ព័ត៌មានជាតិ

ឃាត់ខ្លួនមុខសញ្ញាជួញដូរគ្រឿងញៀនម្នាក់ ដកហូតថ្នាំបាន៨កញ្ចប់

បាត់ដំបង: ដោយអនុវត្តតាមបទបញ្ជារបស់ លោកឧត្តមសេនីយ៍ទោ ស ថេត ស្នងការននគរបាលខេត្តបាត់ដំបង និងដោយមានគោលការណ៍ឯកភាពពីលោក នួន សាន ព្រះរាជ្ញាអមសាលាដំបងខេត្តបាត់ដំបង ក្នុងយុទ្ធនាការប្រឆាំងបទល្មើសគ្រឿងញៀននោះ លោកវរសេនីយ៍ត្រី អៀម ទិត្យ អធិការស្រុកបវេល បានដឹកនាំកម្លាំង ចុះប្រតិបត្តិការជាមួយកម្លាំងនគរបាលប៉ុស្តិ៍រដ្ឋបាលបវេល បង្ក្រាបករណីជួញដូរ ដឹកជញ្ជូន រក្សាទុកនូវសារធាតុញៀនហាមឃាត់ខុសច្បាប់មួយករណីក្នុងបទល្មើសជាក់ស្ដែង។

ការចាប់បង្រ្កាបនេះបានធ្វើឡើងកាលពីវេលាម៉ោង៣និង៣០នាទីរសៀល ថ្ងៃទី២៥ ខែមេសា ឆ្នាំ២០១៧ នៅចំណុច មាត់ស្ទឹង ក្នុងដីចម្ការមួយកន្លែងរបស់ឈ្មោះ អួច យ៉ាន ស្ថិតក្នុងភូមិស្លរខ្លាញ់ ឃុំបវេល ស្រុកបវេល ខេត្តបាត់ដំបង។

សមត្ថកិច្ចបានឲ្យដឹងថា ជនសង្ស័យមានឈ្មោះ ឡូ វីឡា ភេទប្រុស អាយុ២៦ឆ្នាំ ស្នាក់នៅភូមិគោក ឃុំបវេល និងបានដកហូតវត្ថុតាង រួមមានគ្រឿងញៀន ប្រភេទមេតំហ្វេតាមិន(ICE)ចំនួន៨កញ្ចប់តូច មិនដឹងទម្ងន់។ និងបានដកហូតសម្ភារ:ពាក់ព័ន្ធមួយចំនួនទៀត។

បន្ទាប់ពីទទួលបានការចម្លើយសារភាពរបស់ជនសង្ស័យរួច ជំនាញអធិការដ្ឋាននគរបាលស្រុក កំពង់រៀបចំសំណុំរឿងបញ្ជូនមកកាន់ស្នងការដ្ឋាននគរបាលខេត្តបាត់ដំបងដើម្បីចាត់វិធានការបន្ត៕

មតិយោបល់