តាំងពីថ្ងៃទី៦ មករា មកម្ល៉េះ ដែលតារាសម្ដែងប្រចាំផលិតកម្មចក្រវាទ្ប លោក ថៃ ប៊ុននាង បានបួសជាព្រះសង្ឃ ដោយលោកបានគង់នៅក្នុងវត្តអន្លុងបេង នៅលើភ្នំស្រង់ក្នុងខេត្តកំពង់ស្ពឺ យ៉ាងស្ងប់ស្ងាត់។ មានហេតុផល៣ ដែលលោកសម្រេចចិត្តបួសបែបនេះ ខណ:ដែលលោកក៏បានបោះបង់ការសិល្ប: និងការគ្រប់គ្រងផលិតកម្មចក្រវាទ្បរហូតដល់មួយខែឯណោះ ដើម្បីជ្រះថ្លានៅក្នុងវិស័យព្រះពុទ្ធសាសនានេះ។

លោកថៃ ប៊ុននាង បានអះអាងមុនពេលសាងផ្នួសជាព្រះសង្ឃថា លោកមានបំណងចង់បួសបែបនេះជាយូរមកហើយ ទើបលោកសម្រេចចិត្តសាងផ្នួសតែម្ដង ដោយគ្រាន់តែម្ដាយបង្កើតរបស់លោកបានធូរស្បើយពីជំងឺ ដោយកាលពីមុនគឺម្ដាយរបស់លោកមានការធ្វើទុក្ខធ្ងន់ធ្ងរដោយជំងឺចាស់មួយចំនួន។ លោកបានសម្រេចចិត្តសាងផ្នួសនៅវត្តភ្នំស្រង់ បន្ទាប់ពីបានឧស្សាហ៍ចេញចូលវត្តនោះ ហើយជឿជាក់ថាបារមីរបស់វត្តនោះនឹងជួយឲ្យលោកបានបុណ្យកុសល ហើយបានរួចរំដោះនូវភាពហ្មងសៅដែលធ្លាប់យាយី។

មុនពេលសាងផ្នួសលោកបានបង្ហោះពីភាពស្មុគស្មាញជាច្រើនដោយលោកធ្លាប់តែបានប្រកាសជាសាធារណ: ស្ថិតក្នុងភាពអស់សង្ឃឹមទាំងរឿងសិល្ប: ទាំងការងារ និងរឿងរ៉ាវគ្រួសារនោះផង។ លោករមែងប្រកាសពីគម្រោងត្រូវតែបួស ដោយលោកប្រកាសថាមានតែផ្លូវសាងផ្នួសប៉ុណ្ណោះ ដែលធ្វើឲ្យអារម្មណ៍របស់ស្ងប់ស្ងាត់មួយរយភាគរយផងដែរ។
អ៉ីចឹងទើបម្នាក់ៗមានការកោតសរសើរដែលលោកបានសម្រេចចិត្តសាងផ្នួសតាមការចង់បាន ដោយលោកនឹងបួសរហូតដល់១ខែឯណោះ ដើម្បីឲ្យលោកកាន់តែមានពេលវេលាគ្រប់គ្រាន់ជាមួយនឹងព្រះពុទ្ធសាសនា។

លោកថៃ ប៊ុននាង មានសង្ឃដីកាក្រោយពេលបួសជាសង្ឃថា លោកសម្រេចចិត្តបួសដោយសារតែហេតុផល៣ គឺបួសសងគុណឲ្យម្ដាយ បួសលាបំណន់ដោយសារតែលោកបានស្បថថានឹងបួសមុខព្រះពុទ្ធប្រសិនបើម្ដាយរបស់លោកដែលធ្លាក់ខ្លួនឈឺធ្ងន់បានជាសះស្បើយ និងបួសដើម្បីឲ្យជ្រះថ្លាក្នុងព្រះពុទ្ធសាសនា និងដើម្បីបានបុណ្យកុសល។ លោកថាហេតុទាំង៣នេះ បានជំរុញឲ្យលោកនៅមិនសុខ ហើយសម្រេចចិត្តទម្លាក់ចោលការងាររហូតដល់មួយខែតែម្ដង ដើម្បីសម្ងំក្នុងព្រះពុទ្ធសាសនា បើទោះជាលោកមានការរវល់ស្ទើរតែដកខ្លួនមិនរួច។ រំលឹកដល់ទិដ្ឋភាពក្នុងថ្ងៃសាងផ្នួស បើទោះជាពេលនោះពិធីសាងផ្នួសរបស់លោកមិនត្រូវបានធ្វើឡើងធំដុំ ដោយមានតែសាច់ញាតិ និងមិត្តភក្តិក្នុងសិល្ប: តែប៉ុន្មាននាក់ចូលរួម ប៉ុន្តែគេឃើញលោកមានទឹកចិត្តរំភើប និងសប្បាយរីករាយ។

ជាមួយនឹងការសម្រេចចិត្តរបស់លោក បានធ្វើឲ្យអ្នកគាំទ្រជាច្រើនមានការកោតសរសើរចំពោះលោក ជាពិសេសនៅពេលដែលបានដឹងថាលោកសម្រេចចិត្តបួសរហូតដល់១ខែពេញ ខណ:ដែលលោកគឺជាតារាដែលមានទីផ្សារ និងមានការងារសម្ដែងស្ទើរមិនមានពេលសម្រាក ដែលមិនងាយតារាណាម្នាក់លះបង់បោះបង់ការងារហើយរត់ទៅបួសកើតដូចលោក។ លោកថៃ ប៊ុននាង នៅតែប្រកាសថានឹងវិលត្រលប់មកក្ដោបក្ដាប់ការងារសិល្ប:ដូចដើម បន្ទាប់ពីលោកលាព្រះផ្នួសនៅដើមខែកុម្ភ:ខាងមុខ៕