ត្បូងឃ្មុំ: កាលពីវេលាម៉ោង៤និង៣០នាទីរសៀលថ្ងៃទី៩ ខែវិច្ឆិកា ឆ្នាំ២០១៨ មានការភ្ញាក់ផ្អើលយ៉ាងខ្លាំងមួយបានកើតឡើង ខណ:ដែលមានការប្រទះឃើញសាកសពបុរសម្នាក់ មានវ័យប្រមាណ៤០ឆ្នាំ បានអណ្តែតក្នុងទឹកព្រែក ក្នុងសភាពស្អុយរលួយស្លាប់ប្រហែល៧ថ្ងៃហើយ ដោយលក្ខណ:សព មានសណ្តូនដុំថ្មចំនួន៧នៅលើសពផងដែរ ស្ថិតនៅចំណុចភូមិព្រែកពួយ ឃុំគគីរ ស្រុកមេមត់ ខេត្តត្បូងឃ្មុំ។
ប្រភពព័ត៌មានបានឲ្យដឹងថា សពជនរងគ្រោះរូបនេះ មិនទាន់ស្គាល់អត្តសញ្ញាណនោះទេ មានស្នាមចាក់សាក់រូបនាគ២នៅដៃខាងស្តាំ ហើយត្រូវបានគេសម្លាប់ប្រមាណជា៧ថ្ងៃមកហើយ ក្រោយពីសម្លាប់ដោយមានស្នាមរឹតក ចាក់ និងជាំក្បាលជង្គង់រួច ជនល្មើសបានសែងសពសណ្តូនជាមួយដុំថ្ម៧ដុំយកមកទម្លាក់ចូលក្នុងទឹកព្រែកដែលមានជម្រៅត្រឹមភ្លៅមនុស្សចាស់ដើម្បីបំបាត់ភស្តុតាងតែម្តង។
ក្រោយកើតហេតុសពត្រូវបានលោកព្រះរាជអាជ្ញាអមសាលាដំបូងខេត្ត សម្រេចយកទៅបូជាសពយកធាតុទុក ដោយបានធ្វើតាមប្រពៃណី៕
មតិយោបល់