ភ្នំពេញ: ជនសង្ស័យ២នាក់ប្រដាប់ដោយកាំបិត បានធ្វើសកម្មភាព ភ្ជង់ប្លន់ ជនជាតិចិនយកលុយអស់ ចំនួនប្រមាណជាង៣ម៉ឺនដុល្លារ ដល់ក្នុងហាងលក់ភេសជ្ជ:មួយកន្លែងបានសម្រេចរួចគេចខ្លួនបាត់ដោយសុវត្ថិភាព មិនរំខានដល់កម្លាំងសមត្ថកិច្ចនោះទេ ។
ហេតុការណ៍នេះបានកើតឡើងនៅវេលាម៉ោងជាង១១យប់ ថ្ងៃទី១៥ ខែតុលា ឆ្នាំ២០១៨ នៅក្នុងហាងលក់ភេសជ្ជ:មួយកន្លែង ផ្ទះលេខ២០Eo យីហោ (ឈិន ស៊ិន) ដែលមានទីតាំងនៅតាមបណ្ដោយផ្លូវ៦៣ វិថីត្រសក់ផ្អែម ទល់មុខផ្សារទំនើបសូរិយា ស្ថិតក្នុងសង្កាត់ផ្សារថ្មី១ ខណ្ឌដូនពេញ រាជធានីភ្នំពេញ។
ជនជាតិចិនរងគ្រោះមិនត្រូវបានស្គាល់អត្តសញ្ញាណនោះទេ ។
ប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ គាត់មិនដឹងថាជនសង្ស័យទាំង២នាក់នោះ តាមជនរងគ្រោះមកពីណានោះទេ គាត់ដឹងត្រឹមតែឃើញជនសង្ស័យ២នាក់ បានចូលទៅក្នុងហាងកើតហេតុខាងលើ ហើយមួយសន្ទុះក្រោយមកក៏ឃើញជនសង្ស័យទាំងនោះ ចេញមកវិញ ដោយប្រញ៉ាប់ប្រញ៉ាល់ឡើងរ៉ឺម៉កកង់បី ជិះចេញទៅបាត់ ដោយសុវត្ថិភាព មិនរំខានដល់កម្លាំងសមត្ថកិច្ចនោះទេ ទើបជនជាតិចិនរងគ្រោះ ស្រែកឆោឡោឡើងថាជាករណី ប្លន់ យកលុយអស់ ចំនួនប្រមាណជាង៣ម៉ឺនដុល្លារ ទើបបង្កការភ្ញាក់ផ្អើលដល់សមត្ថកិច្ចចុះមកកន្លែងកើតហេតុតែម្ដង ។
ពាក់ព័ន្ធនឹងករណីនេះ លោកអធិការរងនគរបាលខណ្ឌដូនពេញម្នាក់ បានបញ្ជាក់ប្រាប់ឲ្យដឹងថា ចំពោះករណីប្លន់ជនជាតិចិន យកលុយ អស់ជាង៣ម៉ឺនដុល្លារខាងលើនេះ ពិតជាមានប្រាកដមែន ខណ:ពេលនេះសមត្ថកិច្ចបាននាំជនជាតិចិនរងគ្រោះ មកធ្វើការសាកសួរប៉ុស្តិ៍នគរបាលផ្សារថ្មីទី១ ៕
មតិយោបល់