ភ្នំពេញ: កម្លាំងនគរបាលនាយកដ្ឋានប្រឆាំងការជួញដូរមនុស្ស និងការពារអនីតិជន នៃក្រសួងមហាផ្ទៃ បានសហការជាមួយកម្លាំងការិយាល័យប្រឆាំងការជួញដូរមនុស្ស និងការពារអនីតិជន នៃស្នងការដ្ឋាននគរបាលរាជធានីភ្នំពេញ ដោយមានការចូលរួមពីសំណាក់កម្លាំងនគរបាលប៉ុស្តិ៍បឹងកេងកង២ នៃអធិការដ្ឋាននគរបាលខណ្ឌចម្ការមន ដឹកនាំនិងសម្របសម្រួលដោយ ព្រះរាជអាជ្ញាររងអមសាលាដំបូងរាជធានីភ្នំពេញ បានចុះទៅបង្ក្រាបទីតាំងម៉ាស្សាកោសជប់ មួយកន្លែងទាំងយប់ ក្រោយពេលស្រាវជ្រាវដឹងថា ទីតាំងមួយនេះមានបង្កប់សេវាបម្រើផ្លូវភេទ ។
ប្រតិបត្តិការនេះធ្វើឡើងកាលពីវេលាម៉ោង៨និង៥នាទីយប់ ថ្ងៃទី២៤ ខែមករា ឆ្នាំ២០១៨ តាមបណ្ដោយផ្លូវលេខ២៧៨ ផ្ទះលេខ៤៦B ស្ថិតនៅសង្កាត់បឹងកេងកង២ ខណ្ឌចម្ការមន រាជធានីភ្នំពេញ។
ក្នុងនោះដែរ សមត្ថកិច្ចបានធ្វើការឃាត់ខ្លួនមនុស្សប្រុសស្រីចំនួន៦នាក់ នាំយកទៅកាន់នាយកដ្ឋានប្រឆាំងការជួញដូរ និងការពារអនីតិជនក្រសួងមហាផ្ទៃទាំងយប់ ដើម្បីធ្វើការសាកសួរ និងកសាងសំណុំរឿងចាត់ការតាមច្បាប់។
តាមប្រភពព័ត៌មានបានឲ្យដឹងថា មនុស្សដែលត្រូវឃាត់ខ្លួនទាំង៦នាក់នោះ មានម្នាក់គឺជាម្ចាស់ទីតាំងហាងម៉ាស្សាកោសជប់ខាងលើ មិនទាន់ស្គាល់អត្តសញ្ញណ ភេទប្រុស ។ និងនារីចំនួន២នាក់ទៀត គឺជាអ្នកបម្រើសេវាម៉ាស្សាកោសជប់ និងបម្រើផ្លូវភេទផងសុំមិនបញ្ចេញឈ្មោះ ហើយមានអាយុចាប់ពី១៨ឆ្នាំដល់៣០ឆ្នាំ សុទ្ធតែជាជនជាតិវៀតណាម ក្រៅពីនេះក៏មានការដកហូតសៀវភៅកត់ត្រាចំនួនភ្ញៀវ និងថ្ងៃធ្វើការរបស់ពួកនាងៗទាំងនោះមួយចំនួនថែមទៀតផងដែរ។ ចំណែកបុរស២នាក់ទៀត សុទ្ធតែជាភ្ញៀវបានដោះលែងឲ្យរួចខ្លួនវិញ។
បច្ចុប្បន្នមនុស្សទាំង៦នាក់ខាងលើ ត្រូវបាននាំទៅកាន់នាយកដ្ឋានប្រឆាំងការជួញដូរមនុស្ស និងការពារអនីតិជនក្រសួងមហាផ្ទៃ ដើម្បីសួរនាំ និងចាត់ការតាមច្បាប់តែម្ដង៕
មតិយោបល់