គ្មានអ្នកណាមិនកោតសរសើរនោះទេ បន្ទាប់ពីលោកបញ្ញា សិទ្ធិ ត្រូវបានជ្រើសជាពិធីករតំណាងឲ្យប្រទេសកម្ពុជានៅក្នុងព្រឹត្តិការណ៍អន្តរជាតិធំមួយ ដែលប្រទេសចិនធ្វើជាម្ចាស់ផ្ទះក្នុងការប្រគំតន្ត្រី និងបង្ហាញវប្បធម៌ស្ដីពីប្រទេសក្នុងតំបន់ទន្លេមេគង្គ កាលពីចុងឆ្នាំ២០១៧កន្លងទៅ។

ដោយឡែកនៅថ្ងៃទី១២ មករានេះ លោកត្រូវបានជ្រើសឲ្យធ្វើជាតំណាងប្រទេសកម្ពុជា ក្នុងនាមជាពិធីករបែបនេះដូចគ្នានៅក្នុងប្រទេសថៃទៀតហើយ ដើម្បីបង្ហាញខ្លួននៅលើវេទិកាជាមួយនឹងពិធីករវៀតណាម និងពិធីកររបស់ម្ចាស់ផ្ទះគឺថៃ នៅក្នុងព្រឹត្តិការណ៍ស្ដីពីសេដ្ឋកិច្ចកម្ពុជា ថៃ និងវៀតណាមប្រចាំឆ្នាំ២០១៨។

យោងតាមទម្លាយឲ្យដឹងគឺប្រទេសកម្ពុជា នឹងចូលរួមនៅក្នុងព្រឹត្តិការណ៍សេដ្ឋកិច្ចកម្ពុជាវៀតណាមថៃ ចាប់ពីថ្ងៃ ១២ រហូតដល់ថ្ងៃទី១៦ ខែមករា ក្នុងឆ្នាំ២០១៨ ដោយលោក បញ្ញា សិទ្ធិ ត្រូវបានគេជ្រើសជាពិធីករតំណាងឲ្យប្រទេសកម្ពុជា បន្ទាប់ពីលោកមានក្រេឌីតក្នុងនាមជាពិធីករនៅលើវេទិការបស់ប្រទេសចិនកាលពីមុន ហើយត្រូវបានគេសរសើរថាអត្ថាធិប្បាយបានល្អ ដោយអាចទាំងនិយាយភាសាថៃ និងអង់គ្លេសឆ្លងឆ្លើយជាមួយពិធីករពិធីការិនីរបស់ថៃ និងរបស់ប្រទេសផ្សេងនៅលើឆាកបានផង។

លោកនឹងបង្ហាញខ្លួនក្នុងនាមជាពិធីករតំណាងឲ្យកម្ពុជា នៅលើឆាកតន្ត្រីធំមួយរបស់ប្រទេសថៃ ដោយនៅលើវេទិកានោះត្រូវបានបញ្ជាក់ថានឹងមានតែពិធីករពិធីការិនី៣ប្រទេសប៉ុណ្ណោះ គឺ ថៃ វៀតណាម ហើយលោកគឺជាតំណាងរបស់កម្ពុជា។
នេះជាព្រឹត្តិការណ៍ដែលក្រសួងសេដ្ឋកិច្ចរបស់ប្រទេសទាំង៣ចូលរួម ហើយលោកគឺត្រូវបានទាំងក្រសួង និងក្រុមហ៊ុនឯកជនដែលជាអ្នកជ្រោមជ្រែងកម្មវិធីពេញចិត្តកំណត់ជ្រើសរើស ដែលនេះគឺមិនមែនជារឿងចៃដន្យនោះទេ តែជារឿងដែលលោកទទួលបានឱកាសបន្ទាប់ពីសមត្ថភាពរបស់លោកត្រូវបានកត់សម្គាល់ក្នុងនាមជាពិធីករ ទាំំងនៅក្នុងស្រុក និងលើឆាកអន្តរជាតិ។

លោកបញ្ញា សិទ្ធិ និយាយថាលោកមិនបានដឹងថាហេតុផលអ្វីទើបលោកត្រូវបានជ្រើសឲ្យធ្វើជាពិធីករជាថ្មីម្ដងទៀត នៅក្នុងប្រទេសថៃ នៅក្នុងព្រឹត្តិការណ៍សេដ្ឋកិច្ចកម្ពុជា ថៃ និងវៀតណាម ចាប់ពីថ្ងៃទី១២ រហូតដល់ថ្ងៃទី១៦ មករា នោះទេ ប៉ុន្តែលោកថាគណ:កម្មការកម្មវិធីតំណាងឲ្យប្រទេសកម្ពុជាគឺជាអ្នកជ្រើសយក និងថាដោយសារតែពេញចិត្តនឹងសមត្ថភាពរបស់លោក។ លោកថា ប្រហែលមកពីក្នុងពេលលោកបង្ហាញខ្លួនជាពិធីករនៅក្នុងប្រទេសចិន មានការកត់សម្គាល់ពីសមត្ថភាព និងទេពកោសល្យរបស់លោកពីសំណាក់ក្រសួង ទើបការចូលរួមក្នុងព្រឹត្តិការណ៍អន្តរជាតិនៅក្នុងប្រទេសលើកនេះ ក៏ត្រូវបានជ្រើសលោកជាថ្មីម្ដងទៀត។

ជាមួយនឹងឱកាសបានក្បាលមេក្រូនៅលើឆាកតន្ត្រីនៅក្នុងប្រទេសថៃលើកនេះ លោក បញ្ញា សិទ្ធិ កាន់តែមានទីផ្សារពិធីករតែម្ដង បន្ទាប់ពីការងារក្នុងស្រុក ជាពិសេសគឺកម្មវិធីសម្ពោធក្លិបធំៗ គឺលោករមែងបង្ហាញខ្លួនប្រចាំ បន្ថែមពីលើភាពជោគជ័យក្នុងអាជីពជាតារាសម្ដែង និងតារាចម្រៀងផងដែរនោះ៕