ព័ត៌មានជាតិ

តុលាការសម្រេចឃុំខ្លួនស្ត្រីម្នាក់ ក្រោយរកឃើញថា បានដាក់ថ្នាំសម្លាប់ប្តីដើម ស្រវ៉ាប្តីថ្មី

ភ្នំពេញ: យោងតាមប្រភពពីមន្ត្រីកងរាជអាវុធហត្ថរាជធានីភ្នំពេញ បានឱ្យដឹងថា កាលពីព្រឹកថ្ងៃទី២៥ ខែមីនា ឆ្នាំ២០១៨ម្សិលមិញ លោក យិន សារឿន ចៅក្រមស៊ើបសួរ នៃសាលាដំបូងរាជធានីភ្នំពេញ បានសម្រេច ចេញដីកា បង្គាប់ឱ្យឃុំខ្លួនស្ត្រីម្នាក់ ជាបណ្តោះអាសន្ន ពាក់ព័ន្ធករណី ប៉ុនប៉ងឃាតកម្មដាក់ថ្នាំបំពុលសម្លាប់ប្តីដើម។

យោងតាមប្រភពដដែល បានបញ្ជាក់បន្ថែមថា លោក ស៊ឺ មុនីរ័ត្ន ជាតំណាងអយ្យការ បានបើកការស៊ើបសួរ និងសម្រេចចោទប្រកាន់ លើឈ្មោះ ម៉េត ជិន ភេទស្រី អាយុ ៣៨ឆ្នាំ ទីលំនៅផ្ទះជួលលេខ១៦ ភូមិតាងួន សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ មុខរបរ រកស៊ីលក់ដូរ ពីបទ ប៉ុនប៉ងឃាតកម្ម ដោយប្រើថ្នាំពុល និងបោះបង់អនីតិជន លើប្តីឈ្មោះ ស៊ឹម ស៊ុយ ភេទប្រុស អាយុ ៤០ឆ្នាំ យោងតាមមាត្រា ២៧ មាត្រា ២០១ និងមាត្រា ៣២១ នៃក្រមព្រហ្មទណ្ឌ ។

គួររំឭកថា សមត្ថកិច្ចកងរាជអាវុធហត្ថរាជធានីភ្នំពេញ បានចាប់ខ្លួន ជនត្រូវចោទខាងលើកាលពីថ្ងៃទី២៤ ខែមីនា ឆ្នាំ២០១៨ ក្រោយពីសមត្ថកិច្ចទទួលពាក្យបណ្តឹងរបស់ជនរងគ្រោះ ជាប្តី ថាជនត្រូវចោទជាប្រពន្ធ បានដាក់ថ្នាំពុលប៉ុនប៉ងសម្លាប់ និងបានលួចលុយរត់គេចខ្លួនទៅតាមប្រុសថ្មី ជាអ្នកបើកបររថយន្តដឹកកម្មករកាត់ដេរ៕

មតិយោបល់