ភ្នំពេញ: នារីរូបស្រស់ម្នាក់បានបោកក្បាលនឹងថ្នល់រងរបួសធ្ងន់ ហើយបានស្លាប់ខណ:ពេលបានបញ្ជូនទៅសង្គ្រោះនៅឯមន្ទីរពេទ្យកាល់ម៉ែត បន្ទាប់ពីជិះម៉ូតូមួយគ្រឿងចេញពីក្លឹប បែរជាទៅបុកឃឿនចិញ្ចើមផ្លូវ ដួលបោកក្បាលពេញទំហឹង។
ហេតុការណ៍គ្រោះថ្នាក់ចរាចរណ៍នេះបានកើតឡើងនៅវេលាម៉ោង១១និង២០នាទីយប់ ថ្ងៃទី៣០ ខែវិច្ឆិកា ឆ្នាំ២០១៨នេះ ត្រង់ចំណុចទល់មុខរោងចក្រផលិតផ្លាស្ទិក ជិតមជ្ឈមណ្ឌលម៉ូឌែន២ ស្ថិតនៅលើកំណាត់ផ្លូវជាតិលេខ២ ភូមិព្រែកតាឡុង១ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ។
ប្រភពព័ត៌មានពីបងប្រុសម្នាក់ដែលជាអ្នកឃើញហេតុការណ៍ផ្ទាល់បានប្រាប់ឲ្យដឹងថា នៅមុនពេលកើតហេតុ គាត់ឃើញនារីរងគ្រោះ ទើបចេញពីក្លឹបមួយនៅចាក់អង្រែ ហើយបានជិះមួយគ្រឿង ម៉ាក Suzuku Nex ពណ៌សលាយខ្មៅ ពាក់ស្លាកលេខកណ្ដាល 1T-9561 តែម្នាក់ឯង ដោយធ្វើដំណើរតាមបណ្ដោយផ្លូវជាតិលេខ២ ក្នុងទិសដៅពីត្បូងទៅជើង (ដោយមិនដឹងថាទៅផ្ទះ ឬក៏ទៅណានោះទេ) លុះមកដល់ចំណុចកើតហេតុខាងលើ ស្រាប់តែជិះទៅបុកឃឿនចិញ្ចើមផ្លូវ បណ្ដាលឲ្យដួលបោកក្បាល រងរបួសធ្ងន់បន្ទាប់ ត្រូវប្រជាពលរដ្ឋដែលជាអ្នកឃើញហេតុការណ៍រាយការណ៍ប្រាប់សមត្ថកិច្ច និងជួយទាក់ទងរថយន្តគ្លីនិកឯកជន មហានគរ មកដឹកយកទៅសង្គ្រោះបន្ទាន់នៅមន្ទីរពេទ្យកាល់ម៉ែត។
បើតាមអ្នកបើកបររថយន្តសង្គ្រោះគ្លីនិក មហានគរ បានបញ្ជាក់ឲ្យដឹងថា បន្ទាប់ពីដាក់អុកស៊ីហ្សែនបានជាងកន្លះម៉ោង ក្រុមគ្រូពេទ្យសង្គ្រោះបន្ទាន់ក៏បានប្រាប់មកវិញថា មិនអាចជួយសង្គ្រោះបានទេ ជនរងគ្រោះបានដាច់ខ្យល់ស្លាប់បាត់ទៅ ព្រោះស្ថានភាពរបួសបោកក្បាលចំផ្នែកខាងក្រោយ ។
ក្រោយកើតហេតុសមត្ថកិច្ចមូលដ្ឋានបានទំនាក់ទំនងទៅសមត្ថកិច្ចជំនាញ ផ្នែកចរាចរណ៍ខណ្ឌមានជ័យ ចុះមកយកម៉ូតូជនរងគ្រោះទៅរក្សាទុកបណ្ដោះអាសន្ន នៅអធិការដ្ឋាននគរបាលខណ្ឌមានជ័យ ដើម្បីរង់ចាំសាច់ញាតិយកឯកសារមកផ្ទៀងផ្ទាត់ដើម្បីយកត្រឡប់ទៅផ្ទះវិញ។ ចំណែកសពជនរងគ្រោះត្រូវបានយកទៅតម្កល់ទុកនៅវត្តទឹកថ្លា ដើម្បីរង់ចាំសមត្ថកិច្ចជំនាញធ្វើកោលស្យវិច័យ និងទាក់ទងរកសាច់ញាតិក្រុមគ្រួសារ ឲ្យមកយកទៅធ្វើបុណ្យតាមប្រពៃណី៕
មតិយោបល់