មកទល់ពេលនេះ មានការទម្លាយចេញពីក្រុមផលិតករកាន់តែច្រើន ថាតារាចម្រៀងលោក ឆាយ វិរ:យុទ្ធ រមែងច្រានចោលមិនទទួលច្រៀងវិញ បន្ទាប់ពីលោកទទួលច្រៀងហើយ ហើយឃើញរូបថតរបស់លោកនៅលើប៉ាណូ ដែលជាការផ្សព្វផ្សាយសម្រាប់កម្មវិធីតូចជាង ឬដាក់នៅពីក្រោយតារាណាម្នាក់ដែលលោកយល់ថាមិនសម។ ដំណឹងនេះបានបែកធ្លាយចេញពីផលិតករ២ស្ថាប័នហើយ ប៉ុន្តែដំណោះស្រាយក៏រមែងធ្វើតាមសំណូមពររបស់លោកផងដែរ ដោយមិនឈានដល់ការចម្រូងចម្រាស់ ហើយលុបកម្មវិធីលោកត្រូវច្រៀងនោះទេ។

ប្រភពពីទូរទស្សន៍PNN បានអះអាងថា លោកឆាយ វិរ:យុទ្ធ បានប្រតិកម្មមិនឡើងឆាកតន្ត្រីរបស់ស្ថាប័ននេះនោះទេកាលពីប៉ុន្មានសប្ដាហ៍មុន ដោយសារតែហេតុផលដាក់រូបលោកតូចជាងតារាចម្រៀង កញ្ញា មាស សុខសោភា ហើយធ្វើឲ្យលោកមិនពេញចិត្ត។ ប្រភពនោះព្រលយថា ដោយសារតែការតវ៉ា ហើយគ្មានដំណោះស្រាយទើបលោកត្រូវអាក់ខាននៅក្នុងកម្មវិធីតន្ត្រីរបស់PNN តែអ្វីដែលបានលើកឡើងមិនត្រូវបានបកស្រាយពីសមីខ្លួន ឬពីម្ចាស់កម្មវិធីដែលគេបានទម្លាយនោះទេ។

យ៉ាងណាមិញស្រដៀងគ្នានេះ នៅប៉ុស្ដិ៍លេខ៥ឯណេះវិញ ក៏បានលើកឡើងថាលោក បានប្រតិកម្មនឹងការដាក់រូបលោកនៅលើប៉ាណូក្រោយលោកខាន់ជេមស៍ និងតូចជាងតារាមួយចំនួនដូចគ្នាផងដែរ ដោយខាងប៉ុស្ដិ៍លេខ៥ បានអះអាងថានឹងយល់ព្រមធ្វើប៉ាណូថ្មី ដើម្បីតម្រូវចិត្តរបស់លោកផង។ ករណីបែបនេះ គេធ្លាប់តែបានឮចេញពីតារាចម្រៀងលោក ខេមរ: សិរីមន្ត ដែលមិនព្រមឡើងឆាក ព្រោះតែដាក់តាំងរូបរបស់លោកតូចជាងលោកព្រាប សុវត្ថិខ្លាំងកាលពីប៉ុន្មានឆ្នាំមុនប៉ុណ្ណោះ ប៉ុន្តែនៅក្រោយៗមកកំហុសបច្ចេកទេសលើការតាំងប៉ាណូតារាក៏ត្រូវដោះស្រាយ ហើយមិនធ្លាប់ឮតារាចម្រៀងលោក ខេមរ: សិរីមន្ត ឬលោកព្រាប សុវត្ថិ ផ្ទុះដំណឹងបែបនោះទៀតទេ។

អ៊ីចឹងហើយទើបជាការភ្ញាក់ផ្អើលមួយ បន្ទាប់ពីមានការទម្លាយថាលោក ឆាយ វិរ:យុទ្ធ ក៏មានជំហរបែបនោះដូចគ្នា ដែលករណីនេះត្រូវបានអ្នកខ្លះរិះគន់ តែក៏មានអ្នកខ្លះយល់ថាលោកឆាយ វិរ:យុទ្ធ ក៏មិនគួរតាំងរូបឲ្យតូចជាងតារាមួយចំនួន បើទោះជាក្នុងប៉ាណូនោះប្រជុំដោយលោកព្រាប សុវត្ថិ អ្នកនាងពេជ្រ សោភា និងកញ្ញា ឱក សុគន្ធកញ្ញា ជាដើម។

ផលិតករច្រើនរូបបានបង្ហាញការស្មុគស្មាញក្នុងការរៀបចំធ្វើប៉ាណូរបស់តារា បន្ទាប់ពីតារាច្រើនឡើងរមែងទាមទារឲ្យដាក់រូបរបស់ខ្លួននៅចំកណ្ដាលគេ និងឲ្យលេចធ្លោរជាងគេ ក្នុងការផ្សព្វផ្សាយ។ នៅក្នុងពិភពសិល្ប: បញ្ហាបែបនេះកើតឡើងជាញឹកញាប់ ប៉ុន្តែគេកត់សម្គាល់ថាមានតែតារាចម្រៀងប៉ុន្មានរូបប៉ុណ្ណោះ ដែលឃើញប៉ាណូត្រូវបានដាក់តាំងរួចហើយហើយមិនពេញចិត្ត គឺសុខចិត្តមិនឡើងច្រៀង។ យ៉ាងណាក៏ដោយ គេនៅតែមិនទាន់ទទួលបានការឆ្លើយតបពីសាមីខ្លួន គឺលោកឆាយ វិរ:យុទ្ធ ពាក់ព័ន្ធនឹងការទម្លាយចេញពីក្រុមការងាររបស់ទូរទស្សន៍ PNN និងប៉ុស្ដិ៍លេខ៥ នេះនៅឡើយទេ៕