Post News Media ព័ត៌មានជាតិ បញ្ជូនក្រុមចោ...

បញ្ជូនក្រុមចោរឆក់យ៉ាងសកម្មវ័យក្មេង៤នាក់ទៀតហើយ ទៅតុលាការ!..

ភ្នំពេញ: នៅថ្ងៃទី២៨ ខែមករា ឆ្នាំ២០១៨ សមត្ថកិច្ចជំនាញការិយាល័យស្រាវជ្រាវបទល្មើសព្រហ្មទណ្ឌនៃមន្ទីរយុត្តិធម៌ កងរាជអាវុធហត្ថរាជធានីភ្នំពេញ បានបញ្ជូនចោរឆក់វ័យក្មេង៤នាក់ ទៅតុលាការ ដើម្បីផ្តន្ទាទោសតាមច្បាប់។ ពួកគេទាំង៤នាក់នេះ ត្រូវបានកម្លាំងល្បាតមូលដ្ឋានអាវុធហត្ថខណ្ឌមានជ័យ នៃរាជធានីភ្នំពេញ ធ្វើការបង្ក្រាបបាន ជាបន្តបន្ទាប់គ្នា កាលពីថ្ងៃទី២៥ ខែមករា ឆ្នាំ២០១៨ ក្នុងនោះមាន៖

១/ ឈ្មោះ ស ដាវីត ភេទប្រុស អាយុ ១៧ឆ្នាំ , ២/ ឈ្មោះ ឌុយ វ៉ាន់ដា ភេទប្រុស អាយុ ១៦ឆ្នាំ , ៣/ ឈ្មោះ ហួន យុវ័ន្ត ភេទប្រុស អាយុ ១៦ឆ្នាំ , ៤/ឈ្មោះ ប.ថ ហៅហៀ ភេទប្រុស អាយុ១៥ឆ្នាំ។

មុនកើតហេតុ កាលពីថ្ងៃទី២៥ ខែមករា ឆ្នាំ២០១៨ វេលាម៉ោង១១និង២០នាទីយប់ ឈ្មោះ ស ដាវីត និងឈ្មោះ ឌុយ វ៉ាន់ដា ដែលជាអ្នកធ្វើសកម្មភាពចោរឆក់ បានជិះម៉ូតូ១គ្រឿង ម៉ាក និច ពណ៌ស ស្លាកលេខ ភ្នំពេញ 1FF-2702 បានធ្វើសកម្មភាពឆក់កាបូប ពីជនរងគ្រោះមានគ្នា ២នាក់ ដែលជិះម៉ូតូ ម៉ាក ធូដេ ពណ៌ទឹកសមុទ្រ ស្លាកលេខ ភ្នំពេញ 1DO-2195 ដែលកំពុងធ្វើដំណើរលើដងផ្លូវបានសម្រេច នៅចំណុចមុខក្លឹបស៊ីធី ផ្លូវមុនីរ៉េត ភូមិដំណាក់ធំ៤ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ហើយពួកគេទាំង២នាក់ បានជិះគេចខ្លួនបាត់ លុះពេលជិះដល់ចំណុចមុខឃ្លាំងការ៉ូ ផ្លូវលំ ភូមិដំណាក់ធំ១ សង្កាត់ស្ទឹងមានជ័យ ខណ្ឌមានជ័យ ពួកគេបានបន្តធ្វើសកម្មភាពឆក់កាបូបស្ពាយពីស្ត្រីជនរងគ្រោះមានគ្នា៣នាក់ផ្សេងទៀត ដែលជិះម៉ូតូ ម៉ាកហុងដា សេ១២៥ ពណ៌ខ្មៅ ស្លាកលេខ ភ្នំពេញ 1GN-0552 តែសំណាងមិនល្អ ត្រូវប្រជាពលរដ្ឋនៅក្បែរនោះឃើញ បានស្រែកឆោរឡោរ ស្របពេលសមត្ថកិច្ចអាវុធហត្ថកំពុងល្បាតផងនោះ បានប្រដេញតាមភ្លាមៗ រហូតឃាត់ខ្លួនបានតែម្តង។

