ភ្នំពេញ: បុរស២នាក់បានរងរបួសធ្ងន់ធ្ងរ ហើយម្នាក់ត្រូវបានគេបញ្ជូនទៅកាន់គ្លីនិកឯកជន និងម្នាក់ទៀតត្រូវបានបញ្ជូនទៅកាន់មន្ទីររពេទ្យព្រះកុសុម: ដើម្បីសង្គ្រោះបន្ទាន់ភ្លាមៗ បន្ទាប់ពីពួកគេជិះម៉ូតូម្នាក់១គ្រឿងក្នុងទិសដៅបញ្រ្ចាសគ្នាបន្ទាប់មកមានម្នាក់ឆ្លងផ្លូវ ក៏បានបុកគ្នាពេញទំហឹងតែម្ដង។

ហេតុការណ៍គ្រោះថ្នាក់ចរាចរណ៍ បានកើតឡើងកាលពីវេលាម៉ោង៣និង១០នាទីរសៀល ថ្ងៃទី២៦ ខែមេសា ឆ្នាំ២០១៧ នៅលើកំណាត់ផ្លូវវ៉េងស្រេង ត្រង់ចំណុចជិតអតីតបញ្ជរបង់ប្រាក់ មុខផ្សារចោមចៅ ស្ថិតនៅក្នុងភូមិព្រៃជីសាក់ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។

ម៉ូតូទាំង២គ្រឿងដែលបើកបុកគ្នានោះ ១គ្រឿងម៉ាកស៊ុយហ្ស៊ុយគីវីវ៉ា ពណ៌ខ្មៅ ពាក់ស្លាក់លេខភ្នំពេញ1J -3957បើកបរដោយបុរសមិនស្គាល់ឈ្មោះម្នាក់រងរបួសធ្ងន់ ប៉ុន្តែប្រហែលជាមិនដល់បាត់បង់ជីវិតឡើយ។ ចំណែកម៉ូតូ១គ្រឿងទៀតម៉ាកស៊ីទីសេ១០០កូរ៉េ ពណ៌ក្រហម ពាក់ស្លាកលេខ តាកែវ1C- 5734 និងបើកបរដោយបុរសម្នាក់ រងរបួសធ្ងន់ធ្ងរនិងសង្ស័យអាចស្លាប់បាត់បង់ជីវិតទៀតផង។

តាមប្រភពព័ត៌មានបានឲ្យដឹងថា មុនពេលកើតហេតុ ម៉ូតូទាំង២គ្រឿងនោះបានបើកបរក្នុងទិសដៅបញ្រ្ចាសគ្នា ដោយម៉ូតូម៉ាកស៊ុយសាគីវីវ៉ា បានបើកបរធ្វើដំណើរក្នុងទិសដៅពីជើងទៅត្បូង។លុះមកដល់ត្រង់ចំណុចកើតហេតុខាងលើ ក៏បានវាក់ជាមួយម៉ូតូម៉ាកស៊ីទីសេ១០០កូរ៉េ ពណ៌ក្រហម បើកបរក្នុងទិសដៅបញ្ច្រាសគ្នា រួចបត់ឆ្លងផ្លូវក៏បានបុកគ្នាពេញទំហឹងតែម្ដង បណ្តាលឲ្យម៉ូតូទាំង២គ្រឿងគរលើគ្នា។

ក្រោយពេលកើត នគរបាលការិយាល័យចរាចរផ្លូវគោកនៃស្នងការដ្ឋានរាជធានីភ្នំពេញចុះទៅធ្វើការវាស់វែងនិងនាំយកម៉ូតូទាំង២គ្រឿងនោះទៅរក្សាទុករង់ចាំការដោះស្រាយនៅពេលក្រោយ៕