ភ្នំពេញ: បុរសវ័យប្រហែល២៥ឆ្នាំម្នាក់ សង្ស័យស្រវឹងស្រាបើកបររថយន្តស៊េរីទំនើបមួយគ្រឿង បោះពួយយ៉ាងលឿនដូចហោះ ហើយក៏រេចង្កូតទៅបុករបាំងថ្មពុះចែកទ្រូងនិងបន្តឆ្លងទៅផ្លូវម្ខាងទៀតទៅបុកនិងដើមផ្ការំយោលមួយដើមរួមទាំងរបងសាលាជាស៊ីមសាមគ្គីមួយផ្ទាំង បណ្តាលឲ្យរថយន្តក្រឡាប់ផ្ងារជើងបង្កជាអគ្គិភ័យឆាបឆេះរថយន្តអស់ទាំងស្រុង បង្កឲ្យមានការភ្ញាក់ផ្អើលយ៉ាងខ្លាំងប្រជាពលរដ្ឋនិងរថយន្តពន្លត់អគ្គិភ័យកាលពីវេលាម៉ោង១០និង៥០នាទីយប់ ថ្ងៃទី០៧ ខែវិច្ឆិកា ឆ្នាំ២០១៨ ត្រង់ចំណុចខាងមុខវិទ្យាល័យ ជា ស៊ីមសាមគ្គី តាមបណ្ដោយផ្លូវ២៧១ ស្ថិតក្នុងសង្កាត់ទឹកល្អក់ទី៣ ខណ្ឌទួលគោក។
តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេឃើញបុរសម្នាក់ទំនងជាស្រវឹងស្រា បានបើកបររថយន្តមួយគ្រឿងម៉ាក ឡង់គ្រីស័រ ស៊េរី០១៨ ពណ៌ស ពាក់ស្លាកលេខ ភ្នំពេញ2AV-0079។ ដោយធ្វើដំណើរតាមបណ្តោយផ្លូវ២៧១ ក្នុងទិសដៅបើកមកពីស្តុបណូគាឆ្ពោះទៅស្ពានអាកាសស្ទឹងមានជ័យ និងក្នុងលឿនយ៉ាងលឿនដូចហោះ។ លុះមកដល់ចំណុចកើតដែលផ្លូវមានស្ថានភាពកោង ស្រាប់តែរថយន្តបង្កខាងលើបានរេចង្កូតទៅខាងឆ្វេងទៅបុកនិងរបាំងថ្មពុះចែកទ្រូងផ្លូវបណ្ដាលឲ្យបែកអស់មួយចំណិតធំល្មម តែរថយន្តបង្កនៅមិនទាន់អស់ល្បឿន ក៏ជ្រុលចង្កូតឆ្លងទៅផ្លូវ ទៅបុកបង្គោលថ្មរបស់សាលាដែលសម្រាប់ថ្ពក់ច្រវាក់ដាក់ពទ្ធជុំវិញរបងសាលាបណ្ដាលឲ្យបាក់អស់៣ដើម។ ប៉ុន្តែរថយន្តបង្កនៅតែមិនទាន់អស់ល្បឿនក៏ជ្រុលឡើងលើឃឿនទៅបុកដើមផ្ការំយោលទំហំប្រមាណពីរទឹកចំនួនមួយដើមបណ្ដាលឲ្យបាក់ដាច់ជា២កំណាត់។ ហើយរថយន្តបង្កក៏បានខ្ទាតផ្លោងទៅប៉ះនឹងរបងសាលាមួយផ្ទាំងរងការខូចខាតបែកប្រេះ ទើបបណ្តាលឲ្យក្រឡាប់ផ្ងារជើងបែរក្បាលត្រឡប់ក្រោយគងលើដើមផ្ការំយោលមួយដើមទៀតរងការខូចខាតយ៉ាងដំណំ។
ប្រភពដដែលបន្តថា មួយស្ទុះក្រោយមកក៏ឃើញបុរសដែលជាអ្នកបើកបររថយន្តបង្កខាងលើ បានវាចេញមកពីក្នុងរថយន្តរួចបានគេចខ្លួនចេញពីកន្លែងកើតហេតុបាត់ស្រមោល។ បន្ទាប់មកក៏ស្រាប់តែមានផ្សែងហុយខ្មួលខ្មាញ់លាយឡំនឹងអណ្ដាតភ្លើងចេញមកពីក្នុងរថយន្តខាងលើ។ ភ្លាមនោះក៏មានប្រជាពលរដ្ឋដែលរស់នៅក្បែរកន្លែងកើតហេតុបាននាំគ្នាយកបំពង់ពន្លត់អគ្គិភ័យមកបាញ់ពន្លត់អស់២ទៅ៣បំពង់ ប៉ុន្តែអណ្ដាតភ្លើងនៅតែបន្តឆាបឆេះរថយន្តបង្កកាន់តែខ្លាំងៗ។ ហើយប្រជាពលរដ្ឋក៏បានរាយការណ៍ជូនសមត្ថកិច្ចមូលដ្ឋាននិងរថយន្តពន្លត់អគ្គិភ័យឲ្យចុះមកជួយអន្តរាគមន៍។ រួចក៏មានរថយន្តពន្លត់អគ្គិភ័យរបស់ស្នងការនគរបាលរាជធានីភ្នំពេញចំនួនមួយគ្រឿងចុះមក ហើយក៏បានធ្វើការបាញ់ពន្លត់ ទើបរលត់ជាស្ថាពរ បង្ករថយន្តខាងលើរងការខូចខាតអស់តែកោងដែកតែប៉ុណ្ណោះ។
ក្រោយពេលកើតហេតុសមត្ថកិច្ចមូលដ្ឋានបានទាក់ទងទៅសមត្ថកិច្ចជំនាញឲ្យចុះមកធ្វើការស្ទូចយករថយន្តខាងលើទៅរក្សាទុកនៅឯការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញដើម្បីរង់ចាំម្ចាស់ចូលខ្លួនមកធ្វើការដោះស្រាយទៅតាមផ្លូវច្បាប់នៅពេលក្រោយ៕
មតិយោបល់