បន្ទាប់ពីឃាត់ខ្លួនពួកគេទាំង២នាក់ខាងលើ យកមកសួរនាំរួច សមត្ថកិច្ចអាវុធហត្ថ បានបន្តស្រាវជ្រាវរហូតឃាត់ខ្លួនបានបក្ខពួក២នាក់បន្ថែមទៀត មានឈ្មោះ ហួន យុវ័ន្ត និងឈ្មោះ ប៊ុន ថា ហៅហៀ ដែលបានរួមសមគំនិតក្នុងសកម្មភាពឆក់នេះដែរ។

ក្រោយពេលឃាត់ខ្លួនបានពួកគេបានសារភាពប្រាប់សមត្ថកិច្ចអាវុធហត្ថឲ្យដឹងថា កាលពីវេលាម៉ោង៤និង១០នាទីរសៀល ថ្ងៃទី២៥ ខែមករា ឆ្នាំ២០៨ ពួកគេទាំង៤នាក់ រួមនឹងបក្ខពួក៥នាក់ទៀត ដែលមាន ឈ្មោះ ថា , ឈ្មោះ អេង , ឈ្មោះ ប៉ៅ , ឈ្មោះ ខូច និងឈ្មោះ ប៉ុល បានជួបជុំគ្នានៅចំណុចហាងកាហ្វេមួយកន្លែង ក្បែរបុរី៩៩៩ ភូមិត្នោតជ្រុំ សង្កាត់បឹងទំពុន ខណ្ឌមានជ័យ ដើម្បីពិភាក្សាគ្នា និងរៀបគំរោងធ្វើសកម្មភាពឆក់សម្ភារ:មានតម្លៃពីប្រជាពលរដ្ឋដែលធ្វើដំណើរលើដងផ្លូវពេលយប់ ក្រោយពេលជួបជុំគ្នាហើយ ពួកគេបានបំបែកគ្នា ដោយឈ្មោះ ហួន យុវ័ន្ត ហៅវណ្ណ បានប្រគល់ម៉ូតូ១គ្រឿងម៉ាក និច ពណ៌ស ស្លាកលេខ ភ្នំពេញ 1FF-2702 ឲ្យ ឈ្មោះ ស ដាវីត និងឈ្មោះ ឌុយ វ៉ាដា ខ្ចីដើម្បីធ្វើសកម្មភាពឆក់។ បន្ទាប់មកឈ្មោះ ស ដាវីត និងឈ្មោះ ឌុយ វ៉ាដា បានជិះម៉ូតូនោះ ចេញទៅបាត់តែម្តង។ លុះដល់វេលាម៉ោង១១និង១០នាទីយប់ ថ្ងៃដដែល ឈ្មោះ ស ដាវីត និងឈ្មោះ ឌុយ វ៉ាន់ដា បានជិះម៉ូតូដែលបក្ខពួកខ្លួនឲ្យខ្ចី ធ្វើសកម្មភាពឆក់២លើកជាប់គ្នា៖

លើកទី១ បានធ្វើសកម្មភាពឆក់ទៅលើជនរងគ្រោះមានគ្នា២នាក់ ដែលជិះម៉ូតូ ម៉ាក ធូដេ ពណ៌ទឹកសមុទ្រ ស្លាកលេខ ភ្នំពេញ 1DO-2195 ដែលកំពុងធ្វើដំណើរលើដងផ្លូវបានសម្រេច នៅចំណុចមុខក្លឹបស៊ីធី ផ្លូវមុនីរ៉េត ភូមិដំណាក់ធំ៤ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ

លើកទី២ ពួកគេបានបន្តធ្វើសកម្មភាពឆក់កាបូបស្ពាយពីស្ត្រីជនរងគ្រោះមានគ្នា៣នាក់ ផ្សេងទៀត ចំណុចមុខឃ្លាំងការ៉ូ ផ្លូវលំ ភូមិដំណាក់ធំ១ សង្កាត់ស្ទឹងមានជ័យ ខណ្ឌមានជ័យ ដែលជិះម៉ូតូ ម៉ាកហុងដា សេ១២៥ ពណ៍ខ្មៅ ស្លាកលេខ ភ្នំពេញ 1GN-0552 តែមិនបានសម្រេច ហើយត្រូវសមត្ថកិច្ចអាវុធហត្ថឃាត់ខ្លួនបានតែម្តង។

ពួកគេបានប្រាប់ឲ្យដឹងបន្តទៀតថា ក្រោយពេលធ្វើសកម្មភាពឆក់ហើយ ពួកគេបានជួបជុំគ្នាផឹកស៊ី និងទិញគ្រឿងញៀនយកមកប្រើប្រាស់៕

Loading...