ភ្នំពេញ: នារីដែលជាជនជាតិចិនម្នាក់បើករថយន្តឆ្លងផ្លូវខ្វះការប្រុងប្រយ័ត្ន ហើយម៉ូតូ២គ្រឿងចាប់ហ្វ្រាំងមិនទាន់មកបុកពេញទំហឹង បណ្តាលឲ្យរងរបួសធ្ងន់ម្នាក់និងស្រាលម្នាក់ បង្កឲ្យមានការភ្ញាក់ផ្អើលកាលពីវេលាម៉ោង៨និង៣០៥នាទីយប់ ថ្ងៃទី០២ ខែតុលា ឆ្នាំ២០១៨ ទីតាំងនៅមុខបុរីញ៉ូថោន ស្ថិតនៅតាមបណ្ដោយផ្លូវជាតិលេខ៤ ភូមិអង្គ សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ ។
នារីជនជាតិចិនខាងលើបើករថយន្តម៉ាក កូរ៉ូឡា ពណ៌ទឹកប្រាក់ ពាក់ស្លាកលេខ ភ្នំពេញ 2D -1738 បើកបរក្នុងទិសដៅពីជើងទៅត្បូងជិះឆ្លងផ្លូវ ។ ចំណែកម៉ូតូរងគ្រោះទាំងពីរគ្រឿង មួយគ្រឿងម៉ាកហុងដាឌ្រីម ស៊េរីឆ្នាំ២០១២ ពណ៌ខ្មៅ ពាក់ស្លាកលេខ កណ្តាល 1M-2773 បើកបរក្នុងទិសដៅពីលិចទៅកើតរងរបួសធ្ងន់ និងម៉ូតូមួយគ្រឿងទៀត ម៉ាកហុងដាឌ្រីម ស៊េរីឆ្នាំ២០១២ ពណ៌ខ្មៅ ពាក់ស្លាក ភ្នំពេញ 1BH -7983 បើកបរក្នុងទិសដៅពីលិចទៅកើតរងរបួសធ្ងន់ ត្រូវជាមិត្តភក្ដិនិងគ្នាផងដែរ។
តាមប្រភពព័ត៌មានពីប្រជាពលរដ្ឋនៅកន្លែងកើតហេតុ បាននិយាយប្រាប់ ថា គេឃើញនារីជនជាតិចិនម្នាក់ បើកបរខ្វះប្រុងប្រយ័ត្នបានបើកឆ្លងផ្លូវមិនស៊ីញ៉ូ ត្រូវបានយុវជន២នាក់ជិះម៉ូតូ២គ្រឿងចាប់ហ្វ្រាំងមិនទាន់ជ្រុលទៅបុករថយន្តនារីជនជាតិចិនខាងលើពេញទំហឹងបណ្តាលឲ្យរងរបួសធ្ងន់២នាក់ ។
ប្រភពព័ត៌មានបានបន្តទៀតថា ខណ:ពេលភ្លាមៗជនរងគ្រោះដែលរងរបួសធ្ងន់ម្នាក់ ត្រូវបានរថយន្តសង្គ្រោះរបស់គ្លីនិកឯកមកដឹកយកទៅសង្គ្រោះនៅគ្លីនិកជិតកន្លែងកើតហេតុភ្លាមៗផងដែរ ។
បន្ទាប់មកនគរបាលប៉ុស្តិ៍ចោមចៅ៣បានឲ្យភាគីតំណាងទាំងសង្ខាងដោះស្រាយគ្នាសិន ក្រែងនឹងអាចដោះស្រាយបាន ខណ:ពេលកំពុងដោះស្រាយស្រាប់តែមានបុរសម្នាក់ដែលចេះភាសា ចិន មកដល់បានឈ្លោះជាមួយសមត្ថកិច្ចគ្រប់ៗគ្នា ហើយដើរថត សមត្ថកិច្ចជាប់រហូតទៀតផង ធ្វើឲ្យ សមត្ថកិច្ចនគរបាលប៉ុស្តិ៍ ដោះស្រាយមិនចេញ ទើបហៅជំនាញចរាចរណ៍ខណ្ឌពោធិ៍សែនជ័យ មកដោះស្រាយ។ លុះពេលជំនាញចរាចរណ៍ខណ្ឌពោធិ៍សែនជ័យមកដល់ ឈ្លោះជាមួយនគរបាលជំនាញទៀត ទើបធ្វើឲ្យសមត្ថកិច្ចស្តីឲ្យនៅកន្លែងផងដែរ ហើយក៏ជិះម៉ូតូចេញបាត់ទៅ។
ក្រោយពេលកើតហេតុ ពេលបុរសខាងលើចេញទៅបាត់ នគរបាលជំនាញចរាចរណ៍ខណ្ឌពោធិ៍សែនជ័យ សំរបសំរួលនៅកន្លែងកើតហេតុ ដោយភាគីខាងរថយន្តសងទៅជនរងគ្រោះទាំង២នាក់ ចំនួន៨០០ដុល្លារ ដើម្បីបញ្ចប់រឿងនៅកន្លែងកើតហេតុ៕
មតិយោបល់