ភ្នំពេញ: លោកវរសេនីយឯក ប៊ុន សត្យា ប្រធានការិយាល័យព្រហ្មទណ្ឌកម្រិតស្រាលរាជធានីភ្នំពេញ បានប្រាប់ Post News ថា កម្លាំងនគរបាលផ្នែកយុត្តិធម៌ប៉ុស្តិ៍រដ្ឋបាលផ្សារថ្មីទី៣ នៃអធិការដ្ឋាននគរបាលខណ្ឌដូនពេញ សហការជាមួយកម្លាំងការិយាល័យ ព្រហ្មទណ្ឌកម្រិស្រាលនៃស្នងការដ្ឋាននគរបាលរាជធានីភ្នំពេញ បានឃាត់ខ្លួនជនសង្ស័យជាមុខសញ្ញាសេសសល់ ក្នុងករណីលួចចំនួន០២នាក់ បន្ទាប់ពីពួកគេប្រើអំពើហិង្សា ដោយកាប់ជនជាតិជប៉ុន ដើម្បីប្លន់យកលុយ និងសម្ភារ: កាលពីថ្ងៃទី១៥ ខែកញ្ញា ឆ្នាំ២០១៧ វេលាម៉ោង១០ និង៤០នាទី នៅចំណុចកាំជណ្តើរជាន់ទី១ ប្លុកតាន់ប៉ាផ្លូវលេខ១៥៤ កែងផ្លូវលេខ៤៩ ភូមិទី៦ សង្កាត់ផ្សារថ្មីទី៣ ខណ្ឌដូនពេញ រាជធានីភ្នំពេញ។

ជនសង្យ័យទី១.ឈ្មោះរ៉ុង រស្មី ភេទប្រុស អាយុ២១ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅផ្ទះលេខ៣០៦អឺ៣ ផ្លូវលេខ៥១ សង្កាត់ផ្សារថ្មីទី៣ ខណ្ឌដូនពេញ និងទី២ ឈ្មោះ ទក ពិសិដ្ឋ ភេទប្រុស អាយុ២៤ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅផ្ទះជួល ផ្លូវលំភូមិព្រៃទា សង្កាត់ចោមចៅ ខណ្ឌពោធិសែនជ័យ រាជធានីភ្នំពេញ។

ចំណែកជនរងគ្រោះឈ្មោះ KAWAGU CHINORIO. ភេទប្រុស អាយុ៦៨ឆ្នាំ ជនជាតិជប៉ុន មុខរបរទេសចរណ៍ កាន់លិខិតឆ្លងដែនលេខ TK6624928ស្នាក់នៅផ្ទះសំណាក់លេខ៩៦ ផ្លូវលេខ៨៨ សង្កាត់វត្តភ្ នំខណ្ឌដូនពេញ ត្រូវក្រុមជនសង្ស័យកាប់បណ្តាលឲ្យរបួសដើមដៃឆ្វេង ក្បាល ម្រាមដៃឆ្វេង និងម្រាមដៃស្តាំ។

សម្រាប់សម្ភារដែលបាត់បង់រួមមាន លុយ២២៧២ ដុល្លារ លុយជប៉ុន២០០០ កាតATM ចំនួន៣ កាម៉ារាថតរូបមួយ និងទូរស័ព្ទដៃ ម៉ាកអាយម៉ូបាយមួយ។

បច្ចុប្បន្នជនសង្ស័យ កំពុងឃាត់ខ្លួននៅអធិការដ្ឋាននគរបាលខណ្ឌដូនពេញ ដើម្បីកសាងសំណុំរឿងតាមនិតិវិធី រីឯជនសង្ស័យជាបក្ខពួក ដែលនៅសេសសល់ កម្លាំងនគរបាលការិយាល័យជំនាញ កំពុងស្រាវជ្រាវតាមចាប់បន្ត៕