ភ្នំពេញ: បុរសម្នាក់បានរងរបួសពេញខ្លួន បន្ទាប់ពីមានជនមិនស្គាល់មុខមួយក្រុម ជិះម៉ូតូកាន់កូនកាំបិតដេញតាមចាក់ប្រហារ រួចជិះគេចខ្លួនបានបាត់សម្រោល បង្កឲ្យមានការភ្ញាក់ផ្អើលកាលពីវេលាម៉ោង៩និង៥០នាទីយប់ ថ្ងៃទី១២ ខែធ្នូ ឆ្នាំ២០១៨ត្រង់ចំណុចខាងមុខហាងផឹកស៊ីយីហោ ផ្ទះផាតធី តាមបណ្តោយផ្លូវ២៦១ ស្ថិតក្នុងសង្កាត់ទឹកល្អក់ទី១ ខណ្ឌទួលគោក។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតគេឃើញបុរសរងគ្រោះខាងលើដែលមានវ័យប្រហែល៣០ឆ្នាំ បានជិះម៉ូតូមួយគ្រឿងម៉ាក ហុងដាឌ្រីម ស៊េរី០១៧ ពណ៌ខ្មៅ ពាក់ស្លាកលេខ ភ្នំពេញ1GD-0070 ដោយធ្វើដំណើរតាមបណ្តោយផ្លូវ២៦១ ក្នុងទិសដៅពីត្បូងទៅជើង។ លុះមកដល់ចំណុចកើតហេតុក៏ស្រាប់តែមានជនមិនស្គាល់មុខមួយក្រុមមានគ្នា៣នាក់ជិះម៉ូតូ២គ្រឿងមិនចាំម៉ាកមកពីក្រោយ ហើយជនមិនស្គាល់មុខមួយក្រុមនោះក៏បានធ្វើសកម្មភាពយកកូនកាំបិតចាក់ប្រហារទៅលើបុរសរងគ្រោះបណ្តាលឲ្យរងរបួសចំដៃ និងដងខ្លួនផ្នែកខាងឆ្វេងជាច្រើនកន្លែង ដោយមិនដឹងមូលហេតុ បង្កការភ្ញាក់ផ្អើលដល់ប្រជាពលរដ្ឋនាំគ្នាឆោឡោចេញមកមើល ភ្លាមៗនោះក្រុមជនមិនស្គាល់មុខខាងលើក៏បានជិះម៉ូតូរត់គេចខ្លួនបាត់ស្រមោលដោយសុវត្ថិភាព។
ក្រោយពេលកើតហេតុបុរសរងគ្រោះខាងលើត្រូវបានរថយន្តសង្គ្រោះបន្ទាន់ដឹកយកទៅសង្គ្រោះនៅឯមន្ទីរពេទ្យកាល់ម៉ែត។ ដោយឡែកម៉ូតូរបស់ជនរងគ្រោះត្រូវបានសមត្ថកិច្ចយកទៅរក្សាទុកនៅប៉ុស្តិ៍នគរបាលរដ្ឋបាលទឹកល្អក់ទី១ ដើម្បីរង់ចាំប្រគល់ទៅសាច់ញាតិជនរងគ្រោះវិញនៅពេលក្រោយ។ ចំពោះករណីខាងលើគឺមិនមានប្រភពណាមួយបញ្ជាក់ថាបណ្តាលមកពីមូលហេតុអ្វីនោះទេ ប៉ុន្តែសង្ស័យថាបណ្តាលមកពីរឿងគំនុំ៕
មតិយោបល់