ពោធិ៍សាត់់: លោកវរសេនីយ៍ទោ ធាង ឡេង អធិការនគរបាលស្រុកវាលវែង បានប្រាប់Post Newsថា មានករណីឃាត់ខ្លួនបុរសម្នាក់ពាក់ព័ន្ធនឹងករណីរំលោភសេពសន្ថវ: បន្ទាប់ពីបានធ្វើសកម្មភាពរំលោភលើកូនស្រីចុងរបស់ខ្លួន ព្រមទាំងគំរាមសម្លាប់លើជនរងគ្រោះថែមទៀត។
ករណីនេះបានប្រព្រឹត្តឡើង ចាប់តាំងពីឆ្នាំ២០១៧មិនចាំថ្ងៃខែ រហូតដល់ថ្ងៃទី៣ ខែមករា ឆ្នាំ២០១៨ វេលាម៉ោង៦និង៣០នាទីយប់ នៅត្រង់ចំណុចអូរដីខ្មៅ ភូមិចម្ការជ្រៃខាងត្បូង ឃុំអន្លង់រាប ស្រុកវាលវែង ខេត្តពោធិ៍សាត់។
ជនរងគ្រោះមានអាយុ១៣ឆ្នាំ ត្រូវជាកូនចុងនឹងជនសង្ស័យឈ្មោះ រ៉េត រុន ហៅខ្មៅនិងហៅរុន ភេទប្រុស អាយុ៣៥ឆ្នាំទាំង២នាក់ស្នាក់នៅភូមិឃុំកើតហេតុ។
លោកវរសេនីយ៍ទោ បានបញ្ជាក់ថា មូលហេតុនៃការរំលោភសេពសន្ថវ: ទៅលើកូនស្រីចុងរបស់ខ្លួន គឺបណ្តាលមកពីជនសង្ស័យ តែងស្រវឹងស្រាបង្កហិង្សាក្នុងគ្រួសារ និងប្រើប្រាស់សារធាតុញៀន ប្រភេទម៉ាទឹកកផងដែរ។
បច្ចុប្បន្ន ជនសង្ស័យត្រូវនាំខ្លួនមកអធិការដ្ឋាននគរបាលស្រុក ដើម្បីរៀបចំសំណុំរឿង ផ្តន្ទាទោសទៅតាមផ្លូវច្បាប់៕
មតិយោបល់