កាលពីល្ងាចថ្ងៃម្សិលមិញ តារាសម្ដែងកញ្ញា សុគន្ធ និសា បានធ្វើពិធីសំពះផ្ទឹមសូត្រមន្តក្នុងពិធីមង្គលការហើយ ដោយក្នុងថ្ងៃនេះ នាង និងស្វាមី នឹងធ្វើពិធីទទួលភ្ញៀវនៅក្នុងមង្គលការរបស់ខ្លួន រហូតហូត៧០០នាក់តែម្ដង នៅក្នុងសណ្ឋាគារលំដាប់ផ្កាយ៥សូហ្វីតែលភ្នំពេញ។ យ៉ាងណាមិញ មានការបញ្ជាក់ថា ពិធីមង្គលការរបស់នាង ត្រូវបានអញ្ជើញតែអ្នកសិល្ប:ស្និទ្ធស្នាលៗមិនច្រើននោះទេ ដោយភាគច្រើន គឺតែអ្នកជំនួញដែលជាភ្ញៀវរបស់ស្វាមីនាងប៉ុណ្ណោះ ទើបមង្គលការនេះ ត្រូវបានគេអះអាងថា មិនបើកចំហរសម្រាប់ការចូលថតរូបឆ្វេកឆ្វាច នៅក្នុងសាលប្រារព្ធពិធី។

លោកសាវិន ហ្វីលីព ដែលបានប្រកាសនៅលើហ្វេសប៊ុកថា ត្រូវខកខានមិនបានទៅចូលរួមក្នុងពិធីមង្គលការរបស់នាងបានថ្លែងប្រាប់ថា បើតាមដឹងមង្គលការរបស់ សុគន្ធ និសា ត្រូវបានស្វាមីរបស់នាងអញ្ជើញអ្នកមុខអ្នកមាត់ច្រើនជាង ដោយអ្នកសិល្ប: គឺនាងបានជូនលិខិតត្រឹមតែមួយចំនួនតូចប៉ុណ្ណោះ។ លោកថាសុគន្ធ និសា បានប្រាប់លោកថា រៀបចំប្រមាណជា៧០តុ ហើយពិធីមង្គលការនាងលោកមិនបានដឹងថាតើនឹងបើកចំហរឲ្យអ្នកសារព័ត៌មានបានចូលថតខាងក្នុង ឬក៏អត់នោះទេ ដោយសារតែក្នុងថ្ងៃទទួលភ្ញៀវនោះ គឺលោកត្រូវចេញទៅថតនៅក្នុងប្រទេសថៃ ហើយឲ្យកូនស្រីទៅហូបការជំនួស។

លោកសម្ដែងអារម្មណ៍សោកស្ដាយដែលមង្គលការរបស់សុគន្ធ និសា ដែលជាតួអង្គកូនស្រីរបស់លោក និងភរិយា ក្នុងរឿង«សិសិរដូវក្នុងបេះដូង»ត្រូវបានខកខាន តែលោកក៏បានជូនពរនាង និងបានប្រកាសថា បានចាត់តំណាងឲ្យទៅចូលរួមរួចហើយ។ យោងតាមលិខិតអញ្ជើញ សុគន្ធ និសា និងស្វាមីដែលត្រូវគេស្គាល់ថា អាណិកជននៅអាមេរិក និងជាម្ចាស់ភាគហ៊ុនធំមួយរបស់ក្រុមហ៊ុនធានារ៉ាប់រង Manulife បានជ្រើសយកកន្លែងរៀបការ នៅក្នុងសណ្ឋាគារលំដាប់ផ្កាយ៥សូហ្វីតែលភ្នំពេញ ដោយគ្រោងចំណាយក្នុងពិធីមង្គលការ រហូតដល់១០ម៉ឺនដុល្លារ ដោយមិនរាប់បញ្ចូលការចំណាយលើគម្រោងចេញក្រេបច័ន្ទទឹកឃ្មុំ លើកោះប្រណិតមួយនៅឡើយ។ នាង និងស្វាមី គឺជាគូស្នេហ៍ដែលមានការតាមដាន និងចាប់អារម្មណ៍យ៉ាងលើសលប់ ក្រោយពេលមានការបង្ហើបប្រាប់ជាសាធារណ: ជាពិសេសក្នុងពេលដែលមុខមាត់ស្វាមី របស់នាងត្រូវបានបង្ហាញ ហើយគេកត់សម្គាល់ថា លោកជាបុរសសង្ហារនៅក្មេង មិនចាស់ គឺសមនឹងសម្រស់របស់នាង។

យ៉ាងណាមិញ គេមិនទាន់ដឹងថាក្រោយពេលរៀបការតើវាសនាការប្រឡូកសិល្ប:របស់នាង នឹងត្រូវឲ្យបន្តឲ្យពេញទំហឹង ឬដកថយដូចគ្នា នឹងតារាចម្រៀងអ្នកនាង គឹម លក្ខិណា ក្នុងពេលដែលស្វាមីរបស់នាងហាក់ចង់ឲ្យនាងប្រឡូក ក្នុងអាជីពជំនួញច្រើនជាងការងារច្រៀងរាំ៕