ភ្នំពេញ: មេជាងសំណង់ម្នាក់ ទាក់ទងមេម៉ាយកូន២ បានខ្លួនប្រាណហើយចង់បោះបង់ធ្វើឲ្យនាងខឹង តាមទៅរកដល់ផ្ទះប្រពន្ធដើម ទាស់ពាក្យសម្តីគ្នាទាញដុំថ្មគប់ប្រពន្ធដើមបែកក្បាល បង្កឲ្យមានការភ្ញាក់ផ្អើល កាលពីវេលាម៉ោង៩យប់ថ្ងៃទី១៣ ខែមករា ឆ្នាំ២០១៨ ស្ថិតនៅក្នុងភូមិដំណាក់ សង្កាត់គោកឃ្លាង ខណ្ឌសែនសុខ រាជធានីភ្នំពេញ។
បុរសកំហូចខាងលើមានឈ្មោះ ចន សុភ័ក្រ អាយុ៣០ឆ្នាំ មុខរបរមេការសំណង់ ស្នាក់នៅផ្ទះកន្លែងកើតហេតុ ។ ប្រពន្ធដើមមានឈ្មោះ ខ.ណ.រ អាយុ៣២ឆ្នាំ មុខរបរមេផ្ទះ ស្នាក់នៅកន្លែងកើតហេតុ មានកូនស្រី២នាក់រស់នៅក្នុងបន្ទុក ។ ចំណែកឯស្ត្រីជាប្រពន្ធចុងមានឈ្មោះ ម.ស.ន អាយុ៤២ឆ្នាំ ជាស្ត្រីមេម៉ាយ មានមុខរបរនៅផ្ទះ មានកូនប្រុស២នាក់ មានទីលំនៅភូមិសំរោង សង្កាត់សំរោងក្រោម ខណ្ឌពោធិ៍សែនជ័យ ។
តាមកាបកស្រាយពីស្ត្រីជាប្រពន្ធដើម បានឲ្យដឹងថា គាត់ក៏មិនច្បាស់ការថាប្តីរបស់គាត់បង្កាត់ភ្លើងស្នេហ៍ ជាមួយអ្នកមេម៉ាយខាងលើពីពេលណានោះដែរ ហើយស្នេហាស៊ីជម្រៅដល់កម្រិតណានោះ ក៏មិនបានដឹងច្បាស់ដែរ ក៏ប៉ុន្តែតាមអ្វីដែលគាត់ដឹងប្តីរបស់គាត់ធ្លាប់ទៅធ្វើរបងផ្ទះឲ្យអ្នកមេម៉ាយខាងលើ ហើយមិនដឹងថា យ៉ាងម៉េចបានជាប្តីរបស់គាត់ទៅលង់នឹងសម្រស់ស្ត្រីខាងលើវ័យរហូតដល់៤០ប្លាយទៅហើយ សង្ស័យនៅផ្ទះហូបតែសម្លម្ជូរពេក ក៏មិនដឹង ទើបតែកន្លះខែកន្លងមកនេះ ប្តីរបស់គាត់ប្លែកទាំងសម្តីសំដៅ និយាយទូរស័ព្ទដូចជាលាក់លៀមហាក់បីដូចជាមានរឿងអាថ៌កំបាំង តែទោះជាយ៉ាងណាក៏ដោយអ្វីដែលលោកប្តីលួចសាងនោះលាក់មិនជិតឡើយ ក្រោយពីបែកធ្លាយរឿងតាមរយ:ទូរស័ព្ទ ស្ត្រីប្រពន្ធចុងទូរស័ព្ទមកប្តីរបស់គាត់ តែប្តីគាត់ជាប់រវល់គាត់លើកទទួលជំនួសស្ត្រីមេម៉ាយអះអាងថា ខ្លួនជាប្រពន្ធទៅវិញ ទើបកើតទៅជារឿងងឿងឆ្ងល់ លោកប្តីដែលខ្លួនដេកឱបនឹងដើមទ្រូងរាល់យប់សោះ ចុះហេតុអ្វីបានជាអ្នកផ្សេងមកអះអាងថា ត្រូវជាប្រពន្ធ?
