កំពង់ស្ពឺ: នៅរសៀលថៃ្ងអាទិត្យទី១១ ខែវិច្ឆិកា ឆ្នាំ២០១៨ វេលាម៉ោង៤និង៤០នាទី នៅចំណុចគោលដៅការពារ មុខសាលាខេត្ដកំពង់ស្ពឺ មានករណីយុវជនទំពាំងស្នងឫស្សី សរសេរទ្រូងរបស់ប្រទេសជាតិម្នាក់ឈ្មោះ វ៉ាត ណាវិន ភេទប្រុស អាយុ២៧ឆ្នាំ រស់នៅភូមិក្រាំងចេក ឃុំក្រាំងចេក ស្រុកឧដុង្គ ខេត្តកំពង់ស្ពឺ បានបើកម៉ូតូ មួយគ្រឿងម៉ាក Honda Dream NCX C125 ពណ៌ខ្មៅ ស្លាកលេខ កំពង់ស្ពឺ 1K-9539 គ្មានកញ្ចក់មើលក្រោយ គ្មានមួកសុវត្ថិភាព បានបើកបំបុករនាំងការពារក្នុងពិធីប្រណាំងទូកអុំ ផ្កាចារនៅដងស្ទឹងព្រែកត្នោត និងបានស្រែកឡូឡា ជេរប្រមាថដល់មន្រ្ដីនគរបាលដែលកំពុងតែបំពេញភារកិច្ចការពារ សន្ដិសុខ សណ្ដាប់ធ្នាប់នៅគោលដៅខាងលើដោយបានប្រើសម្ដីអួតក្អេងក្អាងថាខ្លួនជាអ្នកស្រុកក្រាំងចេក នៅឧដុង្គ ស្គាល់អត់.! កុំចង់ខ្លាំង អា! នគរបាលកំប៉ិកកំប៉ុក យើងចង់ជិះម៉ូតូចូលទៅវេទិការអុំទូកម៉េចមិនបាន ហេតុអីឃាត់ម៉ូតូដាក់បារាស់ហ្នឹងមានសុំថ្នាក់លើនៅ ( បញ្ជាក់ថានៅខេត្ដកំពង់ស្ពឺមានការរៀបចំពិធីប្រណាំងទូកអុំ អបអរសាទរក្នុងពិធីបុណ្យអុំទូក បណ្ដែតប្រទីប អកអំបុក សំពះព្រះខែ ជាបុណ្យប្រពៃណីជាតិខ្មែរ ) ។
ក្រោយឃាត់ខ្លួនយុវជនទំពាំងស្នងឫស្សី ជំនាញចរាចរណ៍ខេត្ដបានពិនិត្យឃើញថាយុវជននេះមានជាតិអាល់កុល 0.60 មីលីក្រាមក្នុងមួយលីត្រខ្យល់ដែលលើសពីកម្រិតនៃច្បាប់កំណត់ ដែលត្រូវធ្វើការពិន័យជាប្រាក់ប្រមាណ២០ម៉ឺនរៀលគត់ និងដកហូតមធ្យោបាយយានជំនិះទុកមួយរយ:ពេល មិនគិតអំពីអំពើល្មើស (បទល្មើសព្រហ្មទណ្ឌ)ករណីពាក់ព័ន្ធបទល្មើសផ្សេងទៀត គឺត្រូវតែចាត់ការតាមនីតិវិធី។
បច្ចុប្បន្នយុវជនទំពាំងស្នងឫស្សីខាងលើ ត្រូវបានជំនាញឃាត់ខ្លួនបណ្ដោះអាសន្ននៅស្នងការដ្ឋាននគរបាលខេត្ដកំពង់ស្ពឺ៕
មតិយោបល់