ភ្នំពេញ: ជនសង្ស័យម្នាក់ត្រូវបានសមត្ថកិច្ចចាប់ឃាត់ខ្លួន បន្ទាប់ពីធ្វើសកម្មភាពលួចដែកជាច្រើនដើមពីក្នុងដេប៉ូលក់គ្រឿងសំណង់មួយកន្លែង ខណ:ដែលម្ចាស់គេមិននៅ។
ហេតុការណ៍នេះបានកើតឡើងកាលពីវេលាម៉ោង៨និង៣០នាទីយប់ ថ្ងៃទី១២ ខែធ្នូ ឆ្នាំ២០១៨ត្រង់ចំណុចដេប៉ូលក់គ្រឿងសំណង់យីហោ ដេប៉ូ មុន្នី២ ដែលនៅតាមបណ្ដោយផ្លូវហាណូយ ស្ថិតក្នុងសង្កាត់ឃ្មួញ ខណ្ឌសែនសុខ។
ជនសង្ស័យមានឈ្មោះ មន ពេជ្រ ភេទប្រុស អាយុ២៧ឆ្នាំ មុនរបរមិនពិតប្រាកដ ស្នាក់នៅបន្ទប់ជួល ក្នុងសង្កាត់ឃ្មួញ ខណ្ឌសែនសុខ។
តាមសម្តីពីបុរសម្នាក់ឈ្មោះ បៀន មុន្នី អាយុ៥៦ឆ្នាំ ជាម្ចាស់ដេប៉ូកើតហេតុខាងលើបានឲ្យដឹងថា ជារៀងរាល់យប់គាត់ជាអ្នកសម្រាកនៅក្នុងដេប៉ូកើតហេតុខាងលើដើម្បីមើលការខុសត្រូវ។ ប៉ុន្តែដោយឡែកយប់ថ្ងៃកើតហេតុ គាត់បានចាក់សោទ្វារដេប៉ូរបស់គាត់ខាងលើហើយចេញទៅសម្រាកនៅផ្ទះរបស់គាត់ជាមួយនិងគ្រួសារ ដែលស្ថិតក្នុងភូមិដីថ្មី សង្កាត់គោកឃ្លាង ខណ្ឌសែនសុខ ដោយមិនបានសម្រាកនៅក្នុងដេប៉ូខាងលើដូចសព្វដងនោះទេ។
លុះមុនពេលកើតហេតុគាត់បានឆែកកាមេរ៉ាសុវត្ថិភាពពីផ្ទះរបស់គាត់ក្នុងទូរស័ព្ទដៃ ដែលគាត់បំពាក់នៅដេប៉ូខាងលើដើម្បីមើលសុវិត្ថភាពជុំវិញដេប៉ូ។ ខណ:ពេលនោះក៏ស្រាប់តែប្រទះឃើញជនសង្ស័យខាងលើជិះម៉ូតូមួយគ្រឿងម៉ាកគុបជ្រុង ពណ៌ខៀវ ពាក់ស្លាកលេខ ញ៩៣៤៧ ភព១ ទៅឈប់នៅធ្វើសកម្មភាពលូនចូលតាមខាងក្រោមទ្វារឃ្លាំង ចូលទៅលួចយកដែកសរសៃពីខាងក្នុងឃ្លាំងដេប៉ូសំណង់ខាងលើយកមកខាងលើបានជាច្រើនសរសៃ គឺប្រមាណជិតមួយតោន។ ភ្លាមៗនោះគាក៏បានរាយការណ៍ជូនសមត្ថកិច្ចមូលដ្ឋានចុះទៅអន្តរាគមន៍ចាប់ឃាត់ខ្លួនបានភ្លាមៗតែម្តង។
ក្រោយពេលកើតហេតុជនសង្ស័យខាងលើរួមទាំងវត្ថុតាងត្រូវបានកម្លាំងសមត្ថកិច្ចនាំខ្លួនយកទៅសាកសួរនាំនៅឯអធិការដ្ឋាននគរបាលខណ្ឌសែនសុខដើម្បីកសាងសំណុំរឿងរងចាំធ្វើការចាត់ការទៅតាមនីតិវិធីច្បាប់ជាបន្តទៀត៕
មតិយោបល់