ភ្នំពេញ: បុរសម្នាក់អាងរថយន្តខ្លួន មានភ្ជាប់ប្រព័ន្ធ GPS ក៏ចតរថយន្តទុកចោលនៅមុខផ្ទះជួល រួចចូលទៅសម្រាកមួយភ្លែត មានអីពេលចេញមកវិញ ត្រូវចោរលួចយកទៅបាត់ ដែលហេតុការណ៍នេះ បានកើតឡើងកាលពីវេលាម៉ោង១ រំលងអាធ្រាត្រឈានចូលថ្ងៃទី៣០ ខែមិនា ឆ្នាំ២០១៨ ។
តាមសមត្ថកិច្ច បានឲ្យដឹងថា ដោយរថយន្តមានប្រព័ន្ធ GPS ទើបឆែករកឃើញរថយន្តវិញ នៅបុរីកីឡាអាគារទី៨ ទី៩ ស្ថិតនៅសង្កាត់វាលវង់ ខណ្ឌ៧មករា។
ជនរងគ្រោះ ឈ្មោះ ថៃ ចាន់ថន ភេទប្រស អាយុ២៨ឆ្នាំ មុខរបរអ្នករត់តាក់ស៊ីឯកជន ស្នាក់នៅផ្ទះជួល ផ្លូវ២០០៤ សង្កាត់កាកាប១ ខណ្ឌពោធិ៍សែនជ័យ ។
តាមប្រភពព័ត៌មានពីជនរងគ្រោះ បានប្រាប់ឲ្យដឹងថា មុនពេលកើតហេតុរូបគាត់ បានបើករថយន្តមួយគ្រឿង ម៉ាកកាមរីបាឡែន ពណ៌ស្ករ ពាក់ស្លាកលេខភ្នំពេញ 1AQ- 4819 ជាប្រភេទរថយន្តតាក់ស៊ីឯកជន មកដល់ចំណុចកើតហេតុខាងលើ គាត់មានអារម្មណ៍ថា អស់កម្លាំងពេក ទើបបើករថយន្តទៅផ្ទះ រួចទុកវាចោលនៅមុខផ្ទះជួល ហើយចូលទៅសម្រាកជាមួយប្រពន្ធ លុះពេលភ្ញាក់ទ្បើង ក៏ចេញទៅអើតមើលរថយន្ត ស្រាប់តែបាត់រថយន្តក៏ស្រែកឆោឡោនៅមុខផ្ទះ សំណាងល្អដែលរថយន្តគាត់មានភ្ជាប់ប្រព័ន្ធ GPS បានបើកមើលទៅឃើញរថយន្តនោះកំពុងតែចតនៅទីតាំងខាងលើ ទើបទៅប្តឹងសមត្ថកិច្ច ជួយអន្តរាគមន៍ ខណ:ជនសង្ស័យនោះ បានផ្តាច់ប្រពន្ធភ្លើង ក្នុងរថយន្តអស់រលីង ។
បច្ចុប្បន្នជនរងគ្រោះ បានមកដាក់ពាក្យបណ្តឹង នៅប៉ុស្តិ៍រដ្ឋបាលកាកាបទី១ ដើម្បីឲ្យសមត្ថកិច្ច ធ្វើការស្រាវជ្រាវវែករកមុខជនសង្ស័យ យកមកផ្តន្តាទោសនៅចំពោះមុខច្បាប់៕
មតិយោបល់