ភ្នំពេញ: ករណីគ្រោះថ្នាក់ចរាចរណ៍កើតឡើងច្រើនករណី ជាក់ស្ដែងគ្រោះថ្នាក់ចរាចរណ៍មួយបានកើតឡើង ដោយជនជាតិម៉ាឡេស៊ី២នាក់ បើករថយន្តម៉ាក TACOMA ប្រដេញគ្នាជាមួយរថយន្តឡង់គ្រីស័រ មួយគ្រឿងទៀត បើកបរដោយជនជាតិជប៉ុន២នាក់ បានវ៉ាជែងគ្នាមិនផុត ក៏ជ្រុលទៅបុកចំបញ្ឆិតពីមុខ បណ្ដាលឲ្យរេចង្កូតទៅបុកតូបយាមរបស់សន្តិសុខ ខ្ទេចអស់ និងបុកបាក់ដើមចំប៉ាអស់១ដើមទៀត បាក់ដាច់ទាំងគល់ រួចបន្តទៅបុកបង្គោលភ្លើងថ្ម បាក់អស់ចំនួន១ដើម បណ្តាលឲ្យរថយន្តបោកផ្ទប់ជាប់និងបង្គោលភ្លើង រងការខូចខាតយ៉ាងដំណំ តែសំណាងល្អមិនបណ្ដាលឲ្យមនុស្សរងរបួសនោះទេ ។
ហេតុការណ៍គ្រោះថ្នាក់ចរាចរណ៍ដ៏សាហាវដូចរឿងកុននេះបានកើតឡើងកាលពីវេលាម៉ោង០៣និង០០នាទីទៀបភ្លឺ ថ្ងៃទី០៣ ខែតុលា ឆ្នាំ២០១៨ នៅត្រង់ចំណុចផ្លូវបែកជាបួន ផ្លូវ៦៣ កែងផ្លូវលេខ៤០០ ស្ថិតក្នុងសង្កាត់បឹងកេងកង១ ខណ្ឌចម្ការមន រាជធានីភ្នំពេញ ។
ប្រភពពីសន្តិសុខយាមសណ្ឋាគារទល់មុខកន្លែងកើតហេតុបានប្រាប់ឲ្យដឹងថា នៅមុនពេលកើតហេតុ គេឃើញ រថយន្តមួយគ្រឿង ម៉ាក TOYOTA TACOMA ពណ៌ស ពាក់ស្លាកលេខ ភ្នំពេញ 2AQ-5114 បើកបរដោយជនជាតិម៉ាឡេស៊ី២នាក់ ធ្វើដំណើរពីត្បូងទៅជើង ដោយឃើញបើកប្រដេញគ្នាជាមួយរថយន្តមួយគ្រឿងទៀត ម៉ាកឡង់គ្រីស័រ ពណ៌ខ្មៅ ពាក់ស្លាកលេខ ឧត្ដរមានជ័យ 2A-0205 ក្នុងល្បឿនយ៉ាងលឿនដូចគ្នា ខណ:ពេលមកដល់ចំណុចកើតហេតុដែលជាផ្លូវបែកជាបួន មិនព្រមបន្ថយល្បឿនទេ រថយន្ត TACOMA បានបន្ថែមល្បឿន ដើម្បីវ៉ាជែងឲ្យផុត ស្រាប់តែរថយន្តឡង់គ្រីស័របានបន្ថែមល្បឿនដែរ ហើយរថយន្តទាំង២គ្រឿងរេចង្កូតមកអែបក្បែរគ្នា ហើយរថយន្តឡង់គ្រីស័រក៏បានបុករថយន្ត TACOMA ប៉ះបញ្ឆិតចំខាងមុខ បណ្ដាលឲ្យរថយន្តឡង់គ្រីទាញចង្កូតមកវិញជ្រុលឡើងទៅលើចិញ្ចើមផ្លូវ បុករះតូបយាមរបស់សន្តិសុខ ខ្ទេចអស់ទាំងស្រុង និងបុកដើមចំប៉ា បាក់អស់១ដើមទៀត ដាច់ត្រឹមគល់ រួចរថយន្តមិនទាន់អស់ល្បឿន បន្តទៅបុកផ្ទប់បង្គោលភ្លើងថ្ម ពេញទំហឹង បណ្ដាលឲ្យបាក់បង្គោលភ្លើងចំនួន១ដើម។ ចំណែកឯរថយន្តបោកជាប់នឹងបង្គោលភ្លើងអែបទៅជាប់របងផ្ទះវីឡា រងការខូចខាតយ៉ាងដំណំ និងបែកកញ្ចក់ខាងមុខចំហៀងខាងស្ដាំ និងខ្ទាតកម្ទេចកម្ទីបាក់បែក រប៉ាត់រប៉ាយពេញផ្លូវ។ ចំណែកឯរថយន្ត TACOMA ខ្ទាតវិលមកក្រោយ១ជុំ រងការខូចខាតរថយន្តខាងមុខចំហៀងខាងស្ដាំយ៉ាងដំណំផងដែរ តែសំណាងល្អមិនបណ្ដាលឲ្យមនុស្សរងរបួសនោះទេ ។
ក្រោយកើតហេតុ សមត្ថកិច្ចមូលដ្ឋានបានចុះមកដល់កន្លែងកើត រាយការណ៍ប្រាប់សមត្ថកិច្ចជំនាញ ចុះមកធ្វើការវាស់វែង រួចស្ទូចយករថយន្តទាំង២គ្រឿង ទៅរក្សាទុកនៅការិយាល័យចរាចរណ៍ជើងគោក នៃស្នងការដ្ឋាននគរបាលរាជធានីភ្នំពេញ ដើម្បីរង់ចាំធ្វើការដោះស្រាយ សងថ្លៃខូចខាតទ្រព្យសម្បត្តិរដ្ឋ តាមផ្លូវច្បាប់៕
មតិយោបល់