ភ្នំពេញ: យោងតាមការបញ្ជាក់តាមទូរសព្ទរបស់លោក ម៉ុន សំអាត អ្នកនាំពាក្យកងរាជអាវុធហត្ថខេត្តកំពង់ស្ពឺ បានឲ្យដឹងថា សមត្ថកិច្ចគ្រោងនឹងបញ្ជូនជនសង្ស័យពាក់ព័ន្ធ ករណីជួញដូរគ្រឿងញៀន ចំនួន ៣នាក់ ក្នុងចំណោម ៤នាក់ទៅអយ្យការអមសាលាដំបូងខេត្តកំពង់ស្ពឺ នៅវេលាម៉ោង ១០ព្រឹកថ្ងៃទី២ ខែតុលា ឆ្នាំ២០១៧នេះ។

អ្នកនាំពាក្យរូបនេះ បញ្ជាក់ថា កាលព្រឹក ថ្ងៃទី២៩ ខែកញ្ញា ឆ្នាំ២០១៧ កន្លងទៅ ដោយមាន ការសម្រសសម្រួលរបស់លោក កែវ សុធា ព្រះរាជអាជ្ញានៃអយ្យការអមសាលាដំបូងខេត្តកំពង់ស្ពឺ កម្លាំងកងរាជអាវុធហត្ថខេត្តកំពង់ស្ពឺបានបង្ក្រាប ករណីជួញដូរគ្រឿងញៀន ដ៏ធំមួយស្ថិតនៅចំណុច ភូមិពាណិជ្ជកម្ម សង្កាត់រកាធំ ក្រុងច្បារមន ខេត្តកំពង់ស្ពឺ។

នៅក្នុងប្រតិបត្តិការនោះ សមត្ថកិច្ចបានឃាត់ខ្លួន ជនសង្ស័យចំនួន ៤នាក់ រួមមាន៖

-ទី១ឈ្មោះ យី សំបូរ ភេទប្រុស អាយុ ២៦ឆ្នាំ មុខរបរ មិនពិតប្រាកដ ជាមេខ្លោងចែកចាយគ្រឿងញៀន មានទីលំនៅ កន្លែងកើតហេតុខាងលើ។

-ទី២ឈ្មោះ ម៉ាក់ សុម៉ាលី ភេទស្រី អាយុ ២៦ឆ្នាំ មុខរបរលក់ដូរ ជាប្រពន្ធរបស់ឈ្មោះ យី សំបូរ មានទីលំជាមួយគ្នា។

-ទី៣ឈ្មោះ នូន សារិទ្ធឌី ភេទប្រុស អាយុ១៨ ឆ្នាំមុខរបរ មិនពិតប្រាកដ ជាអ្នកដើរចែកចាយគ្រឿងញៀន មានទីលំនៅជាមួយឈ្មោះ យី សំបូរ

-និងទី៤ឈ្មោះ កែម សារិទ្ធ ភេទ ប្រុសអាយុ ៥១ឆ្នាំ មុខរបរ ជាប្រធានរដ្ឋបាល មន្ទីរផែនការ ខេត្តកំពង់ស្ពឺ ជាឪពុកជនសង្ស័យ និងជាម្ចាស់ផ្ទះកើតហេតុ។

ក្រោយឆែកឆេរ សមត្ថកិច្ចបាន រកឃើញ និងដកហូតបានវត្ថុតាងមួយចំនួនរួមមាន៖
-គ្រឿងញៀន ប្រភេទ មេតំហ្វេតាមីន (ម៉ាទឹកកក) ចំនួន២កញ្ចប់ធំ ទម្ងន់ ២០៤,៣៥ក្រាម,ជញ្ជីងថ្លឹងគ្រឿងញៀន ចំនួន១,កាំភ្លើងខ្លី១ដើម ម៉ាកBERETTA (បាញ់គ្រាប់ជ័រ),គ្រាប់កាំភ្លើងជ័រ ចំនួន ១០០គ្រាប់,ម៉ូតូសម្រាប់ធ្វើ មធ្យោបាយចែកចាយ គ្រឿងញៀន ចំនួន២គ្រឿង និងដប់ថ្នាំសម្រាប់ជក់គ្រឿងញៀន ចំនួន១។

យោងតាមតាម លោក ម៉ុន សំអាត ដដែល ជនសង្ស័យម្នាក់ឈ្មោះ កែម សារិទ្ធ ភេទ ប្រុស អាយុ ៥១ឆ្នាំ មុខរបរ ជាប្រធានរដ្ឋបាល មន្ទីរផែនការ ខេត្តកំពង់ស្ពឺ ជាឪពុកជនសង្ស័យ និងជាម្ចាស់ផ្ទះកើតហេតុ ត្រូវបានលោក កែវ សុធា ព្រះរាជអាជ្ញានៃអយ្យការអមសាលាដំបូងខេត្តកំពង់ស្ពឺ សម្រេចឱ្យដោះលែងទៅវិញហើយ ដោយទុកតែសំណុំរឿងបញ្ជូនទៅតុលាការប៉ុណ្ណោះ។

ផ្ទុយពីការអះអាងរបស់មន្ត្រីអ្នកនាំពាក្យកងរាជអាវុធហត្ថខាងលើ ទាក់ទងនឹងការដោះដោះលែងជនសង្ស័យឈ្មោះ កែម សារិទ្ធ ភេទ ប្រុស អាយុ ៥១ឆ្នាំ មុខរបរ ជាប្រធានរដ្ឋបាល មន្ទីរផែនការ ខេត្តកំពង់ស្ពឺ ជាឪពុកជនសង្ស័យ និងជាម្ចាស់ផ្ទះកើតហេតុ នោះ លោក កែវ សុធា ព្រះរាជអាជ្ញានៃអយ្យការអមសាលាដំបូងខេត្តកំពង់ស្ពឺ បានបញ្ជាក់តាមទូរសព្ទយ៉ាងខ្លីថា លោក អត់ទាន់បានដឹងទេ។ លោកថា ថ្ងៃឈប់សម្រាកអីចឹង គឺនៅលើព្រះរាជអាជ្ញារង ដែលជាអ្នកប្រចាំការ ហើយលោកក៏បិតទូរសព្ទ៕