កំពង់ធំ: កាលពីវេលាម៉ោង៣និង៤៥នាទីរសៀល ថ្ងៃទី២២ ខែឧសភា ឆ្នាំ២០១៨ មានករណីស្រ្តីម្នាក់ខ្យល់គស្លាប់ នៅភូមិខ្វាន់ទៀង ឃុំសាលាវិស័ ស្រុកប្រាសាទបល្ល័ង្ក ខេត្តកំពង់ធំ។

សពជនរងគ្រោះមានឈ្មោះ ហ៊ូ ភ័ណ ភេទស្រី អាយុ៤៦ឆ្នាំ រស់នៅភូមិឃុំកើតហេតុ។

តាមការបំភ្លឺរបស់ឈ្មោះ គីម ធី ភេទប្រុស អាយុ៤៦ឆ្នាំ មុខរបរ ធ្វើស្រែ ត្រូវជាប្ដីបានបំភ្លឺថា នៅថ្ងៃទីកើតហេតុវេលាម៉ោងប្រហែល ៧និង៣០នាទី ជនរងគ្រោះកូនៗចំនួន៦នាក់ និងអ្នកភូមិ៤នាក់ទៀតបាននាំគ្នាទៅចម្ការនៅតំបន់ត្រពាំងក្ដា ចម្ងាយប្រហែល ៣គ.ម ខាងលិចភូមិខ្វាន់ទៀង ដើម្បីទៅមើលត្រាក់ទ័រភ្ជួរដីចាក់រងដាំកូនស្វាយចន្ទី លុះដល់ម៉ោងប្រហែល៣ ស្រាប់តែឃើញឈ្មោះ អឿ ប៊ុនលាង ភេទប្រុស នៅភូមិជាមួយ បានមកឃាត់មិនឲ្យត្រាក់ទ័រភ្ជួរទេ ដោយប្រាប់ថាភ្ជួរចូលដីគាត់ហើយ ពេលនោះប្រពន្ធរបស់គាត់បានប្រកែកគ្នាជាមួយឈ្មោះ លាង ហើយឈ្មោះ លាង ថែមទាំងបានយកម៉ែត្រមកទាញវាស់ដីនោះជាមួយកូនប្រុសរបស់ខ្លួន និងបានប្រកែកសម្តីគ្នាខ្លាំងៗ តែមិនមានវាយតប់គ្នាទេ ក្រោយពីប្រកែកគ្នាហើយឈ្មោះ លាង ក៏ដើរចេញទៅ ស្រាប់តែខ្ញុំបាទឃើញជនរងគ្រោះដួល ឃើញដូចនោះខ្ញុំបាទក៏រត់ទៅបី យកទៅសង្គ្រោះនៅមណ្ឌលសុខភាពសាលាវិស័យ តែគ្រូពេទ្យបានប្រាប់ថា ជនរងគ្រោះបានដាច់ខ្យល់ស្លាប់បាត់ទៅហើយ។

ក្រោយពីទទួលបានព័ត៌មានភ្លាមកម្លាំងជំនាញ និងប៉ុស្ដិ៍ន.បសាលាវិស័យ បានចុះដល់ កន្លែងកើតហេតុ និងបានពិនិត្យឃើញថាជនរងគ្រោះពិតជាស្លាប់ដោយសារគាំងបេះដូងប្រាកដមែន។
មូលហេតុ: ខឹងខ្លាំងពេក ទើបបណ្ដាលគាំងបេះដូង។
សាកសពបានប្រគល់ជូនក្រុមគ្រួសារធ្វើបុណ្យតាមប្រពៃណី៕