ភ្នំពេញ: មន្រ្តីនគរបាលសេដ្ឋកិច្ចម្នាក់ លួចមានប្រពន្ធចុង បែកការណ៍ត្រូវប្រពន្ធដឹង ស្រាប់តែប្រើហិង្សា វាយដំប្រពន្ធនិងកូន បណ្ដាលឲ្យរបួសយ៉ាងដំណំ កាលពីវេលាម៉ោងជាង១០ យប់ថ្ងៃទី១៤ ខែធ្នូ ឆ្នាំ២០១៨នេះ នៅចំណុចម្ដុំផ្ទះល្វែង ផ្លូវលំ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ។
តាមប្រភពព័ត៌មានពីស្ត្រីជាប្រពន្ធដើម បាននិយាយថា ប្ដីដែលវាយខ្លួននោះ មានឈ្មោះ ហុក ម៉ាប់ ជាមន្ត្រីនគរបាលសេដ្ឋកិច្ច (ឋានន្តរស័ក្ដិអនុសេនីយ៍ឯក) ដែលមានទីលំនៅផ្ទះ១២M ផ្លូវលំ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ។
ប្រភពដដែលបានបន្តថា ខ្លួននិងកូន បានមកដាក់ពាក្យប្ដឹងនគរបាលប៉ុស្តិ៍ចោមចៅទី១ ក្រោយកើតហេតុ។ ដោយរៀបរាប់ថា ប្ដីគាត់ បានយកក្ដារឈើ វាយគាត់ និងកូន បណ្ដាលឲ្យរងរបួសជាច្រើនកន្លែង។
មូលហេតុដោយសារ បុរសខាងលើ លួចមានប្រពន្ធចុង ជាយូរណាស់មកហើយ លុះពេលប្រពន្ធសួរនាំ ក៏រករឿង និងឈ្លោះប្រកែកគ្នា ទើបឈានដល់ប្រើអំពើហិង្សាបែបនេះ។
តាមប្រភពព័ត៌មានពីកូនស្រី របស់បុរសខាងលើ បានឲ្យដឹងដឹងថា ព្រោះតែទ្រាំនឹងទង្វើឪពុកធ្វើលើខ្លួន និងម្ដាយមិនបាន ទើបនៅព្រឹកថ្ងៃទី១៥ ខែធ្នូ ឆ្នាំ២០១៨នេះ ខ្លួន និងម្ដាយដែលជាប្រពន្ធដើម បានសម្រេចចិត្តមកដាក់ពាក្យប្ដឹងនៅស្នាក់ការប៉ុស្តិ៍នគរបាលចោមចៅទី១ ដើម្បីឲ្យសមត្ថកិច្ច ជួយរកយុត្តិធម៌ជូន៕
មតិយោបល់