កំពង់ស្ពឺ: ករណីគ្រោះថ្នាក់ចរាចរណ៍ នៅលើផ្លូវជាតិលេខ៤ កាលពីថ្ងៃទី២៦ ខែធ្នូ ឆ្នាំ២០១៨ វេលាម៉ោង៩និង៤០នាទី ចន្លោះគីឡូម៉ែត្រលេខ៤៦-៤៧ ចំណុចភូមិសំណង់ សង្កាត់រកាធំ ក្រុងច្បារមន ខេត្តកំពង់ស្ពឺ បង្កឡើងដោយរថយន្ដ១គ្រឿងម៉ាកLand Cruiser ពណ៌សំបកឪឡឹក ស្លាកលេខ ភ្នំពេញ 2C-6259 បើកបរដោយឈ្មោះ សុង ប៊ុនស៊ី ភេទប្រុស អាយុ៣៦ឆ្នាំ រស់នៅភូមិតាំងទន្លេ សង្កាត់សុព័រទេព ក្រុងច្បារមន ខេត្តកំពង់ស្ពឺ មុខរបរអាជីករ បើកបរពីទិសខាងកើតទៅទិសខាងលិច លុះមកដល់ចំណុចខាងលើបានទៅបុកម៉ូតូ០១ គ្រឿង ម៉ាកស្កុបពី ពណ៌ស ស្លាកលេខ កំពង់ស្ពឺ 1J-4497 បើកបរឲ្យរងរបួសធ្ងន់។
ក្រោយហេតុការណ៍បង្កការគ្រោះថ្នាក់ចរាចរណ៍ ម្ចាស់រថយន្តបានធ្វើការចោទប្រកាន់ប្រកែកទៅលើម្ចាស់ម៉ូតូថាបើកបរគ្មានគោរពច្បាប់ ព្រោះផ្លូវជាតិគេបើកបរក្នុងល្បឿនលឿនតែម៉ូតូនេះបើកយឺតពេក ទើបបណ្ដាលឲ្យរថយន្តបុកពីក្រោយ ថែមទាំងមានអាកប្បកិរិយាច្រង៉េងច្រង៉ាងមិនព្រមឲ្យជំនាញនគរបាលផ្នែកចរាចរណ៍ធ្វើការវាស់វែងនិងយកទៅកន្លែងនោះទេ ដោយស្ថានភាពបុគ្គលម្ចាស់រថយន្ដបង្កមានការរឹងទទឹងទើបនគរបាលជំនាញស្នើសុំកម្លាំងសហការពីនគរបាលព្រហ្មទណ្ឌខេត្ដធ្វើការឃាត់ខ្លួនបញ្ជូនទៅស្នងការដ្ឋាននគរបាលខេត្ដ ដើម្បីចំណាត់ការនិងចាត់ការតាមនីតិវិធី។
តាមការឲ្យដឹងពីនគរបាលជំនាញចរាចរណ៍ម្នាក់សុំមិនបញ្ចេញឈ្មោះបានប្រាប់ថាករណីខាងលើនេះ ជនរងគ្រោះបានដាក់ពាក្យបណ្ដឹងបន្ថែមមកកាន់ស្នងការដ្ឋាននគរបាលខេត្ដ ចោទប្រកាន់ ពីបទមនុស្សឃាតដោយចេតនា ដោយសំអាងថាជនរងគ្រោះកន្លងមកធ្លាប់អនុវត្ដដីកាបង្គាប់ឲ្យចាប់ខ្លួនឈ្មោះ សុង ប៊ុនស៊ី កាលពីថៃ្ងទី៧ ខែមករា ឆ្នាំ២០១៨ ពេលនោះជនសង្ស័យបានប្រើពាក្យសម្ដីជេរប្រមាថដល់សមត្ថកិច្ចថាមិនអីទេពួកឯងថៃ្ងណាមួយដឹងខ្លួនមិនខានទេ«ជុងមិនភ្លេចកុក»។
បច្ចុប្បន្នមធ្យោបាយវត្ថុតាងទាំង២ជំនាញខេត្ដបានយកមករក្សាទុកនៅការិយាល័យនគរបាលចរាចរណ៍ផ្លូវគោកខេត្ដ ដើម្បីកសាងសំណុំរឿងបញ្ជូនចាត់ការតាមនីតិវិធីច្បាប់៕
មតិយោបល់