ភ្នំពេញ: បុរសម្នាក់បានដើរទៅលេងម្តាយ ដែលរស់នៅផ្ទះជាមួយប្អូនស្រី ពេលទៅដល់មានអារម្មណ៍ថាវិលមុខ ភ្លាមៗនោះក៏បានដួលទៅលើម្តាយសន្លប់ស្តូកតែម្តង ត្រូវបានបញ្ជូនទៅសង្រ្គោះបន្ទាន់នៅមន្ទីរពេទ្យផងដែរ តែពេលទៅដល់ គ្រូពេទ្យបានប្រាប់ថា ស្លាប់បាត់ទៅហើយ ទើបបង្កឲ្យមានការភ្ញាក់ផ្អើល។
ហេតុការណ៍នេះ បានកើតទ្បើងនៅវេលាម៉ោង ០៦ និង២៥នាទីយប់ ថ្ងៃទី២០ ខែធ្នូ ឆ្នាំ២០១៧ ស្ថិតនៅភូមិប៉ប្រកខាងជើង សង្កាត់កាកាប១ ខណ្ឌពោធិ៍សែនជ័យ រាជធានីភ្នំពេញ។
បុរសដែលជាជនរងគ្រោះ មានឈ្មោះ ឈឿន សារុំ ភេទប្រុស អាយុ៣៤ឆ្នាំ មុខរបរនៅផ្ទះ អតីតធ្វើការនៅក្រុមហ៊ុន YAMAHA ស្នាក់នៅផ្ទះជួលភូមិប៉ប្រកខាងជើង សង្កាត់កាកាប១ ខណ្ឌពោធិ៍សែនជ័យ មានស្រុកកំណើត នៅស្រុកកណ្ឌៀង ខេត្តពោធិ៍សាត់ មានបងប្អូន៣នាក់ស្រីម្នាក់ និងប្រុស២នាក់ ជនរងគ្រោះជាកូនច្បង រស់នៅម្នាក់ឯងនៅលីវ ។
តាមសម្ដីប្អូនប្រុសជនរងគ្រោះ បានឲ្យដឹងថា មុនពេលកើតហេតុ បងប្រុសខ្លួនស្នាក់នៅផ្ទះជួលតែម្នាក់ឯងទេ បានមកលេងផ្ទះគាត់ ដែលរស់នៅជាមួយម្ដាយនៅក្បែរគ្នានោះ នៅពេលនោះបងប្រុសខ្លួន បាននិយាយប្រាប់ម្ដាយថា ដូចជាវិលមុខណាស់ ក៏បានដួលទៅលើម្តាយបង្កើតរបស់ខ្លួន ភ្លាមៗនោះសាច់ញាតិបានហៅរថយន្តសង្គ្រោះមន្ទីរពេទ្យបង្អែកពោធិ៍ចិនតុង ដឹកយកទៅមន្ទីរពេទ្យព្រះកុសម: តែពេលទៅដល់លោកគ្រូពេទ្យ បានប្រាប់ថា ជនរងគ្រោះស្លាប់ទៅហើយ ទើបសាច់ញាតិដឹកយកទៅតម្កល់នៅវត្តពោធិ៍ចិនតុង៕
មតិយោបល់