កណ្តាល: គ្រោះថ្នាក់ចរាចរណ៍មួយបង្កឡើងដោយរថយន្តដឹកកម្មករមួយគ្រឿងបើកបត់មិនប្រយ័ត្ន ត្រូវម៉ូតូមួយគ្រឿងជិះបុក បណ្តាលឲ្យរបួសធ្ងន់ម្នាក់។

ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង៦និង៥០នាទី ថ្ងៃទី៧ ខែតុលា ឆ្នាំ២០១៧ នៅចំណុចផ្លូវជាតិលេខ៤ គីឡូម៉ែត្រ២៤-២៥ ភូមិអង្គស្នួលទី១ ឃុំពើក ស្រុកអង្គស្នួល ខេត្តកណ្ដាល។

នគរបាលចរាចរណ៍ស្រុកអង្គស្នួលបានឲ្យដឹងថា មុនពេលកើតហេតុ មានម៉ូតូមួយគ្រឿងម៉ាក ស៊ុយស៊ូគី ស្មាសរីវ៉ូ ពណ៌ខ្មៅ
ពាក់ស្លាកលេខ កំពត 1C-8065 បើកបរដោយឈ្មោះ ហម ជា ភេទប្រុស អាយុ២៩ឆ្នាំ ទីលំនៅភូមិ បឹងត្រាញ់ ឃុំបឹងត្រាញ់ ស្រុកសំរោង ខេត្តតាកែវ ដែលបើកពីទិសខាងកើតទៅទិសខាងលិច (ភ្នំពេញទៅកំពង់សោម) លុះដល់ចំណុចកើតហេតុ បានបុកជាមួយរថយន្តមួយគ្រឿងម៉ាកហុីយ៉ាន់ដាយ ជាប្រភេទ រថយន្តដឹកកម្មករចំណុះ ២តោនកន្លះ ពណ៌ខៀវ ពាក់ស្លាកលេខ ភ្នំពេញ 3D-3264 បើកបរដោយឈ្មោះ ឌឹម ឆេង ភេទប្រុស អាយុ៣២ឆ្នាំ ទីលំនៅភូមិក្រាំងទំនប់ ឃុំចាន់តាសែន ស្រុកឧត្ដុង្គ ខេត្តកំពង់ស្ពឺ មុខរបរតៃកុងឡាន ដែលបើកពីទិសខាងលិចទៅទិសខាងកើត លើផ្លូវភាគខាងជើងនៃទ្រូងថ្នល់ រួចបត់ឆ្លងផ្លូវពីជើងទៅត្បូងក្នុងទិសដៅបញ្ច្រាសទិសគ្នាពេញទំហឹង តែម្តង។

ក្រោយពេលកើតហេតុ រថយន្តមិនបានឈប់នៅកន្លែងកើតហេតុទេ បានបើករត់ទៅទិសខាងកើតរួចបត់តាមផ្លូវលំ
ឃុំ ឆក់ឈើនាង ក៏ត្រូវបានសមត្ថកិច្ចដេញឃាត់ខ្លួនបានតែម្តង យកមកកាន់អធិការដ្ឋានរង់ចាំដោះស្រាយគ្នាពេលក្រោយតាមច្បាប់បន្តទៀត៕