ភ្នំពេញ: យោងតាមលិខិតប្រកាសព័ត៌មាន របស់គណ:កម្មាធិការប្រយុទ្ធប្រឆាំងផលិតផលក្លែងក្លាយ ដែលបង្កគ្រោះថ្នាក់មានហានិភ័យខ្ពស់ដល់សុខភាព និងសុវត្ថិភាពសង្គមបានបង្ហាញថា នៅថ្ងៃទី២៨ ខែមេសា ឆ្នាំ២០១៧ គ.ប.ផ.ក បានដឹកនាំចម្រុះ ដោយមានការសហការពី ស្ថាប័នអយ្យការអមសាលាដំបូងរាជធានីភ្នំពេញ និងមានការចូលរួមពីតំណាងក្រសួងសុខាភិបាល តំណាងអគ្គនាយកដ្ឋានគយ និងរដ្ឋាករកម្ពុជា តំណាងអគ្គនាយកដ្ឋានកាំកុងត្រូល និងសមត្ថកិច្ចពាក់ពន្ធ័ ចុះបង្ក្រាបបទល្មើសផលិតផលគ្រឿងសម្អាងចម្រុះគ្មានច្បាប់អនុញ្ញាត ចំនួន២ទីតាំង ដែលនាំចូល រក្សាទុក និងចែកចាយ ស្ថិតក្នុងសង្កាត់ទួលស្វាយព្រៃទី១ ខណ្ឌចម្ការមន ។

ក្នុងនោះដែរ ផលិតផលខុសច្បាប់ ដែលបានឃាត់ទុកទាំង២ទីតាំងនេះ មានចំនួនសរុបប្រមាណជាង ៣៨តោន ដែលរកឃើញថា ជាផលិតផលនាំចូលគ្មានលិខិតអនុញ្ញាតពី ក្រសួងសុខាភិបាល (បញ្ជីការ ប្រតិវេទន៍) ,ពុំបានបង់ពន្ធ, នាំចូលគ្មានប្រភពច្បាស់លាស់ និងត្រូវបានសង្ស័យថាជាផលិតផលក្លែងក្លាយ។ ដូច្នោះ គ.ប.ផ.ក និងសមត្ថកិច្ចចម្រុះ កំពុងកសាងសំណុំរឿងចាត់ការបន្តតាមនីតិវិធីច្បាប់៕