ភាពយន្តនេះបានសំដៅពី ប៉ូលិសថ្នាក់អនុសេនីយឯកមួយរូប ដែលបានចេញបេសកកម្ម ទៅកាន់ភូមិដាច់ស្រយ៉ាល ហើយក្រោយពេលទៅដល់ទីនោះ លោកក៏បានស្រលាញ់អ្នកគ្រូក្រមុំម្នាក់នៅទីនោះ ដែលនាងគឺជាកូនថៅកែធំ មានជំនាញខាងកៀបសង្កត់ និងរឹបអូសទ្រព្យអ្នកភូមិ។ មិនយូរប៉ុន្មានលោកប៉ូលិស ក៍ប៉ះសំដីជាមួយលោកថៅកែបង្កជាជំលោះ។ ថ្ងៃមួយក្នុងភូមិមានមនុស្សស្រីម្នាក់លង់ទឹកស្លាប់ទាំងពោះធំ លោកថៅកែក៏ចេញទៅយកខ្លាញ់ខ្មោចនោះ មកធ្វើអាគមក្នុងបំណងធ្វើបាបអ្នកភូមិ ដែលគាំទ្រលោកប៉ូលិស និងលោកប៉ូលិសផ្ទាល់។ បន្តបន្ទាប់មកខ្មោចនោះ ក៏ចេញលងផ្អើលភូមិ ព្រោះតែចង់សងសឹកលោកថៅកែ ដែលមកយារយីខ្លួន។ លោកស៊ុម ស៊ីថែន បញ្ជាក់ថា ចង់ដឹងថាភាពយន្តមួយនេះ មានការលងបន្លាចពីខ្មោចស្រីលង់ទឹកយ៉ាងណា គឺមានតែការលក់សំបុត្រនៅថ្ងៃទី២៧ តុលាប៉ុណ្ណោះ ទើបអាចស្រាយចម្ងល់៕