ព័ត៌មានជាតិ

Update:ព្រឹកនេះ! បញ្ជូនបុគ្គលិកការ៉ាស់សាំង សេង រស្មី ម្នាក់កឹបកេងលុយសរុបជិត៤លានទៅតុលាការ

កណ្តាល: នៅព្រឹកថ្ងៃទី២៨ ខែមេសា ឆ្នាំ២០១៧ កម្លាំងការរិយាល័យព្រហ្មទណ្ធកម្រិតស្រាលនៃស្នងការដ្ឋាននគរបាលខេត្តកណ្តាល បានបញ្ជូនបុគ្គលិកការ៉ាស់សាំង សេង រស្មី ម្នាក់កឹបកេងលុយសរុបជិត៤លានមកតុលាការ ដើម្បីបន្តរនិតិវិធីទៅតាមផ្លូវច្បាប់។

ខណ:នេះដែរ ជនសង្ស័យកំពុងនៅក្រោមការសាកសួររបស់តំណាងអយ្យការសាលាដំបូងខេត្តកណ្តាល។

សូមបញ្ជាក់ថា ជនសង្ស័យម្នាក់ ត្រូវបានថៅកែរបស់ខ្លួន ប្តឹងសមត្ថកិច្ចឲ្យចាប់ខ្លួន ក្រោយពីជនសង្ស័យរូបនេះ បានធ្វើសកម្មភាពរំលោភលើទំនុកចិត្ត យកលុយរបស់ថៅកែ ទៅចាយវាយក្នុងហោប៉ៅខ្លួនឯង ជាច្រើនដង។

ការចាប់ខ្លួននេះបានធ្វើឡើងកាលពីវេលាម៉ោង៣រសៀល ថ្ងៃទី២៦ ខែមេសា ឆ្នាំ២០១៧ ស្ថិតនៅចំណុចការ៉ាស់សាំង សេង រស្មី ក្នុងភូមិលើ ឃុំព្រែកអញ្ចាញ ស្រុកមុខកំពូល ខេត្តកណ្ដាល។

សមត្ថកិច្ចបានឲ្យដឹងថា ជនរងគ្រោះមានឈ្មោះ សេង រស្មី ភេទប្រុស អាយុ៣០ឆ្នាំ ស្នាក់នៅភូមិក្រោម ឃុំព្រែកអញ្ចាញ ស្រុកមុខកំពូល ខេត្តកណ្ដាល មុខរបរ លក់ប្រេងនិងហ្គាស។ ចំណែកជនសង្ស័យមានឈ្មោះ ម៉ាន តេម ភេទប្រុស អាយុ២៣ឆ្នាំ មុខរបរកម្មករលក់ប្រេង និងហ្គាស ស្នាក់នៅភូមិស្វាយ ឃុំស្វាយពោធិ៍ ស្រុកស្រីសន្ធរ ខេត្តកំពង់ចាម។

ប្រភពពីជនរងគ្រោះបានឲ្យដឹងថា អំឡុងឆ្នាំ២០១៥ ជនសង្ស័យធ្លាប់បានចូលមកធ្វើការនៅការ៉ាស់សាំងខាងលើម្ដងមកហើយ តែក៏ឈប់ធ្វើការទៅផ្ទះវិញ។ លុះដល់ថ្ងៃទី១ ខែមករា ឆ្នាំ២០១៧ ជនសង្ស័យមកសុំគាត់ចូលធ្វើការវិញ ដោយអាណិតទើបគាត់យល់ព្រម ដោយឲ្យជនសង្ស័យខាងលើនេះ ទទួលការងារជា អ្នកគិតលុយនិងគ្រប់គ្រងលុយលក់ប្រេងសាំងប្រចាំថ្ងៃ។ ចាប់ពីពេលនោះមកជនសង្ស័យតែងតែយកលុយរបស់គាត់រហូតមក រហូតដល់ថ្ងៃទី២៦ ខែមេសា ឆ្នាំ២០១៧ វេលាម៉ោងកើតហេតុខាងលើ ជនសង្ស័យបានលក់ហ្គាសរបស់គាត់បានចំនួន២ធុង បានលុយចំនួន ៨៦,៨០០រៀល តែមិនយកមកទូទាត់ឲ្យគាត់នោះទេ ទើបគាត់ឃាត់ខ្លួនជនសង្ស័យខាងលើ ឲ្យទៅសមត្ថកិច្ចតែម្តង។

តាមចម្លើយសារភាពរបស់ជនសង្ស័យបានឲ្យដឹងថា ចាប់ពីថ្ងៃទី១ ខែមករា ឆ្នាំ២០១៧ រហូតដល់ថ្ងៃទី២៥ ខែមេសា ឆ្នាំ២០១៧ ខ្លួនបានបន្លំយកលុយជនរងគ្រោះ តាមរយ: ការវិក័យប័ត្រ គិតលុយសរុបទាំងអស់ចំនួន ៣,៨៧៥,២០០រៀល។

បច្ចុប្បន្នជនសង្ស័យខាងលើ ត្រូវបានសមត្ថកិច្ចកសាងសំណុំរឿងបញ្ជូនខ្លួនទៅកាន់តុលាការចាត់ការតាមផ្លូវច្បាប់៕

មតិយោបល់