កោះកុង: យោងតាមផេក អគ្គនាយកដ្ឋានកាំកុងត្រូល បានឲ្យដឹងថា នៅថ្ងៃទី៣០ ខែសីហា ឆ្នាំ២០១៨ សាខាកាំកុងត្រូលខេត្តកោះកុង បានសហការជាមួយសមត្ថកិច្ចពាក់ព័ន្ធចុះត្រួតពិនិត្យ គុណភាព សុវត្ថិភាព ផលិតផលទំនិញ ម្ហូបអាហារ បន្លែ ផ្លែឈើ តាមគោលដៅដូចខាងក្រោម៖
១-ទំនិញនាំចូលមកពីប្រទេសថៃ នៅច្រកអន្តរជាតិចាំយាម ស្ថិតក្នុងស្រុកមណ្ឌលសីមា ខេត្តកោះកុង។
មន្ត្រីយើងបានធ្វើតេស្តបឋមលើបន្លែ ផ្លែឈើ ចំនួន១៥មុខរួមមាន៖ ផ្លែម្ទេស ផ្លែពុទ្រា ផ្លែននោង ក្រកួន ជីវាន់ស៊ុយ សណ្តែកបណ្តុះ សាឡាដ ស្ពៃក្រញាញ់ ស្លឹកខ្ទឹម ប្រពាយ ស្លឹកគ្រៃ ជីនាងវង ខ្ញី ។
២-យោងតាមសេចក្តីជូនដំណឹងរបស់អគ្គនាយកដ្ឋានកាំកុងត្រូលនៃក្រសួងពាណិជ្ជកម្ម (ចុះថ្ងៃទី២៩ខែសីហាឆ្នាំ២០១៨) អំពីករណីម្សៅទឹកដោះគោមានបាក់តេរី Cronobacter sakazakii នៅក្នុងគំរូផលិតផលម្សៅទឹកដោះគោសម្រាប់ទារក ម៉ាកDumex Mamil Gold Infant Milk Formula-Step1 ដែលមានប្រភពដើមនៅប្រទេសម៉ាឡេស៊ី។ ដោយទទួលបានសេចក្តីជូនដំណឹងរបស់អគ្គនាយកដ្ឋានកាំកុងត្រូលភ្លាម មន្ត្រីសាខាកាំកុងត្រូលខេត្តកោះកុង បានចុះស្រាវជ្រាវស្វែងរកម្សៅទឹកដោះគោខាងលើ នៅផ្សារដងទង់ និងតាមបណ្តាម៉ាតជុំវិញផ្សារ។
លទ្ធផល៖
-ធ្វើតេស្តបឋមលើបន្លែ ផ្លែឈើ ចំនួន១៥មុខនៅច្រកអន្តរជាតិចាំយាមមិនមានវត្តមានសារធាតុគីមីដែលច្បាប់ហាមឃាត់ឡើយ។
-ម្សៅទឹកដោះគោមានបាក់តេរី Cronobacter sakazakii នៅក្នុងគំរូផលិតផលម្សៅទឹកដោះគោសម្រាប់ទារក ម៉ាកDumex Mamil Gold Infant Milk Formula-Step1 ដែលមានប្រភពដើមនៅប្រទេសម៉ាឡេស៊ី មិនមានវត្តមានម្សៅទឹកដោះគោខាងលើឡើយ។
-បានណែនាំដល់អាជីវករ អំពីការរក្សាទុកទំនិញ ការមើលកាលបច្ឆេទ មុននឹងទិញទំនិញមកលក់បន្ត និងការទទួលខុសត្រូវតាមផ្លូវច្បាប់ របស់អ្នកលក់អំពីផលិតផល ទំនិញ ម្ហូបអាហារ របស់ខ្លួន ៕
មតិយោបល់