ទើបតែនៅរសៀលថ្ងៃទី១៣ ខែមករា ឃើញស្ត្រីខាងលើមកផឹកស៊ីនៅហាងមុខផ្ទះតែមិនបានចាប់អារម្មណ៍ លុះដល់វេលាម៉ោង៩យប់ថ្ងៃដដែលនេះស្ត្រីរូបនេះ ស្ថិតក្នុងសភាពស្រវឹងបែរជាមករករឿងគាត់ដល់ក្នុងផ្ទះទៅវិញ ទាមទារសុំយកប្តី ដោយអ្វីៗពេលនោះ ធ្វើឲ្យគាត់ស្រឡាំងកាំងចង់ភាំងបន្តិច ចង់សន្លប់បន្តិច ក្រោយពីមានស្រីផ្សេងមកសុំយកប្តីខ្លួន។ ក្រោយពីទាស់សម្តីគ្នាទៅវិញទៅមក ស្ត្រីជាប្រពន្ធចុងស្រវាទាញបានដុំថ្មគប់សំដៅប្រពន្ធដើម បណ្តាលឲ្យរងរបួសបែកក្បាល បង្កឲ្យផ្អើលអស់អ្នកភូមិ ទាំងសមត្ថកិច្ចចុះទៅអន្តរាគមន៍ ឃាត់ទាំងជនរងគ្រោះទាំងជនបង្កទៅសម្របសម្រួលនិយាយគ្នា នៅប៉ុស្តិ៍នគរបាល ខណ:ដែលរឿងរ៉ាវសង្គ្រាមស្នេហាត្រីកោណខាងលើផ្ទុះឡើងភាគីខាងប្រុស បានគេចខ្លួនបាត់ ។
នៅចំពោះមុខសមត្ថកិច្ចស្ត្រីបង្ក បានឲ្យដឹងថា រឿងស្នេហាខាងលើនេះទាល់តែទម្ពក់វាទៅទើបព្នៅវាមក គាត់ស្រឡាញ់គ្នាជាមួយបងមេជាងសំណង់អស់រយ:ពេលជាង១ខែមកហើយ គ្រាដើមផ្តើមស្នេហ៍ខណ:ដែលលោកបងជាងសំណង់គាត់ ទៅធ្វើរបងផ្ទះគាត់ នៅភូមិសំរោង សង្កាត់សំរោងក្រោម ក្នុងការងាររបស់ជាងបណ្តើរ និយាយលេងបណ្តើរ សាកសួរទៅលោកបងជាងប្រាប់ថា ខ្លួននៅទំនេរ «ពោះម៉ាយ» គិតថា កាលបើលោកពោះម៉ាយ ប៉ះជាមួយអ្នកមេម៉ាយដូចគ្នា ក៏គ្មានអ្វីខុសទាស់ដែរ។
នៅពេលនោះទំនាក់ទំនងពួកគាត់ កាន់តែស៊ីជម្រៅរហូតឈានដល់បង្កាត់ភ្លើងស្នេហ៍ជាមួយមេជាង ទើបហ៊ានប្រគល់ខ្លួនបង់ប្រាណឲ្យលោកមេជាងសំណង់ ម្តងហើយម្តងទៀត តែរយ:ពេល៣ថ្ងៃកន្លងមកនេះ គាត់មកម្តុំភូមិដំណាក់ផ្ទួនៗគ្នា តាមរកលោកបងជាងសំណង់ តែមិនឃើញ លុះមកដល់រសៀលថ្ងៃទី១៣ មករា គាត់មកផ្ទះពេទ្យធ្មេញនៅក្នុងភូមិដំណាក់បានចូលហាងផឹកស៊ីតាំងពីថ្ងៃរសៀល រហូតដល់យប់ ដើម្បីចាំមើលផ្លូវបងមេជាងចេញមកជួប នៅយូរពេកបានដើរទៅសួរដល់ក្នុងផ្ទះក៏កើតជាជម្លោះពាក្យសម្តី ជ្រុលដៃយកដុំថ្មគប់ប្រពន្ធដើមតែម្ដងទៅ។
ភាគីទាំង២ក្រោយកើតជម្លោះ បង្កឲ្យមានរបួសស្នាមនោះ ត្រូវបានប៉ូលិសហៅចូលប៉ុស្តិ៍សម្របសម្រួលគ្នា ទីបំផុតភាគីបង្កចេញសងថ្លៃព្យាបាលរបួសចំនួន១០ម៉ឺនរៀល ដើម្បីបញ្ចប់រឿងហិង្សា ។ ដោយឡែកចំណែករឿងស្នេហាត្រីកោណនោះវិញ ទុកឲ្យភាគីជាប់ពាក់ព័ន្ធទាំង៣ ធ្វើការដោះស្រាយនៅពេលក្រោយ៕
មតិយោបល់