The Garden Residency ចំណាយដើមទុនជាង ១០លានដុល្លារអាមេរិក គ្រោងនឹងបញ្ចប់នៅឆ្នាំ ២០១៨ ខាងមុខ។ នេះបើយោងតាម បទសម្ភាសតាមទូរស័ព្ទជាមួយបុគ្គលិកផ្នែកលក់នៃគម្រោង។

អគារខុនដូ The Garden Residency ជាគម្រោងទី ១ របស់ក្រុមហ៊ុនម៉ាឡេស៊ី JSland Limited ដែលត្រូវបានវិនិយោគជាមួយនឹងទឹកប្រាក់ប្រមាណជា ១០លានដុល្លារអាមេរិក។

លោក ណារ៉ូ បុគ្គលិកផ្នែកលក់នៃគម្រោងបានឲ្យដឹងថា The Garden Residency បានដំណើរការ សាងសង់កាលពីឆ្នាំ ២០១៦ ហើយរហូតមកទល់បច្ចុប្បន្ននេះ សាងសង់រួចរាល់បានប្រមាណជា ៥០ ភាគរយ។

អគារកម្ពស់ ១៩ជាន់នេះ​ មានបន្ទប់ស្នាក់នៅសរុបចំនួន ២១២យូនីត និងមានទីតាំងឋិតនៅ សង្កាត់ ភ្នំពេញថ្មី ខណ្ឌសែនសុខ រាជធានីភ្នំពេញ។

សូមជម្រាបផងដែរថា JSland Limited គ្រោងនឹងសាងសង់អគារខុនដូទី ២ របស់ខ្លួននិងមានទីតាំង ស្ថិតនៅ បឹងកេងកង ១ ដែលគម្រោងនេះក្រុមហ៊ុនផ្តោតសំខាន់លើអ្នកមានចំណូលមធ្យមផងដែរ៕