ព្រះសីហនុ: យោងតាមផេក អគ្គនាយកដ្ឋានកាំកុងត្រូល បានឲ្យដឹងថា នៅព្រឹកថ្ងៃទី៥ ខែធ្នូ ឆ្នាំ២០១៧ សាខាកាំកុងត្រូលខេត្តព្រះសីហនុ បានសហការជាមួយមន្រ្តីមកពីអគ្គនាយកដ្ឋានកាំកុងត្រូល ដោយមានការចូលរួមពីស្ថាប័នពាក់ព័ន្ធក្នុងខេត្តព្រះសីហនុបានចុះផ្សព្វផ្សាយអំពីគុណភាព សុវត្ថិភាពម្ហូបអាហារ ត្រួតពិនិត្យទៅលើ បន្លែ ផ្លែឈើ ជ្រក់គ្រប់ប្រភេទ ធ្វើតេស្តបឋមលើម្ហូបអាហារគ្រឿងសមុទ្រស្រស់(បង្គា ម៉ឹក) ដើម្បីរកសារធាតុគីមីហាមឃាត់ប្រើប្រាស់លើម្ហូបអាហារនៅផ្សារលើ និងត្រួតពិនិត្យគុណភាព បរិមាណប្រេងឥន្ធន:តាមស្ថានីយ៍ចាក់ប្រេងក្នុងខេត្តព្រះសីហនុ។
ជាលទ្ធផលសមត្ថកិច្ចជំនាញពុំបានរកឃើញការដាក់លាយសារធាតុគីមីហាមឃាត់នៅលើគ្រឿងសមុទ្រនោះទេ ប៉ុន្តែបានរកឃើញបន្លែ ស្លឹកគូឆាយចំនួន ០.៥គីឡូក្រាម មានសំណល់ថ្នាំកសិកម្ម , ស្ពៃចិនចំនួន ៤គីឡូក្រាម មានសំណល់ថ្នាំកសិកម្ម និងស្ពៃជ្រក់ចំនួន ៣គីឡូក្រាម មានសារធាតុគីមីហាមឃាត់ ។
ចំពោះស្ថានីយ៍ប្រេងឥន្ធន:ចំនួន១៦កន្លែងដែលបានត្រួតពិនិត្យយើងបានរកឃើញ៖ ស្ថានីយ៍មានបញ្ហាបរិមាណចំនួន ៤ស្ថានីយ៍ និងស្ថានីយ៍មានបញ្ហាបរិមាណ និងគុណភាពចំនួន ៤ស្ថានីយ៍៕
មតិយោបល់