Post News Media ព័ត៌មានជាតិ បញ្ជូនលោកសក្ត...

បញ្ជូនលោកសក្តិ៥យោធា ដែលបាញ់តៃកុងតាក់ស៊ីឲ្យរបួសនៅខណ្ឌ៧មករា ទៅតុលាការ

ភ្នំពេញ: សមត្ថកិច្ចព្រហ្មទណ្ឌខណ្ឌ៧មករា នៅរសៀលថ្ងៃទី២១ ខែកុម្ភ: ឆ្នាំ២០១៨នេះ បានបញ្ជូនខ្លួន លោកសក្តិ៥ ដែលបាញ់ តៃកុងរថយន្តតាក់ស៊ី កាលពីវេលាទៀបភ្លឺថ្ងៃទី២០ ខែកុ​ម្ភ: ឆ្នាំ២០១៨ ទៅកាន់តុលាការដើម្បីចាត់ការបន្តតាមនីតិវិធី។

យោងតាមរបាយការណ៍របស់សមត្ថកិច្ចបានឲ្យដឹងថា ជនសង្ស័យ មានឈ្មោះ ប៉ែន សាយវ័ន្ត ភេទប្រុស អាយុ ៣៤ឆ្នាំ មុខរបរយោធា មានឋានន្តរសក្តិ វរសេនីយ៍ឯក (សក្តិ៥) បម្រើការងារនៅអគ្គនាយកដ្ឋានសម្ភារ:បច្ចេកទេស នៃក្រសួងការពារជាតិ ទីលំនៅផ្ទះលេខ២៨២ ផ្លូវលំ សង្កាត់ដង្កោ ខណ្ឌដង្កោ។

ចំណែកជនរងគ្រោះ មានឈ្មោះ ជុំ គា ភេទប្រុស អាយុ ៤៨ឆ្នាំ មុខរបររត់តាក់ស៊ី មានទីលំនៅ ភូមិត្រពាំងអញ្ចាញ សង្កាត់ត្រពាំងក្រសាំង ខណ្ឌពោធិ៍សែនជ័យ។

របាយការណ៍ដដែលបានបញ្ជាក់ថា កាលពីវេលាទៀបភ្លឺថ្ងៃទី២០ ខែកុ​ម្ភ: ឆ្នាំ២០១៨ ជនសង្ស័យបាន ចេញពីផឹកស៊ី នៅក្លឹបកាហ្សា បាន​ហៅ រថយន្តតាក់​ស៊ី របស់ជនរងគ្រោះជិះ។

​លុះជិះដល់​ចំណុច កើតហេតុ ម្តុំ ​មុខ​អតីតរោង​កុនអង្គរ ខណ្ឌ៧មករា ជនសង្ស័យបាន​ដក​កាំ​ភ្លើង​ខ្លី​ ម៉ាកប្រាហា បាញ់​១​គ្រាប់ ចំច​ង្កេះ​ខាង​ស្ដាំ បណ្ដាល​ឲ្យ​ជនរងគ្រោះ​​របួស​ធ្ងន់ ត្រូវបញ្ជូនទៅសង្គ្រោះបន្ទាន់នៅមន្ទីរពេទ្យកាល់ម៉ែត។

ក្រោយបាញ់ជនរងគ្រោះ រួច ជនសង្ស័យបានចុះពីរថយន្តរត់គេចខ្លួន ចូលទៅពួននៅជណ្តើរលេខ៦៨ ជាន់ទី២ ផ្លូវ១៦៤ ភូមិ១ សង្កាត់អូរឬស្សី២ ខណ្ឌ៧មករា ហើយត្រូវសមត្ថកិច្ចឃាត់ខ្លួនបានភ្លាមៗតែម្តង ដោយដកហូតបាន កាំភ្លើងខ្លី ម៉ាក ប្រាហា លេខ ៥១៨៣៦២ មានបង់មួយ និងគ្រាប់ចំនួន ០៧គ្រាប់។

សូមបញ្ជាក់ថា គេមិនទាន់ភ្លេចឡើយ នៅព្រឹត្តិការណ៍បាញ់ប្រហារមនុស្សឲ្យរងរបួស នៅក្នុងវង់ផឹកស៊ីរបស់ លោកមេធាវី អ៉ិត ពិសិដ្ឋរង្សី ក្បែរភូមិគ្រឹះលោក នាយឧត្តមសេនីយ៍ នេត សាវឿន អគ្គស្នងការនគរបាលជាតិ ក្នុងទឹកដីខណ្ឌ៧មករា កាលពីចុងឆ្នាំ២០១៧ ហើយកាលពីពេលថ្មីៗ នេះលោកមេធាវី មានកាំភ្លើងប្រើរូបនេះ ត្រូវបានតុលាការសាលាឧទ្ធរណ៍ ដោះលែងឲ្យនៅក្រៅឃុំបណ្តោះអាសន្ន។

ឥឡូវនេះ ទឹកដីខណ្ឌ៧មករា មានព្រឹត្តិការណ៍ បាញ់ប្រហារមនុស្ស បានកើតមានឡើងសារជាថ្មី គឺបង្កឡើងដោយមន្ត្រីយោធា ស្រវឹងស្រា បាញ់ប្រហារ អ្នករត់តាក់ស៊ី ឲ្យរងរបួសធ្ងន់ ទៀតហើយ៕

Loading...