បន្ទាយមានជ័យ: កាលពីវេលាម៉ោង៨ព្រឹកថ្ងៃទី០១ ខែធ្នូ ឆ្នាំ២០១៨ មន្ត្រីគយ និងរដ្ឋាករតំបន់៥ បានចាប់រថយន្តស៊េរីទំនើប២គ្រឿងគ្មានពន្ធ ពីផ្ទះឧកញ៉ាម្នាក់ ស្ថិតក្នុងភូមិបី សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ។
ប្រតិបត្តិការនេះ បានធ្វើទ្បើងដោយមានការណែនាំពីអគ្គនាយកដ្ឋានគយ និងរដ្ឋាករ ហើយមន្ត្រីគយ និងរដ្ឋាករតំបន់៥ នៃអគ្គនាយកដ្ឋានគយ និងរដ្ឋាករក្រសួងប្រចាំខេត្តបន្ទាយមានជ័យ សហការជាមួយកម្លាំងកងរាជអាវុធហត្ថផ្ទៃប្រទេស ដែលដឹកនាំដោយព្រះរាជអាជ្ញារងសាលាដំបូងខេត្តបន្ទាយមានជ័យ។
អំទ្បុងពេលចុះបង្ក្រាប កម្លាំងចម្រុះបានឃាត់រថយន្ត២គ្រឿងផលិតនៅឆ្នាំ២០១៦ ដែលជារថយន្តស៊េរីទំនើប១គ្រឿងធុន (TOYOTA.alpharo) ពណ៌ស និង១គ្រឿងទៀតធុន (TOYATA.vellfire) ពណ៌ស ដូចគ្នា ដែលឃាត់ ហើយចាប់នៅក្នុងបរិវេណផ្ទះឧកញ៉ាម្នាក់ នៅខេត្តបន្ទាយមានជ័យ។
សូមបញ្ជាក់ថា រថយន្តស៊េរីទំនើប២គ្រឿងនេះ ជារថយន្តចង្កូតស្តាំដែលគ្មានពន្ធ ឬគេចពន្ធ ល្មើសច្បាប់ ត្រូវបាននាំចូលពីប្រទេសជិតខាង ដោយល្មើសច្បាប់ និងត្រូវបានយកមកលាក់ទុកក្នុងភូមិគ្រឹះរបស់លោកឧកញ៉ាម្នាក់នេះ៕
មតិយោបល់