(ភ្នំពេញ) ៖ គណ:បញ្ជាការឯកភាពខណ្ឌឫស្សីកែវ បានដឹកនាំដោយលោក សន សោសោភ័ណ្ឌ នាយករងរដ្ឋបាលស្តីទីខណ្ឌឫស្សីកែវ នៅព្រឹកថ្ងៃទី៣១ ខែមីនាឆ្នាំ២០១៦ បានអនុវត្តវិធានការរដ្ឋបាលចុះរុះរើសំណង់អត់ច្បាប់ដែលសង់លើដីសាធារណ:របស់រដ្ឋ ដែលស្ថិតនៅតាមបណ្តោយផ្លូវបុរីអង្គរភ្នំពេញ ក្រុមទី១៣ ភូមិទួលគោក សង្កាត់ទួលសង្កែ ខណ្ឌឫស្សីកែវ ។
ក្នុងការអនុវត្តវិធានការនេះ អាជ្ញាធរបានប្រើកម្លាំងសណ្តាប់ធ្នាប់ និងសមត្ថកិច្ចប្រមាណជាង ៣០នាក់ ឲ្យចុះអនុវត្ត ព្រមទាំងរុះរើអីវ៉ាន់ និងរបស់របរទាំងអស់ដាក់រថយន្តដឹកយកទៅទុកនៅសាលាសង្កាត់ បន្ទាប់ពីអាជ្ញាធរចេញសេចក្តីជូនដំណឹងជាច្រើនលើកច្រើនសារតែម្ចាស់សំណង់មិនព្រមសហការជាមួយអាជ្ញាធរឡើយ ។
បើតាមការបញ្ជាក់ពីអាជ្ញាធរបានប្រាប់ថា សំណង់ខាងលើ គឺមានទំហំ ៥ម៉ែត្រ គុណនិង ៦ម៉ែត្រប្រក់ស័ង្កសី ដែលម្ចាស់ឈ្មោះ ស្រី សារ៉ាវុធ ព្រមទាំងក្រុមគ្រួសារបានមករស់នៅ រួចបានសង់រោងចាំដីឲ្យលោកឧកញ៉ា គង់ ហុង តាំងពីឆ្នាំ១៩៩៩មកម្ល៉េះ និងបានពង្រីកមុខរបរលក់ដូរនៅក្បែរចិញ្ចើមផ្លូវលើដីសាធារណ: ។
អាជ្ញាធរខណ្ឌឫស្សីកែវបានឲ្យដឹងទៀតថា ក្នុងការចុះរុះរើសំណង់នេះ គឺធ្វើឡើងតាមលិខិតជូនដំណឹងរបស់សាលាខណ្ឌឫស្សីកែវ និងយោងតាមលិខិតលេខ០៥៨/១៦ លស.រចុះថ្ងៃទី១៥ ខែមីនា ឆ្នាំ២០១៦ របស់សាលារាជធានីភ្នំពេញ ។
អាជ្ញាធរបានប្រាប់បន្តទៀតថា កន្លងមកអាជ្ញាធរបានធ្វើការសម្របសម្រួលដោយបានធ្វើការដោះស្រាយ និងឲ្យប្រាក់ចំនួន១ពាន់ដុល្លារតែម្ចាស់មិនព្រមទទួលយក និងបានចេញសេចក្តីជូនដំណឹងឲ្យម្ចាស់សំណង់ធ្វើការរុះរើដោយខ្លួនឯងចំនួន ០២លើកមកហើយ តែម្ចាស់សំណង់មិនព្រមស្តាប់តាមការណែនាំរបស់អាជ្ញាធរខណ្ឌឫស្សីកែវទេ ទើបពេលនេះ អាជ្ញាធរបានប្រើកម្លាំងចុះរុះរើតែម្តង ។
បើតាមម្ចាស់សំណង់ឈ្មោះ ស្រី សាវុធ បាននិយាយថា គាត់បានមករស់នៅលើដីនេះតាំងពីឆ្នាំ១៩៩៩មកម្លេះ គឺគាត់បានរស់នៅលើដីរដ្ឋមិនមែនចាំដីឱ្យគេទេ ហើយមុននឹងអាជ្ញាធរចុះមករុះរើសំណង់នេះ គេបានជូនដំណឹងតែ ០២ដងដែរ ហើយកាលពីថ្ងៃទី៣០ ខែមីនាគាត់បានទៅសុំពន្យាពេលដែរតែអាជ្ញាធរមិនអនុញ្ញាតិឲ្យទេ លុះព្រឹកថ្ងៃទី៣១ ខែមីនាអាជ្ញាធរក៏បានមករុះរើតែម្តង ៕
មតិយោបល់